GST : చిన్న వ్యాపారులకు గుడ్ న్యూస్.. నవంబర్ 1 నుంచి సరళ్ జీఎస్టీ రిజిస్ట్రేషన్ స్కీమ్.

GST : దేశంలోని చిన్న మధ్య తరహా వ్యాపారులకు కేంద్ర ప్రభుత్వం ఒక శుభవార్త అందించింది. నవంబర్ 1 నుంచి సరళ్ జీఎస్టీ రిజిస్ట్రేషన్ స్కీమ్ ను ప్రారంభించింది. ఈ కొత్త పథకం ద్వారా తక్కువ రిస్క్ ఉన్న చిన్న వ్యాపారాలకు కేవలం మూడు వర్కింగ్ డేలలో జీఎస్టీ రిజిస్ట్రేషన్ లభించనుంది. ఈ చారిత్రక నిర్ణయం భారతదేశంలో వ్యాపారం ప్రారంభించే ప్రక్రియను మరింత సులభతరం చేయడంతో పాటు, పన్ను చెల్లింపుల వ్యవస్థలో పారదర్శకతను పెంచుతుందని ఆర్థిక నిపుణులు అభిప్రాయపడుతున్నారు.

నవంబర్ 1 నుంచి చిన్న మధ్య తరహా వ్యాపారుల కోసం కేంద్ర ప్రభుత్వం సరళ్ జీఎస్టీ రిజిస్ట్రేషన్ స్కీమ్‎ను అమలులోకి తీసుకొచ్చింది. ఈ పథకం ముఖ్య ఉద్దేశం రిజిస్ట్రేషన్ ప్రక్రియను వేగవంతం చేయడం. ఈ కొత్త స్కీమ్ ద్వారా రిజిస్ట్రేషన్ కోసం దరఖాస్తు చేసుకున్న వ్యాపారులకు కేవలం మూడు పనిదినాలలోపు జీఎస్టీ నంబర్ లభిస్తుంది. సాధారణంగా రిజిస్ట్రేషన్ ప్రక్రియ పూర్తి కావడానికి ఎక్కువ సమయం పడుతుంది.

జీఎస్టీ కౌన్సిల్ సెప్టెంబర్ 3న జరిగిన సమావేశంలోనే ఈ ప్రతిపాదనకు ఆమోదం తెలిపింది. ఈ సరళ్ పథకం అందరికీ వర్తించదు. కేవలం కొన్ని షరతులకు లోబడి ఉన్న చిన్న వ్యాపారాలు మాత్రమే దీనిని ఉపయోగించుకోవచ్చు. జీఎస్టీ సిస్టమ్ డేటా విశ్లేషణ ఆధారంగా ఏ వ్యాపారాలను అయితే తక్కువ రిస్క్ ఉన్నవిగా గుర్తిస్తారో, వారికి మాత్రమే ఈ పథకం వర్తిస్తుంది.

అలాగే, నెలకు తమ మొత్తం అవుట్‌పుట్ ట్యాక్స్ (CGST, SGST/UTGST, IGST కలిపి) రూ.2.5 లక్షలకు మించదని సెల్ఫ్ డిక్టరేషన్ చేసే వ్యాపారులు కూడా ఈ పథకాన్ని ఎంచుకోవచ్చు. ఈ స్కీమ్‌లో చేరడం లేదా దాని నుంచి నిష్క్రమించడం అనేది వ్యాపారుల వాలంటరీ నిర్ణయం పై ఆధారపడి ఉంటుంది. కేంద్ర ఆర్థిక మంత్రి నిర్మలా సీతారామన్ ఈ కొత్త పథకం గురించి ప్రకటన చేస్తూ దీని ద్వారా ఎంతమందికి లబ్ధి చేకూరుతుందో వివరించారు.

ఈ కొత్త సరళ్ స్కీమ్ ద్వారా దాదాపు 96 శాతం కొత్త జీఎస్టీ దరఖాస్తుదారులకు ప్రయోజనం లభిస్తుందని ఆర్థిక మంత్రి ఆశాభావం వ్యక్తం చేశారు. జీఎస్టీ అధికారులకు ఈ పథకాన్ని వేగంగా, ఎలాంటి అడ్డంకులు లేకుండా అమలు చేయాలని ఆమె ఆదేశించారు. అలాగే, వ్యాపారులకు సహాయం అందించడానికి జీఎస్టీ సేవా కేంద్రాలలో ప్రత్యేక హెల్ప్ డెస్క్‌లు ఏర్పాటు చేయాలని సీబీఐసీకి సూచించారు. ప్రస్తుతం దేశవ్యాప్తంగా జీఎస్టీ వ్యవస్థ కింద దాదాపు 1.54 కోట్ల వ్యాపారాలు నమోదై ఉన్నాయి. ఈ కొత్త పథకం ద్వారా దేశంలో వ్యాపార వాతావరణం మరింత మెరుగుపడుతుందని ప్రభుత్వం భావిస్తోంది. కొత్త వ్యాపారాలు, చిన్న వ్యాపారాలు సులభంగా జీఎస్టీ వ్యవస్థలోకి రావడానికి ఈ పథకం దోహదపడుతుంది. దీనివల్ల పన్ను పరిధి పెరుగుతుంది.

ఈ చొరవ వల్ల చిన్న వ్యాపారాలు అధికారిక ఆర్థిక వ్యవస్థలోకి రావడానికి ప్రోత్సాహం లభిస్తుంది. ఇది పన్ను వసూళ్ల వ్యవస్థలో పారదర్శకతను పెంచుతుంది. మొత్తంగా, వ్యాపారం ప్రారంభించడం, విస్తరించడం అనేది ఇంతకు ముందు కంటే చాలా సులభం కానుంది.