Anil Ambani : అనిల్ అంబానీకి పెద్ద షాక్..ఇటు రూ.3000 కోట్ల ఆస్తులు జప్తు..అటు మార్కెట్లో 1831 కోట్ల నష్టం.

Anil Ambani : దేశంలోని ప్రముఖ పారిశ్రామికవేత్తలలో ఒకరైన అనిల్ అంబానీకి చెందిన సుమారు 3,000 కోట్ల రూపాయల విలువైన ఆస్తులను ఎన్‌ఫోర్స్‌మెంట్ డైరెక్టరేట్ జప్తు చేసింది. ఇందులో ముంబైలోని పాలీ హిల్ ఇల్లు, ఢిల్లీలోని రిలయన్స్ సెంటర్ వంటి ప్రధాన ఆస్తులు ఉన్నాయి. ఈడీ చర్యతో పాటు సోమవారం మార్కెట్లలో ఆయనకు చెందిన రెండు ప్రధాన కంపెనీల షేర్లు కుప్పకూలాయి. రిలయన్స్ పవర్, రిలయన్స్ ఇన్‌ఫ్రాస్ట్రక్చర్ షేర్లలో భారీ పతనం నమోదు కావడంతో ఈ ఒక్క రోజులోనే అనిల్ అంబానీకి రూ.1831 కోట్లకు పైగా నష్టం వాటిల్లినట్లు సమాచారం.

ప్రముఖ వ్యాపారవేత్త అనిల్ అంబానీకి సంబంధించిన సుమారు రూ.3,000 కోట్ల ఆస్తులను ఎన్‌ఫోర్స్‌మెంట్ డైరెక్టరేట్ జప్తు చేసింది. ఈ చర్య ఆర్థిక మార్కెట్లపై తీవ్ర ప్రభావాన్ని చూపింది. ఈడీ జప్తు చేసిన ఆస్తులలో ముంబైలోని పాలీ హిల్ బంగ్లా, ఢిల్లీలోని రిలయన్స్ సెంటర్ వంటి ముఖ్యమైన ఆస్తులు ఉన్నాయి. ఈ వార్త నేపథ్యంలో సోమవారం మార్కెట్లు ప్రారంభమైన వెంటనే అనిల్ అంబానీకి చెందిన రిలయన్స్ గ్రూప్ కంపెనీల షేర్లపై ప్రతికూల ప్రభావం కనిపించింది. దీని కారణంగా రిలయన్స్ పవర్, రిలయన్స్ ఇన్‌ఫ్రాస్ట్రక్చర్ అనే రెండు కంపెనీల నుంచే ఆయనకు రూ.1800 కోట్లకు పైగా నష్టం వాటిల్లింది.

ఈడీ చర్య తర్వాత మార్కెట్‌లో రిలయన్స్ ఇన్‌ఫ్రాస్ట్రక్చర్ షేర్లలో భారీ అమ్మకాలు చోటు చేసుకున్నాయి. మార్కెట్ తెరుచుకున్న కొద్దిసేపటికే రిలయన్స్ ఇన్‌ఫ్రాస్ట్రక్చర్ షేర్లపై 5 శాతం పతనంతో లోవర్ సర్క్యూట్ నమోదైంది. దీంతో షేరు ధర సుమారు రూ.10 తగ్గి, రూ.205.16 వద్దకు చేరుకుంది. నిన్న (ఆదివారం) రూ.8,767.18 కోట్లుగా ఉన్న కంపెనీ మార్కెట్ విలువ, ఈరోజు మధ్యాహ్నం 1:30 గంటల సమయానికి రూ.437.23 కోట్లు తగ్గి రూ.8,329.95 కోట్లకు చేరుకుంది.

గ్రూప్‌లోని మరో ప్రధాన కంపెనీ అయిన రిలయన్స్ పవర్ షేర్లు కూడా తీవ్ర ఒడిదుడుకులకు లోనయ్యాయి. ఈరోజు దలాల్ స్ట్రీట్‌లో రిలయన్స్ పవర్ షేర్లలో 6 శాతం కంటే ఎక్కువ పతనం కనిపించింది. వార్తలు రాసే సమయానికి షేర్లు 6.05 శాతం తగ్గి రూ.43.61 వద్ద ట్రేడ్ అవుతున్నాయి. నిన్న రూ.19,198.25 కోట్లుగా ఉన్న కంపెనీ మార్కెట్ విలువ, ఈరోజు రూ.17,804.49 కోట్లకు పడిపోయింది. ఈ రెండు కంపెనీల (పవర్, ఇన్‌ఫ్రా) మార్కెట్ విలువలో వచ్చిన మొత్తం తగ్గుదలను లెక్కిస్తే అనిల్ అంబానీకి ఒకే రోజు రూ.1800 కోట్లకు పైగా నష్టం జరిగింది.