ECONOMY: భారత ఆర్థిక రథం జోరు: 7.5 శాతానికి జిడిపి వృద్ధి!

ప్రపంచవ్యాప్తంగా భౌగోళిక రాజకీయ ఉద్రిక్తతలు మరియు అనిశ్చితి నెలకొన్నప్పటికీ, భారత ఆర్థిక వ్యవస్థ పటిష్ఠమైన వృద్ధి పథంలో దూసుకుపోతోందని అంతర్జాతీయ రేటింగ్స్ సంస్థ 'ఫిచ్' (Fitch Ratings) కొనియాడింది. ప్రస్తుత ఆర్థిక సంవత్సరం (2025-26)లో భారత వృద్ధి రేటు 7.5 శాతంగా నమోదు కావొచ్చని తన తాజా నివేదికలో అంచనా వేసింది. గత డిసెంబరులో ఈ అంచనా 7.4 శాతంగా ఉండగా, తాజాగా దానిని సవరించడం విశేషం.

వచ్చే ఏడాదికీ సానుకూల పవనాలు

వచ్చే ఆర్థిక సంవత్సరం (2026-27)లో వృద్ధి రేటు అంచనాలను కూడా ఫిచ్ 6.4 శాతం నుండి 6.7 శాతానికి పెంచింది. అయితే, 2026-27 ప్రథమార్థంలో వృద్ధి కొంత నెమ్మదించే అవకాశం ఉందని 'గ్లోబల్ ఎకనామిక్ అవుట్‌లుక్' పేర్కొంది. గత ఏడాది సెప్టెంబరు త్రైమాసికంలో 8.4 శాతంగా ఉన్న వృద్ధి, డిసెంబరు నాటికి 7.8 శాతానికి స్వల్పంగా తగ్గినప్పటికీ, ఓవరాల్‌గా భారత ఆర్థిక స్థితిగతులు ఆశాజనకంగా ఉన్నాయని సంస్థ అభిప్రాయపడింది.

వృద్ధికి ప్రధాన కారణాలు:

భారత వృద్ధికి ప్రధానంగా దేశీయ డిమాండ్ వెన్నుముకగా నిలుస్తోందని ఫిచ్ విశ్లేషించింది.ఈ ఏడాది ఇది 8.6% పెరిగే అవకాశం ఉంది. వివిధ రంగాల్లో పెట్టుబడులు 6.9% వృద్ధి చెందుతాయని అంచనా.

బ్యాంకింగ్ రంగం:

జనవరి, ఫిబ్రవరి నెలల్లో ఆర్థిక కార్యకలాపాలు స్వల్పంగా నెమ్మదించినా, రుణాల వృద్ధి ఇంకా రెండంకెల స్థాయిలోనే ఉండటం ఆర్థిక వ్యవస్థ పటిష్ఠతకు నిదర్శనమని పేర్కొంది.

ముడిచమురు సెగ.. మరియు ఊరట!

ఇరాన్‌పై అమెరికా-ఇజ్రాయెల్ దాడుల నేపథ్యంలో చమురు ధరలు బ్యారెల్‌కు 100 డాలర్ల మార్కును తాకాయి. హర్మూజ్ జలసంధి మూసివేత భయాలతో ఈ నెలలో ధరలు 90-100 డాలర్ల మధ్య ఊగిసలాడవచ్చు. అయితే, ద్వితీయార్థం నాటికి ఇవి 60 డాలర్ల స్థాయికి తగ్గుతాయని, ఫలితంగా 2026 వార్షిక సగటు ధర 70 డాలర్లుగా ఉండొచ్చని ఫిచ్ అంచనా వేసింది. "ఒకవేళ చమురు ధరలు 100 డాలర్ల వద్దే స్థిరంగా కొనసాగితే, అది అంతర్జాతీయ సరఫరా గొలుసుపై తీవ్ర ప్రభావం చూపుతుంది." — బ్రియాన్ కౌల్టన్, ఫిచ్ ముఖ్య ఆర్థికవేత్త.

ద్రవ్యోల్బణం - ఆర్‌బీఐ నిర్ణయాలు

2026 డిసెంబరు నాటికి రిటెయిల్ ద్రవ్యోల్బణం 4.5 శాతానికి పెరిగే అవకాశం ఉందని నివేదిక హెచ్చరించింది. ఈ నేపథ్యంలో, భారత రిజర్వ్ బ్యాంక్ (RBI) వడ్డీ రేట్ల విషయంలో జాగ్రత్తగా వ్యవహరించవచ్చని, కీలకమైన రెపో రేటును 5.25% వద్దే ఈ ఏడాది మరియు వచ్చే ఏడాది కూడా మార్పు లేకుండా కొనసాగించే అవకాశం ఉందని ఫిచ్ పేర్కొంది.

బేస్ ఇయర్ మార్పుతో మరింత స్పష్టత

జాతీయ ఖాతాల డేను సవరించడం, అంటే బేస్ ఇయర్‌ను 2011-12 నుండి 2022-23కి మార్చడం వల్ల జిడిపి వృద్ధి గణాంకాలు ఇప్పుడు మరింత వాస్తవికంగా మరియు స్థిరంగా కనిపిస్తున్నాయని ఫిచ్ తన నివేదికలో సానుకూలంగా స్పందించింది. ప్రపంచ జిడిపి వృద్ధి 2026లో 2.6 శాతంగా ఉండవచ్చని అంచనా వేస్తూ, ప్రపంచ సగటుతో పోలిస్తే భారత్ మెరుగైన ప్రదర్శన కనబరుస్తోందని స్పష్టం చేసింది.