ITR: ఐటీఆర్ రిటర్న్స్.. ఫైలింగ్ యాప్‌లతో జాగ్రత్త
ఐటీ చెల్లింపుదారులకు బిగ్ అలర్ట్... రిటర్నులు ఫైల్ చేయడంలో జాగ్రత్త... ఐటీ ఫైలింగ్‌కి పలు యాప్స్ వినియోగం;
ఆదాయపు పన్ను పరిధిలోకి వచ్చే వారు తమ ఐటీ రిటర్నులు ఫైల్ చేస్తున్నారు. అయితే, గతంలో కంటే ఇప్పుడు చాలా జాగ్రత్తగా ఉండాల్సిన అవసరం ఏర్పడింది. ఎందుకంటే నిబంధనలు పాటించేలా, తప్పుడు వ్యవహారాలను గుర్తించేందుకు ఐటీ శాఖ చర్యలు చేపట్టింది. అయితే, ఆదాయపు పన్ను రిటర్నులు దాఖలు చేయడానికి ఎన్నో మార్గాలు ఉన్నాయి. ప్రాక్టీస్‌ చేస్తున్న సీఏలు, సీఎంఏలు, లాయర్లు, ట్యాక్స్‌ ప్రాక్టీషనర్లు.. ఇలా వృత్తి నిపుణులు ఉన్నారు. డిపార్టుమెంటు దగ్గర రిజిస్టర్‌ చేసుకుని, ఇన్‌కం ట్యాక్స్‌ ప్రాక్టీషనర్లుగా చలామణీ అయ్యే వారితోనూ ఫైల్ చేయించుకోవచ్చు. మీరే స్వయంగా చేసుకోవచ్చు. అనుభవం ఉన్న ఫ్రెండ్స్‌ సహాయంతో ఫైలింగ్ చేసుకోవచ్చు. కొన్ని సంస్థలు కూడా ఈ ఫైలింగ్ పనులు చేస్తున్నాయి. వీరందరితో మీరు స్వయంగా మాట్లాడవచ్చు. కలవవచ్చు. డిస్కస్‌ చేసి, రిటర్నులు వేయొచ్చు.
ఫైలింగ్‌కు పలు యాప్స్
ప్రస్తుతం ఈ ఆధునిక డిజిటల్‌ యుగంలో ప్రతి పనికి మనం ఎన్నో అప్లికేషన్లను వాడుతున్నాం. చేతిలో సెల్‌ ఫోన్‌ ఉంటే చాలు. అరచేతిలో స్వర్గం చూస్తున్నట్లు యాప్‌లను ఇన్‌స్టాల్‌ చేసేస్తున్నాం. వాడుతున్నాం. ఆదాయపు పన్ను ఫైలింగ్‌కి కూడా రకరకాలుగా యాప్స్ వస్తున్నాయి. ఫైలింగ్స్‌కు యాప్స్ వాడడం వల్ల పని చాలా త్వరగా పూర్తవుతుంది. అతి తక్కువగా ఖర్చు అవుతుంది. మీ సీటులో నుంచి కదలక్కర్లేదు. అయితే, మీ ఐటీ రిటర్నులు ఫైల్ చేయడంలో ఎంతో జాగ్రత్తగా ఉండాలి.
ఆప్లికేషన్స్‌తో ఇబ్బందులు
యాప్స్ వాడడంతో చాలా త్వరగా ఫైలింగ్ చేయొచ్చు. అయితే చౌకగా సర్వీసులు అందిస్తున్నారంటే, వారు పూర్తిగా ఆర్టిఫిషియల్ ఇంటెలిజెన్స్(ఏఐ) మీద ఆధారపడుతున్నారని అర్థం చేసుకోవాలి.ఏఐ వల్ల త్వరగా అవుతుందేమో గానీ, ఎన్నో అంశాల్లో జడ్జిమెంట్‌ కావాలి. కేవలం కాగితాల్లో ఉన్న అంకెలను చదివి, వాటిని నింపడం/రాయడం/ఎక్కించడం మాత్రమే చేస్తారు. ఫారం 16లో తప్పులు, ఫారం 26ఏఎస్‌లో తప్పులు, డబుల్‌ ఎంట్రీలు, మీకసలు వర్తించని అంశాలు, మీకు సంబంధం లేని అంశాలు, అలాగే టీఐఎస్‌లో కూడా తప్పులు, డబుల్‌ ఎంట్రీలు, మీవి కాని/సంబంధం లేనివి ఉంటాయి. వాటిని చెక్‌ చేసి, విశ్లేషించే ప్రక్రియ ఉండదు.
ఎక్కువ పన్ను.. నో రిఫండ్
ఏ తప్పులు దొర్లినా ఎలాంటి బాధ్యతలు వహించరు. తప్పుల మేరకు సరిదిద్దాలంటే డబ్బులు అడుగుతారు. సహజసిద్ధమైన మానవ మేథస్సును వాడకపోవడం వల్ల మనకు డ్యామేజీ జరగవచ్చు. ఎక్కువ పన్ను చెల్లించడం, రిఫండు తగ్గిపోవడం లాంటివి జరిగే అవకాశం ఉంది. డిడక్షన్లను తప్పుగా క్లెయిమ్ చేసే అవకాశం ఉంది. కొత్త విధానమా, పాత విధానమా అనేది ఎంచుకోవడంలో తప్పు జరగవచ్చు. క్యాపిటల్‌ గెయిన్స్‌ విషయంలో వర్గీకరణ తప్పుగా చేయొచ్చు. సర్దుబాటు చేయాల్సిన నష్టాలు తీసుకోకపోవచ్చు. నష్టాల బదిలీ జరగకపోవచ్చు.
నోటీసులు వచ్చే ప్రమాదం
వందల అంశాలు మీతో ముఖాముఖి చర్చించే పరిస్థితికి బదులు ఎకాయెకిన ఫేస్‌లెస్‌గా, బేస్‌లెస్‌గా ఒక క్లిక్‌ చేస్తే, అర్థం లేని ఫైలింగ్‌తో మీరు అనర్ధాలు కొనుక్కుంటారు. సాఫ్ట్‌వేర్‌లో తప్పులున్నా.. ఉండొచ్చు. ఏదైనా సందర్భంలో నోటీసులు వచ్చే ప్రమాదం ఉంది. చౌకగా సర్వీసులు దొరికాయని సంబరపడకండి. వందల రూపాయలు మిగిలాయని, మితిమీరి సంతోషపడితే వేలల్లో/లక్షల్లో నష్టాన్ని చూడాల్సి రావొచ్చని నిపుణులు సూచిస్తున్నారు.