Kia : కియా కారెన్స్ క్లావిస్ మరింత చౌక..ఇప్పుడు 6-సీటర్ ఆప్షన్స్‌లో కొత్త వేరియంట్ కూడా.

Kia : పండుగ సీజన్‌ను దృష్టిలో ఉంచుకుని కార్ల తయారీ సంస్థ కియా ఇండియా తమ ప్రముఖ మోడల్ అయిన కియా కారెన్స్ క్లావిస్లో కొత్త వేరియంట్‌లను ప్రవేశపెట్టింది. ముఖ్యంగా 6-సీటర్ కాన్ఫిగరేషన్‌ను మరింత సరసమైన ధరల్లోకి తీసుకురావడానికి కంపెనీ ఈ నిర్ణయం తీసుకుంది. టాప్-ఎండ్ HTX, HTX+ ట్రిమ్‌ల మధ్య కొత్త HTX (O) ట్రిమ్‌ను పరిచయం చేయడమే కాకుండా, తక్కువ ధరలో మరికొన్ని 6-సీటర్ వేరియంట్‌లను జోడించింది. దీంతో కియా కారెన్స్ క్లావిస్ ఇప్పుడు మరింత ఎక్కువ మంది కస్టమర్లకు అందుబాటులోకి వచ్చింది.

కియా ఇండియా కారెన్స్ క్లావిస్ మోడల్ లైనప్‌లో భాగంగా ఒక కొత్త టాప్-ఎండ్ ట్రిమ్ అయిన HTX (O) ను ప్రవేశపెట్టింది. ఈ కొత్త ట్రిమ్ టర్బో పెట్రోల్ ఇంజన్, DCT (డైరెక్ట్-షిఫ్ట్ గేర్‌బాక్స్) కలయికతో లభిస్తుంది. ఇది 6-సీటర్, 7-సీటర్ కాన్ఫిగరేషన్‌లలో అందుబాటులో ఉంది. HTX (O) 6-సీటర్ టర్బో-DCT వేరియంట్ ఎక్స్-షోరూమ్ ధర రూ. 19.27 లక్షలుగా నిర్ణయించారు.

6-సీటర్ కారెన్స్ క్లావిస్‌ను మరింత ఎక్కువ మంది కస్టమర్లకు చేరువ చేయడానికి, కియా మూడు కొత్త, తక్కువ ధరల వేరియంట్లను కూడా విడుదల చేసింది. HTK+ 1.5 TGDi 6S 7DCT వేరియంట్ ఎక్స్-షోరూమ్ ధర రూ. 16,28,064గా ఉంది. ఆటోమేటిక్ ట్రాన్స్‌మిషన్ ఆప్షన్‌ను డీజిల్ ఇంజన్‌తో కోరుకునే వారి కోసం, HTK+ 1.5 CRDi 6S 6AT వేరియంట్‌ను రూ.17,34,037 ధరకు తీసుకువచ్చారు. ఇక మూడవ వేరియంట్ అయిన HTK+(O) 1.5 TGDi 6S 7DCT ధర రూ.17,05,135గా నిర్ణయించబడింది.

ఈ విస్తరణతో, కారెన్స్ క్లావిస్ ఇప్పుడు HTE, HTE (O), HTK, HTK+, HTK+(O), HTX, HTX(O), HTX+ అనే 8 ట్రిమ్‌లలో లభిస్తుంది. ఈ MPV ప్రారంభ ధర రూ. 11.07 లక్షలు (ఎక్స్-షోరూమ్)గా ఉంది. కారెన్స్ క్లావిస్‌లో 1.5L టర్బో పెట్రోల్ ఇంజన్ ఉంది. ఇది 160 bhp పవర్, 253 Nm టార్క్‌ను ఉత్పత్తి చేస్తుంది. ఈ ఇంజన్ 7-స్పీడ్ DCT గేర్‌బాక్స్‌తో అనుసంధానించబడింది.

ఈ కారులో LED హెడ్‌లైట్లు, 17-అంగుళాల మెటల్ అల్లాయ్ వీల్స్, 12.25-అంగుళాల డ్యూయల్ పనోరమిక్ డిస్‌ప్లే ప్యానెల్, పనోరమిక్ సన్‌రూఫ్, 8-స్పీకర్ బోస్ సౌండ్ సిస్టమ్, వన్-టచ్ ఎలక్ట్రిక్ టంబుల్ ఫంక్షన్‌తో మూడవ వరుస సీట్లు, ఆటో హోల్డ్‌తో ఎలక్ట్రానిక్ పార్కింగ్ బ్రేక్, 360-డిగ్రీ కెమెరా, డ్రైవ్ మోడ్‌లు (ఎకో, నార్మల్, స్పోర్ట్) వంటి అడ్వాన్సుడ్ ఫీచర్లు ఉన్నాయి.