GOLD: బంగారం@ రూ. 1.60 లక్షలు!

అంతర్జాతీయ పరిణామాల నేపథ్యంలో బంగారం ధరలు మళ్లీ ఆకాశాన్ని తాకుతున్నాయి. గత కొద్దిరోజులుగా స్వల్పంగా తగ్గుముఖం పట్టిన పసిడి ధర, అంతర్జాతీయ ఉద్రిక్తతల వల్ల ఒక్కసారిగా పుంజుకుంది. గ్రీన్‌లాండ్ విషయంలో అమెరికా అధ్యక్షుడు డొనాల్డ్ ట్రంప్ తన వైఖరిని మార్చుకుని, బలప్రయోగం ఉండదని ప్రకటించడంతో మార్కెట్లలో నిన్న లాభాల స్వీకరణ కనిపించింది. అయితే, ఈ ఊరట ఒక్కరోజుకే పరిమితమైంది. యుద్ధ మేఘాలు - సురక్షిత పెట్టుబడి: ఇరాన్ సరిహద్దుల్లో అమెరికా తన బలగాలను భారీగా మోహరించడంతో అంతర్జాతీయంగా యుద్ధ వాతావరణం నెలకొంది. ఇటువంటి అనిశ్చితి సమయాల్లో మదుపర్లు స్టాక్ మార్కెట్ల కంటే బంగారాన్ని సురక్షిత పెట్టుబడిగా భావిస్తారు. ఫలితంగా ప్రపంచవ్యాప్తంగా డిమాండ్ పెరిగి ధరలు ఎగబాకాయి.

మార్కెట్ తాజా ధరలు:

ఔన్సు బంగారం ధర ఏకంగా 5 వేల డాలర్ల మార్కుకు చేరువలో, ప్రస్తుతం 4,945 డాలర్ల వద్ద కొనసాగుతోంది. హైదరాబాద్ నగరంలో 10 గ్రాముల మేలిమి బంగారం (24 క్యారెట్లు) ధర రూ. 1,59,954 కు చేరింది. నిన్నటితో పోలిస్తే ఒక్కరోజే రూ. 5 వేల పెరుగుదల నమోదు కావడం గమనార్హం. 22 క్యారెట్లు: తులం బంగారం ధర రూ. 1.41 లక్షలుగా ఉంది. వెండి: అంతర్జాతీయంగా ఔన్సు వెండి 98 డాలర్ల వద్ద ఉండగా, హైదరాబాద్‌లో కిలో వెండి ధర రూ. 3.25 లక్షల వద్ద రికార్డు స్థాయిని తాకింది. రానున్న రోజుల్లో భౌగోళిక రాజకీయ పరిస్థితులను బట్టి ధరలు మరింత పెరిగే అవకాశం ఉందని మార్కెట్ విశ్లేషకులు అంచనా వేస్తున్నారు.