Postoffice : ఇక 24 గంటల్లోనే పార్శిల్‌ మీ ఇంటికి.. త్వరలో పోస్టాఫీస్ ఫాస్ట్ డెలివరీ సర్వీస్.
Postoffice : పోస్ట్ ఆఫీస్ ద్వారా పంపిన ముఖ్యమైన పత్రాలు లేదా పార్సిల్‌ల కోసం చాలా రోజులు ఎదురు చూస్తున్నారా? అయితే, ఇక ఆ నిరీక్షణకు స్వస్తి పలకవచ్చు. కేంద్ర మంత్రి జ్యోతిరాదిత్య సింధియా ఇటీవల ఒక ముఖ్యమైన ప్రకటన చేశారు. ఇండియా పోస్ట్ త్వరలో కొత్త ఫాస్ట్ డెలివరీ సర్వీసులను ప్రారంభించబోతోంది. ఈ కొత్త సేవలు జనవరి నెల నుండి అందుబాటులోకి వస్తాయని ఆయన తెలిపారు.
కేంద్ర మంత్రి జ్యోతిరాదిత్య సింధియా చెప్పిన వివరాల ప్రకారం, పోస్టాఫీసు రెండు రకాల కొత్త ఫాస్ట్ డెలివరీ సేవలను అందిస్తుంది.
* 24 గంటల స్పీడ్ పోస్ట్: ఈ సర్వీసు ద్వారా పంపిన ఏ డాక్యుమెంట్ లేదా పార్సిల్ అయినా ఒక రోజు (24 గంటలు) లోపే మీ ఇంటికి డెలివరీ అవుతుంది.
* 48 గంటల స్పీడ్ పోస్ట్: ఈ సేవలో పంపిన పార్సిల్ రెండు రోజుల (48 గంటలు) లోపు డెలివరీ అవుతుంది.
దీనివల్ల ప్రజలు తమ అవసరాన్ని బట్టి, వేగంగా లేదా కొంచెం తక్కువ వేగంగా డెలివరీని ఎంచుకోవచ్చు. ఈ సర్వీసులు వచ్చే జనవరి నుంచి అందుబాటులోకి వస్తాయి.
ప్రస్తుతం పోస్టాఫీసు ద్వారా పంపే పార్సిల్‌లు చేరడానికి 3 నుంచి 5 రోజులు పడుతుంది. అయితే, ఈ కొత్త సేవలు ప్రారంభమైన తర్వాత, మరుసటి రోజుకే పార్సిల్‌లను డెలివరీ చేసే సౌకర్యాన్ని పోస్టాఫీసు అందిస్తుంది. వ్యాపారం చేసే వారికి లేదా అత్యవసరంగా వస్తువులను పంపాలనుకునే వారికి ఇది చాలా ఉపయోగపడుతుంది. ఈ మార్పుల వల్ల పార్సిల్ డెలివరీ స్పీడు చాలా పెరుగుతుందని సింధియా తెలిపారు.
2029 నాటికి ఇండియా పోస్ట్ విభాగాన్ని కేవలం సేవలు అందించే సంస్థగా కాకుండా, లాభాలు ఆర్జించే సంస్థగా మార్చాలని ప్రభుత్వం లక్ష్యంగా పెట్టుకుంది. ఈ లక్ష్యాన్ని చేరుకోవడానికి, పోస్టాఫీసు అనేక కొత్త ఉత్పత్తులను, సేవలను ప్రారంభించాలని యోచిస్తోంది. ప్రజలకు మెరుగైన, వేగవంతమైన సేవలను అందించడమే దీని వెనుక ఉన్న ముఖ్యమైన ఉద్దేశ్యం.
కేంద్ర మంత్రి సింధియా చెప్పిన ప్రకారం.. పోస్టల్ విభాగం మొత్తం 8 కొత్త ఉత్పత్తులను ప్రారంభించనుంది. ఈ కొత్త ఉత్పత్తులలో పైన చెప్పిన స్పీడు డెలివరీ సర్వీసులు కూడా ఉన్నాయి. ఈ పథకాల వల్ల ప్రజలకు మంచి ప్రయోజనాలు కలగడమే కాకుండా, పోస్ట్ ఆఫీస్ సౌకర్యాలు, సర్వీసులు కూడా మెరుగుపడుతాయి. ఇది ఇండియా పోస్ట్ విభాగం ఆధునీకరణ దిశగా వేస్తున్న ఒక పెద్ద అడుగు.