Car Sales : మారుతికి గట్టి పోటీ.. టాటా నెక్సాన్ సంచలనం.. సెప్టెంబర్లో టాప్ 10 కార్ల అమ్మకాలు ఇవే.

Car Sales : పండుగల సీజన్, జీఎస్టీ తగ్గింపుల కారణంగా భారతీయ ఆటోమోటివ్ రంగం సెప్టెంబర్ 2025లో మంచి వృద్ధిని నమోదు చేసింది. గత ఏడాదితో పోలిస్తే మొత్తం అమ్మకాల్లో 5.5% స్వల్ప పెరుగుదల కనిపించింది. సెప్టెంబర్ 2025లో డీలర్లకు మొత్తం 3,78,457 యూనిట్ల వాహనాలను పంపగా, గతేడాది ఇదే నెలలో ఈ సంఖ్య 3,58,879గా ఉంది. అయితే, ఈ నెల అమ్మకాల్లో ఎప్పుడూ మొదటి స్థానంలో ఉండే మారుతి సుజుకికి గట్టి పోటీ ఇస్తూ టాటా నెక్సాన్ సంచలనం సృష్టించింది. ఏకంగా 22,573 యూనిట్ల అమ్మకాలతో, టాటా నెక్సాన్ సెప్టెంబర్ 2025లో భారతదేశంలో అత్యధికంగా అమ్ముడైన కారుగా నిలిచి రికార్డు సృష్టించింది.

టాటా నెక్సాన్ అమ్మకాలు ఈసారి అంచనాలకు మించి పెరిగాయి. గత ఏడాది సెప్టెంబర్‌లో కేవలం 11,470 యూనిట్లు మాత్రమే అమ్ముడుపోగా, ఈ ఏడాది ఏకంగా 97% పెరుగుదలతో 22,573 యూనిట్లు అమ్ముడయ్యాయి. ఇది టాటా ఈ అత్యంత ప్రజాదరణ పొందిన సబ్‌కాంపాక్ట్ ఎస్‌యూవీ చరిత్రలోనే అతి బెస్ట్ నెలవారీ అమ్మకాలుగా నమోదైంది. ఈ ఘనతతో నెక్సాన్ మార్కెట్‌లో మారుతి సుజుకికి గట్టి సవాల్ విసిరింది.

టాప్ 5లో ఇతర కార్ల ప్రదర్శన  టాటా నెక్సాన్ తర్వాత స్థానాల్లో నిలిచిన కార్లు కూడా మంచి వృద్ధిని చూపించాయి. మారుతి డిజైర్ 20,038 యూనిట్ల అమ్మకాలతో రెండో స్థానంలో నిలిచి భారీ పెరుగుదలను నమోదు చేసింది (గత సంవత్సరం 10,853 యూనిట్లు). హ్యుందాయ్ క్రెటా 18,861 యూనిట్ల అమ్మకాలతో మూడో స్థానాన్ని నిలబెట్టుకుంది. ఇది గత ఏడాదితో పోలిస్తే 19% వృద్ధిని సాధించింది. మహీంద్రా స్కార్పియో 18,372 యూనిట్లను అమ్మి 27% వృద్ధిని సాధించి నాలుగో స్థానానికి చేరుకుంది. టాటా నుండి మరో మోడల్ అయిన టాటా పంచ్ కూడా 15,891 యూనిట్ల అమ్మకాలతో 16% వృద్ధిని సాధించి టాప్ 5లో స్థానం దక్కించుకుంది.

టాప్ 10లో మారుతి హ్యాచ్‌బ్యాక్‌ల పరిస్థితి  టాప్ 10 జాబితాలో మిగిలిన స్థానాలను ఎక్కువగా మారుతి సుజుకి హ్యాచ్‌బ్యాక్ మోడళ్లు దక్కించుకున్నాయి.

ఆరవ స్థానం: మారుతి సుజుకి స్విఫ్ట్ హ్యాచ్‌బ్యాక్ 15,547 యూనిట్లతో నిలిచింది.

ఏడవ స్థానం: మారుతి సుజుకి వ్యాగన్ఆర్ హ్యాచ్‌బ్యాక్ 15,388 యూనిట్లతో నిలిచింది.

ఎనిమిదవ స్థానం: మారుతి ఫ్రాంక్స్ మొత్తం 13,767 యూనిట్లు అమ్మింది. అయితే, ఇది గత ఏడాదితో పోలిస్తే 1% స్వల్పంగా తగ్గింది.

తొమ్మిదవ స్థానం: మారుతి బాలెనో 13,173 యూనిట్లతో నిలిచింది.

పదవ స్థానం: మారుతి ఎర్టిగా ఎంపీవీ 12,115 యూనిట్లతో నిలిచింది. అయితే, ఎర్టిగా అమ్మకాలు గత ఏడాదితో పోలిస్తే 31% గణనీయంగా తగ్గాయి.

మొత్తంమీద, పండుగ సీజన్ ప్రారంభం భారతీయ ఆటోమొబైల్ రంగానికి మంచి ఉత్సాహాన్ని ఇచ్చింది, ముఖ్యంగా టాటా నెక్సాన్ ఊహించని విజయం మార్కెట్‌లో కొత్త పోటీని సృష్టించింది.