Triumph : ట్రయంఫ్ న్యూ బైక్ లాంచ్.. ప్రపంచ వ్యాప్తంగా కేవలం 1200యూనిట్లు మాత్రమే.

Triumph : బ్రిటిష్ మోటార్‌సైకిల్ తయారీ సంస్థ ట్రయంఫ్ భారతదేశంలో తన అత్యంత పవర్ఫుల్ అయిన స్పెషల్ మోడల్ రిలీజ్ చేసింది. అదే ట్రయంఫ్ స్పీడ్ ట్రిపుల్ 1200 ఆర్‌ఎక్స్. ప్రపంచవ్యాప్తంగా కేవలం 1,200 యూనిట్లు మాత్రమే విక్రయించబడే ఈ లిమిటెడ్ ఎడిషన్ బైక్ భారత మార్కెట్లో రూ.23.07 లక్షల (ఎక్స్-షోరూమ్) భారీ ధరతో లాంచ్ అయింది. స్టాండర్డ్ మోడల్ స్పీడ్ ట్రిపుల్ 1200 ఆర్‌ఎస్ ఆధారంగా రూపొందించారు. కొత్త టూ-టోన్ ఎల్లో, బ్లాక్ కలర్ స్కీమ్, పవర్ఫుల్ ఇంజిన్, అడ్వాన్సుడ్ సస్పెన్షన్ సిస్టమ్‌తో వస్తున్న ఈ బైక్ స్పెషాలిటీ ఏంటో తెలుసుకుందాం.

బ్రిటిష్ ప్రీమియం మోటార్‌సైకిల్ తయారీ సంస్థ ట్రయంఫ్, తమ అత్యంత అరుదైన మోడల్ స్పీడ్ ట్రిపుల్ 1200 ఆర్‌ఎక్స్ను భారత మార్కెట్లో విడుదల చేసింది. ఈ బైక్ ప్రపంచవ్యాప్తంగా కేవలం 1,200 యూనిట్లు మాత్రమే విక్రయించబడుతుంది. భారతీయ మార్కెట్లో దీని ఎక్స్-షోరూమ్ ధర రూ.23.07 లక్షలుగా నిర్ణయించబడింది. ఈ మోడల్ ప్రధానంగా స్టాండర్డ్ స్పీడ్ ట్రిపుల్ 1200 ఆర్‌ఎస్ మోడల్‌ను ఆధారంగా చేసుకుని రూపొందించబడింది. దీనికి ప్రత్యేకమైన టూ-టోన్ యెల్లో బ్లాక్ కలర్ స్కీమ్, ప్రత్యేక ఆర్‌ఎక్స్ గ్రాఫిక్స్ ఉన్నాయి. అలాగే, ఈ బైక్ కార్బన్ ఫైబర్, టైటానియంతో తయారు చేయబడిన ప్రత్యేకమైన అక్రాపోవిక్ ఎండ్ కాన్ ఎగ్జాస్ట్‌తో వస్తుంది.

లిమిటెడ్ ఎడిషన్ స్పీడ్ ట్రిపుల్ 1200 ఆర్‌ఎక్స్, స్టాండర్డ్ మోడల్ నుండి పవర్ఫుల్ ఇంజిన్‌ను తీసుకుంది. ఈ బైక్‌లో 1,163 సీసీ, ఇన్-లైన్-3, లిక్విడ్-కూల్డ్ ఇంజిన్ ఉంది. ఇది 6-స్పీడ్ గేర్‌బాక్స్‌తో వస్తుంది. ఈ ఇంజిన్ 10,750 ఆర్‌పిఎమ్ వద్ద 180 హెచ్‌పీ శక్తిని, 8,750 ఆర్‌పిఎమ్ వద్ద 128 ఎన్ఎమ్ టార్క్‌ను ఉత్పత్తి చేస్తుంది.

కాస్మెటిక్ మార్పులతో పాటు, ఈ ఆర్‌ఎక్స్ మోడల్‌లో రైడింగ్‌ను మెరుగుపరిచే కొన్ని హార్డ్‌వేర్ మార్పులు కూడా చేశారు. ఈ బైక్‌లో ఓహ్లిన్స్ స్మార్ట్ ఈసీ 3.0 యాక్టివ్ సస్పెన్షన్ సిస్టమ్ ఉంది. ఇది మెరుగైన హ్యాండ్లింగ్ కోసం ఓహ్లిన్స్ ఎస్డీ ఈసీ స్టీరింగ్ డంపర్‌తో పాటు వస్తుంది. బ్రేకింగ్ పనితీరును మెరుగుపరచడానికి, ముందు భాగంలో ట్విన్-డిస్క్‌లతో పాటు బ్రెమ్బో స్టైల్మా కాలిపర్స్, బ్రెమ్బో ఎంసీఎస్ రేడియల్ మాస్టర్ సిలిండర్ ఉపయోగించారు. ట్రయంఫ్ కంపెనీ ప్రపంచవ్యాప్తంగా కేవలం 1,200 యూనిట్ల స్పీడ్ ట్రిపుల్ 1200 ఆర్‌ఎక్స్ మోటార్‌సైకిళ్లను మాత్రమే విక్రయిస్తామని ప్రకటించింది. అయితే ఈ 1,200 యూనిట్లలో భారతదేశ మార్కెట్‌కు ఎన్ని యూనిట్లు కేటాయిస్తారనే విషయాన్ని కంపెనీ ఇంకా స్పష్టం చేయలేదు.