Maruti Baleno : సేఫ్టీలో మెరుగైన మారుతి బలెనో..6 ఎయిర్‌బ్యాగులతో క్రాష్ టెస్ట్‌లో రేటింగ్ ఎంత వచ్చిందంటే ?

Maruti Baleno : భారతదేశంలో తయారైన మారుతి సుజుకి బలెనో కొత్తగా అప్‌డేట్ చేసిన సేఫ్టీ ఫీచర్లతో లాటిన్ ఎన్‌సీఏపీ క్రాష్ టెస్ట్‌లో మెరుగైన ప్రదర్శన చేసింది. 2025 సంవత్సరానికి సంబంధించిన చివరి క్రాష్ టెస్ట్ ఫలితాల్లో అప్‌డేట్ చేయబడిన బలెనోకు 2-స్టార్ రేటింగ్ లభించింది. గతంలో కేవలం రెండు ఎయిర్‌బ్యాగులు ఉన్న బలెనో మోడల్‌కు 1-స్టార్ రేటింగ్ మాత్రమే వచ్చింది. దీనికి ప్రతిస్పందనగా సుజుకి కంపెనీ కారులో సైడ్ బాడీ, సైడ్ కర్టెన్ ఎయిర్‌బ్యాగులను స్టాండర్డ్‌గా అందించడం ద్వారా సేఫ్టీ ఫీచర్లను మెరుగుపరిచింది. ఇప్పుడు మొత్తం 6 ఎయిర్‌బ్యాగులు స్టాండర్డ్‌గా ఉండటం వల్ల, అప్‌డేట్ చేసిన బలెనో క్రాష్ టెస్ట్ ఫలితాలు మెరుగయ్యాయి.

లాటిన్ ఎన్‌సీఏపీ టెస్ట్‌లో అప్‌డేట్ చేసిన బలెనో వివిధ విభాగాల్లో సాధించిన మార్కులు, రేటింగ్‌లు ఇలా ఉన్నాయి. పెద్దవారి భద్రతలో 35 మార్కులకు గాను 31.75 మార్కులు సాధించింది, ఇది 79.38% రేటింగ్‌ను సూచిస్తుంది. పిల్లల భద్రతలో 49 మార్కులకు గాను 32.08 మార్కులు సాధించింది, అంటే 65.46% రేటింగ్ లభించింది. పాదచారుల భద్రతలో 36 మార్కులకు 23.17 మార్కులు వచ్చాయి, ఇది 48.28% రేటింగ్. సేఫ్టీ అసిస్ట్ 25 మార్కులకు 14.53 మార్కులు లభించాయి, అంటే 58.14% రేటింగ్ లభించింది. కారు పనితీరును ఫ్రంటల్ ఇంపాక్ట్, సైడ్ ఇంపాక్ట్, సైడ్ పోల్ ఇంపాక్ట్, విప్లాష్, ఎలక్ట్రానిక్ స్టెబిలిటీ కంట్రోల్ (ESC) వంటి వివిధ టెస్టుల ద్వారా అంచనా వేశారు.

ఈ అప్‌డేట్ తర్వాత బలెనో ప్రయాణికుల భద్రతలో స్పష్టంగా మెరుగైన పనితీరు చూపింది. దీనికి ప్రధాన కారణం స్టాండర్డ్ సైడ్ బాడీ, కర్టెన్ ఎయిర్‌బ్యాగులు చేర్చడం. ఈ ఎయిర్‌బ్యాగుల కారణంగా సైడ్ ఢీకొన్న సందర్భాలలో తల భద్రత మెరుగుపడింది. అలాగే సైడ్ క్రాష్‌లో ఛాతీ రక్షణ కూడా మునుపటి కంటే మెరుగైన స్థాయికి చేరింది.

మంచి అంశాలు: ఫ్రంటల్ ఢీకొన్నప్పుడు కారు నిర్మాణం, ఫుట్‌వెల్ స్థిరంగా ఉన్నాయని, డ్రైవర్, ముందు ప్రయాణికుడికి సమాన భద్రత లభించిందని టెస్ట్ నివేదిక తెలిపింది. ఐసోఫిక్స్ మౌంట్‌లతో వెనుక సీటులో అమర్చిన చైల్డ్ సీట్లు పిల్లలకు మంచి భద్రతను అందించాయి.

లోపాలు: పాదచారుల భద్రత ఫలితాల్లో పెద్దగా మార్పు కనిపించలేదు. తలకు కలిగే గాయాల నుంచి రక్షణ సగటు కంటే తక్కువగా ఉంది, అలాగే ఎగువ కాళ్ల రక్షణ బలహీనంగా ఉన్నట్లు గుర్తించారు. మొత్తంమీద సైడ్-ఇంపాక్ట్ భద్రతలో బలెనో మెరుగుపడినప్పటికీ, ADAS ఫీచర్లు, పాదచారుల రక్షణకు సంబంధించిన లోపాలు ఇప్పటికీ ఉన్నాయని నివేదిక పేర్కొంది.