'మంజుమ్మెల్ బాయ్స్' టీమ్‌కి ఇళయరాజా లీగల్ నోటీసు..

కాపీరైట్ ఉల్లంఘనపై 'మంజుమ్మెల్ బాయ్స్' నిర్మాతలు సౌబిన్ షాహిర్, బాబు షాహిర్ మరియు షాన్ ఆంటోనీలకు మ్యూజిక్ మాస్ట్రో మరియు రాజ్యసభ ఎంపీ ఇళయరాజా లీగల్ నోటీసు జారీ చేశారు. కమల్ హాసన్ 'గుణ'లోని ఇళయరాజా ఐకానిక్ 'కణ్మణి అన్బోడు' పాటను సినిమాలోని కీలకమైన సమయంలో టీమ్ అనధికారికంగా ఉపయోగించిందని అతని న్యాయ బృందం ఆరోపించింది.

చిదంబరం దర్శకత్వం వహించిన ఈ మలయాళ చిత్రం క్లైమాక్స్‌లో గుణ సినిమాలోని పాటను ఉపయోగించుకున్నందుకు చిత్ర బృందానికి లీగల్ నోటీసులు జారీ చేయవలసి వచ్చింది. పాటను వాడుకుంటున్నట్లు ముందుగా ఇళయరాజా టీమ్ కు తెలియజేసినట్లైతే ఈ చిక్కులు తప్పేవి. దాంతో ఇళయరాజా కాపీరైట్ ఉల్లంఘనను క్లెయిమ్ చేసారు.

'మంజుమ్మెల్ బాయ్స్' తమిళనాడులోని కొడైకెనాల్‌లోని గుణ గుహలలో పడిపోయిన స్నేహితుల బృందం తమలో ఒకరిని రక్షించడం గురించి నిజ జీవితంలో జరిగిన సంఘటన ఆధారంగా రూపొందించిన చిత్రం.

'కణ్మణి అన్బోడు కాదలన్' పాట సినిమాలో కీలకమైన పాయింట్‌లో వస్తుంది. 1990లో కమల్ హాసన్ 'గుణ' చిత్రీకరణ జరిగిన తర్వాత కొడైకెనాల్‌లోని గుణ గుహలకు ఆ పేరు వచ్చింది. మలయాళ చిత్రం 'మంజుమ్మెల్ బాయ్స్' తమిళ, తెలుగు ప్రేక్షకులను ఆకట్టుకుంది. ఈ చిత్రం బాక్సాఫీస్ వద్ద బ్లాక్‌బస్టర్‌గా నిలిచింది.

'మంజుమ్మెల్ బాయ్స్' అన్ని వర్గాల నుండి విమర్శకుల ప్రశంసలతో పాటు ప్రపంచవ్యాప్తంగా బాక్సాఫీస్ వద్ద రూ. 200 కోట్లకు పైగా వసూలు చేసింది. ఇంతకుముందు, రజనీకాంత్ నటించిన 'కూలీ' ప్రోమో విడుదలైన తర్వాత ఇళయరాజా తన పాటలలో ఒకదానిపై సన్ పిక్చర్స్‌కు నోటీసు జారీ చేశారు.