నటి శ్రీదేవి, రజనీకాంత్‌, సన్నీ దేవోల్‌ నటించిన క్లాసిక్ సినిమా 'చాల్‌బాజ్‌' రీమేక్‌కు సంబంధించి బాలీవుడ్‌లో మళ్ళీ చర్చ మొదలైంది. ఈ సినిమాలో ప్రధాన పాత్రలో శ్రీదేవి కుమార్తె జాన్వీ కపూర్ నటించనున్నట్లు వార్తలు వస్తున్నాయి. అయితే దీనిపై అధికారిక ప్రకటన ఇంకా వెలువడలేదు. ప్రముఖ బాలీవుడ్ నిర్మాణ సంస్థ ఈ రీమేక్‌లో నటించమని జాన్వీ కపూర్‌ను సంప్రదించింది. జాన్వీ కూడా ఈ ప్రాజెక్ట్‌పై ఆసక్తి చూపినట్లు తెలుస్తోంది. తన తల్లి పోషించిన అద్భుతమైన పాత్రను రీమేక్‌లో చేయడంపై జాన్వీ కొంత ఆలోచనలో ఉన్నట్లు సమాచారం. ఈ పాత్రను పోషించడం వల్ల తనపై పోలికలు, ఒత్తిడి పెరుగుతాయని భావిస్తున్నట్లు వార్తలు వస్తున్నాయి. అందువల్ల, తుది నిర్ణయం తీసుకునే ముందు ఆమె సన్నిహితుల సలహాలు తీసుకుంటున్నారని చెబుతున్నారు. గతంలో కూడా 'చాల్‌బాజ్‌'ను 'చాల్‌బాజ్‌ ఇన్ లండన్' పేరుతో రీమేక్ చేయడానికి ప్రయత్నాలు జరిగాయి. ఆ సమయంలో శ్రద్ధా కపూర్‌ను ప్రధాన పాత్రగా ప్రకటించారు. కానీ కొన్ని కారణాల వల్ల ఆ ప్రాజెక్ట్ నిలిచిపోయింది. జాన్వీ కపూర్ ఈ నెల (సెప్టెంబర్) చివరిలోగా ఈ సినిమాపై తుది నిర్ణయం తీసుకునే అవకాశం ఉందని బాలీవుడ్ వర్గాలు చెబుతున్నాయి. 'చాల్‌బాజ్‌' సినిమాలో శ్రీదేవి పోషించిన డబుల్‌ రోల్‌ (అంజు, మంజు) ప్రేక్షకులను విశేషంగా ఆకట్టుకుంది. ఈ పాత్రకు గాను ఆమెకు ఉత్తమ నటిగా ఫిలింఫేర్ అవార్డు కూడా లభించింది. ఇప్పుడు ఆ పాత్రను జాన్వీ కపూర్ పోషిస్తే, ఆమె ఎలా ఉంటుందని అభిమానులు ఆసక్తిగా ఎదురుచూస్తున్నారు.