EPFO Rules : పీఎఫ్ డబ్బులు డ్రా చేస్తున్నారా? ఇప్పుడే ఈ నిజం తెలుసుకోండి!

EPFO Rules : ప్రైవేట్ రంగంలో ఉద్యోగం చేసే ప్రతి ఒక్కరికీ తమ భవిష్యత్తుపై ఉండే అతిపెద్ద ధీమా పీఎఫ్. ప్రతినెలా జీతం నుంచి కట్ అయ్యే ఈ సొమ్ము కేవలం ఒక పొదుపు మాత్రమే కాదు, రిటైర్మెంట్ తర్వాత గౌరవంగా బతకడానికి అవసరమైన పెన్షన్‌కు ఇది ఒక భరోసా. అయితే నేటి రోజుల్లో మెరుగైన అవకాశాల కోసం యువత త్వరత్వరగా ఉద్యోగాలు మారుస్తున్నారు. ఈ క్రమంలో పాత కంపెనీకి సంబంధించిన పీఎఫ్ డబ్బులను విత్ డ్రా చేసేస్తుంటారు. ఇక్కడే చాలామందికి ఒక సందేహం వస్తుంది.. ఒకవేళ 10 ఏళ్ల సర్వీస్ పూర్తికాకముందే పీఎఫ్ ఖాతాలో ఉన్న డబ్బులు డ్రా చేస్తే, భవిష్యత్తులో పెన్షన్ వస్తుందా? రాదా? దీనికి సంబంధించిన అసలు నిబంధనలేంటో ఇప్పుడు క్లియర్ గా తెలుసుకుందాం.

మొదట మనం పీఎఫ్, పెన్షన్ మధ్య ఉన్న తేడాను గమనించాలి. చాలామంది ఈ రెండూ ఒకటి అనుకుంటారు, కానీ ఇవి వేర్వేరు. మీ శాలరీ నుంచి కట్ అయ్యే మొత్తం సొమ్ము ఈపీఎఫ్ ఖాతాలోకి వెళ్తుంది. కానీ మీ యాజమాన్యం ఇచ్చే వాటాలో రెండు భాగాలు ఉంటాయి. అందులో ఒక చిన్న భాగం పీఎఫ్ ఖాతాలోకి వెళ్లగా, మెజారిటీ భాగం ఎంప్లాయీ పెన్షన్ స్కీమ్‎లోకి చేరుతుంది. మీ వృద్ధాప్యంలో మీకు వచ్చే నెలవారీ పెన్షన్‌కు ఇదే పునాది.

ఈపీఎఫ్ఓ నిబంధనల ప్రకారం.. ఒక ఉద్యోగి రిటైర్మెంట్ తర్వాత నెలవారీ పెన్షన్ పొందాలంటే కనీసం 10 ఏళ్ల పాటు సర్వీస్ పూర్తి చేసి ఉండాలి. అంటే 10 ఏళ్ల పాటు పెన్షన్ స్కీమ్‌లోకి మీ వాటా జమ కావాలి. ఇది ఒకే కంపెనీలో అవ్వాల్సిన పనిలేదు, వేర్వేరు కంపెనీల్లో చేసినా ఆ కాలాన్ని కలిపి లెక్కిస్తారు. ఒకవేళ మీరు 10 ఏళ్ల సర్వీస్ కంటే ముందే ఉద్యోగం మానేసి, ఖాతాలో ఉన్న డబ్బులను సెటిల్ చేసుకుంటే మీరు భవిష్యత్తులో పెన్షన్ పొందే అర్హతను కోల్పోతారు. ఎందుకంటే మీరు డబ్బును డ్రా చేసినప్పుడు, పెన్షన్ ఫండ్‌లో ఉన్న మొత్తాన్ని కూడా ఫుల్ అండ్ ఫైనల్ సెటిల్మెంట్ కింద తీసేసుకుంటారు. దీనివల్ల ఆ సర్వీస్ పీరియడ్ లెక్కలోకి రాదు.

ఇక్కడ మనం ఫామ్ 10C, ఫామ్ 10D ల మధ్య తేడాను తెలుసుకోవాలి. మీరు 10 ఏళ్ల కంటే తక్కువ సర్వీస్ చేసి ఉండి, ఇక పీఎఫ్ పరిధిలోకి వచ్చే ఉద్యోగం చేయకూడదని భావిస్తే ఫామ్ 10C ద్వారా పెన్షన్ డబ్బులను విత్‌డ్రా చేసుకోవచ్చు. దీనివల్ల మీకు ఒక్కసారిగా డబ్బు చేతికి వస్తుంది కానీ, పెన్షన్ దారి మూసుకుపోతుంది. ఒకవేళ మీరు 10 ఏళ్లకు పైగా సర్వీస్ పూర్తి చేసి ఉంటే, మీరు పెన్షన్ డబ్బులను తీయలేరు. అప్పుడు మీకు పెన్షన్ సర్టిఫికేట్ ఇస్తారు. మీకు 58 ఏళ్లు నిండిన తర్వాత ఫామ్ 10D ద్వారా నెలవారీ పెన్షన్ కోసం దరఖాస్తు చేసుకోవచ్చు. కాబట్టి పెన్షన్ కావాలనుకునే వారు ఉద్యోగం మారినప్పుడల్లా పీఎఫ్ డబ్బులు తీసేయకుండా, ఖాతాను ట్రాన్స్‌ఫర్ చేసుకోవడం ఉత్తమ మార్గం.