Tax Collection : కేంద్రానికి పన్నుల పంట..రూ.19.43లక్షల కోట్లతో కళకళలాడుతున్న ఖజానా.

Tax Collection : కేంద్ర ప్రభుత్వ ఖజానాకు పన్నుల రూపంలో భారీగా ఆదాయం వచ్చి చేరింది. ప్రస్తుత ఆర్థిక సంవత్సరం 2025-26లో డైరెక్ట్ టాక్స్ కలెక్షన్లు అంచనాలకు మించి దూసుకుపోతున్నాయి. ఫిబ్రవరి 10వ తేదీ నాటి గణాంకాల ప్రకారం, నికర ప్రత్యక్ష పన్ను వసూళ్లు 9.4 శాతం వృద్ధితో రూ. 19.43 లక్షల కోట్లకు చేరుకున్నాయి. దేశ ఆర్థిక వ్యవస్థలో నిలకడ, పన్ను చెల్లింపుదారుల సంఖ్య పెరగడం వల్లే ఈ స్థాయిలో ఆదాయం వచ్చిందని ఆర్థిక నిపుణులు విశ్లేషిస్తున్నారు.

ఆదాయపు పన్ను శాఖ విడుదల చేసిన వివరాల ప్రకారం.. ఏప్రిల్ 1 నుంచి ఫిబ్రవరి 10 మధ్య కాలంలో మొత్తం రూ.22.8 లక్షల కోట్ల గ్రాస్ డైరెక్ట్ టాక్స్ కలెక్షన్లు నమోదయ్యాయి. గతేడాది ఇదే సమయంతో పోలిస్తే ఇది 4.1 శాతం ఎక్కువ. ఇందులో ప్రధానంగా కార్పొరేట్ పన్నులు, వ్యక్తిగత ఆదాయపు పన్ను వాటా ఎక్కువగా ఉంది. కంపెనీలు భారీ లాభాలను ఆర్జించడం, అలాగే ఐటీ రిటర్న్స్ ఫైలింగ్ ప్రక్రియ డిజిటల్ కావడంతో పన్ను చెల్లింపులు మరింత సులభతరం అయ్యాయి.

పన్ను చెల్లింపుదారులకు కూడా ప్రభుత్వం తీపి కబురు అందించింది. గత 10 నెలల కాలంలో సుమారు రూ.3.3 లక్షల కోట్ల మొత్తాన్ని రీఫండ్‌ల రూపంలో వెనక్కి ఇచ్చింది. రీఫండ్‌లు పోను మిగిలిన మొత్తాన్నే నికర పన్ను వసూళ్లుగా పరిగణిస్తారు. రీఫండ్‌ల ప్రక్రియ వేగవంతం కావడం వల్ల పన్ను చెల్లింపుదారుల్లో నమ్మకం పెరగడమే కాకుండా, సిస్టమ్ మరింత పారదర్శకంగా మారుతోందని నిపుణులు అంటున్నారు. కేవలం జీతగాళ్ల పన్నులే కాకుండా, వ్యాపార సంస్థల నుంచి వచ్చే కార్పొరేట్ టాక్స్ కూడా ఈసారి ఆకట్టుకుంది.

ప్రభుత్వం పెట్టుకున్న బడ్జెట్ లక్ష్యాలను చేరుకోవడానికి ఈ పన్ను వసూళ్లు పెద్ద బూస్ట్‌గా నిలవనున్నాయి. ద్రవ్యలోటు నియంత్రణలో ఉండటానికి ఈ భారీ ఆదాయం ఉపయోగపడుతుంది. పెరిగిన డైరెక్ట్ టాక్స్ కలెక్షన్లు దేశంలో ఉద్యోగ అవకాశాలు, వ్యాపార లావాదేవీలు, ప్రజల ఆదాయ మార్గాలు మెరుగ్గా ఉన్నాయని సూచిస్తున్నాయి. దేశవ్యాప్తంగా సామాన్యుల నుంచి వ్యాపారవేత్తల వరకు అందరూ పన్ను నిబంధనలకు కట్టుబడి ఉండటం ప్రభుత్వానికి కలిసి వచ్చే అంశం.