BIHAR: బిహార్ రాజకీయాలపై చెరగని ముద్ర వేసిన కర్పూరీ ఠాకుర్‌
ఎన్నికల బరిలో కర్పూరీ ఠాకూర్ మనవరాలు
బిహార్ రాజకీయాల్లో కుల సమీకరణాలు కీలక పాత్ర పోషించే నేటికీ, కొన్ని దశాబ్దాల క్రితమే ఈ పరిస్థితిని మార్చేందుకు పోరాడిన భారతరత్న కర్పూరీ ఠాకుర్‌ మళ్లీ వార్తల్లో నిలిచారు. తాజాగా ఆయన మనవరాలు ఎన్నికల బరిలో దిగడంతో, ఆయన స్వగ్రామం 'కర్పూరీ గ్రామ్‌' పై అందరి దృష్టి పడింది. కర్పూరీ ఠాకుర్‌ (1924-1988) తన గ్రామంలో కుల వివక్షకు వ్యతిరేకంగా పోరాడారు. నిమ్న వర్గాలను రాజకీయంగా చైతన్యపరిచారు. క్షురకుడి కుమారుడిగా పుట్టి, ఉపాధ్యాయుడిగా పనిచేసిన ఆయన, చదువు ద్వారా వివక్షను ధైర్యంగా ఎదుర్కోగలమని ప్రబోధించారు.
సాదాసీదా జీవితం, చారిత్రక సంస్కరణలు:
రెండుసార్లు బిహార్ ముఖ్యమంత్రిగా పనిచేసినా, కర్పూరీ ఠాకుర్‌ జీవితాంతం పూరి గుడిసెలోనే గడిపారు. ఆయన మరణానంతరం, ఈ నిరాడంబరతను చూసి పలువురు నేతలు దిగ్భ్రాంతి చెందారు. ఇటీవల, ప్రధాని మోదీ సైతం ఈ విషయాన్ని ప్రస్తావించారు. దేశంలో తొలిసారిగా ఓబీసీ, ఈబీసీ, మహిళలకు రిజర్వేషన్‌ కోటాలను అమలు చేసి, చారిత్రక సంస్కరణలకు శ్రీకారం చుట్టిన ఘనత ఆయనకే దక్కుతుంది. ఈయన మరణించిన 36 ఏళ్ల తర్వాత 2024లో కేంద్ర ప్రభుత్వం ఆయనకు భారతరత్న ప్రకటించింది.
రాజకీయ వారసత్వం-అభివృద్ధి లేమి:
కర్పూరీ పెద్ద కుమారుడు రామ్‌నాథ్‌ ఠాకుర్‌ (75) ప్రస్తుతం జేడీయూ నుంచి రాజ్యసభ సభ్యుడిగా, కేంద్ర వ్యవసాయ శాఖ సహాయ మంత్రిగా ఉన్నారు. చిన్న కుమారుడి కుమార్తె జాగృతి ఠాకుర్‌, ఈ ఎన్నికల్లో జన సురాజ్‌ పార్టీ తరపున మోర్బా అసెంబ్లీ స్థానం నుంచి పోటీ చేస్తున్నారు. తాత ఆశయాలను నెరవేరుస్తానని ఆమె చెబుతున్నారు. అయితే, ముఖ్యమంత్రిని అందించిన కర్పూరీ గ్రామ్‌తో సహా సమస్తిపుర్‌ ప్రాంతం తీవ్రమైన అభివృద్ధి లేమితో కొట్టుమిట్టాడుతోంది. నిరుద్యోగం, దారుణంగా ఉన్న రోడ్లు, బురదతో కూడిన ఇరుకు రహదారులు ఇక్కడి ప్రధాన సమస్యలు. చదువుకున్న యువకులు ఉపాధి కోసం ఇతర రాష్ట్రాలకు వెళ్లాల్సిన పరిస్థితి ఉంది. ‘ఈసారి స్థానికంగా ఉపాధి కల్పించేవారికే ఓటేస్తాం’ అని స్థానికులు స్పష్టం చేస్తుండగా, కర్పూరీ ఠాకుర్‌ ఆశయాలకు అనుగుణంగా ఈ ప్రాంతం అభివృద్ధి చెందుతుందా లేదా అనేది ఎన్నికల తర్వాత తేలాల్సి ఉంది.