Maharashtra: స్కూల్ బాత్రూంలో రక్తపు మరకలు.. ప్రిన్సిపాల్, ప్యూన్ ఏం చేసారంటే !
పాఠశాలలోని విద్యార్థుల బట్టలు విప్పి తనఖీ చేయించిన ప్రిన్సిపాల్..;
మహారాష్ట్ర లోని ఠాణె జిల్లాలో అమానవీయ ఘటన చోటుచేసుకుంది. పాఠశాల బాత్రూమ్‌లో రక్తపు మరకలు కన్పించడంతో వాటికి కారణమైన వారిని తెలుసుకునేందుకు యాజమాన్యం దారుణంగా ప్రవర్తించింది. బాలికలందరినీ (School Girls) లైన్‌లో నిలబెట్టి.. వారి వ్యక్తిగత అవయవాలను టచ్‌ చేస్తూ పీరియడ్స్‌లో ఉన్నారో, లేదో చెక్ చేయించారు. మంగళవారం జరిగిన ఈ ఘటన ఆలస్యంగా వెలుగులోకి వచ్చింది. వివరాల్లోకి వెళితే..
ఠాణెలోని ఓ ప్రైవేటు స్కూల్‌లో టాయిలెట్‌ను శుభ్రం చేస్తుండగా.. నెలసరి రక్తపు మరకలు కన్పించాయి. దీంతో అక్కడ పనిచేసే సిబ్బంది వాటిని ఫొటోలు తీసి స్కూల్ ప్రిన్సిపల్‌కు పంపించారు. ఆగ్రహం వ్యక్తం చేసిన ఆ ప్రిన్సిపల్‌.. పాఠశాలలో 5 నుంచి 10వ తరగతి చదువుతున్న బాలికలందరినీ కన్వెన్షన్‌ హాల్‌కు పిలిపించారు. వారికి ఆ ఫొటోలు చూపించి.. పీరియడ్స్‌లో ఉన్నవారు, లేనివారు రెండు గ్రూప్‌లుగా విడిపోవాలని చెప్పారు.
చెప్పినట్లుగానే నెలసరిలో ఉన్నవారంతా ఒకవైపు, లేనివారంతా మరోవైపు నిలబడ్డారు. అప్పటికీ నమ్మని ఆ ప్రిన్సిపల్‌.. మహిళా అటెండెంట్‌ను పిలిపించి పీరియడ్స్‌లో లేమని చెప్పిన విద్యార్థులను చెక్ చేయించారు. ఆ మహిళ వారందరినీ వాష్‌రూమ్‌లోకి తీసుకెళ్లి బాలికల వ్యక్తిగత అవయవాలను చెక్ చేసి నెలసరిలో ఉన్నారో, లేరో నిర్దరించారు.
ఇంటికెళ్లిన తర్వాత ఆ బాలికలు విషయాన్ని తమ తల్లిదండ్రులకు చెప్పడంతో వారు తీవ్ర ఆగ్రహం వ్యక్తంచేశారు. స్కూల్ ముందు నిరసన చేపట్టారు. బుధవారం దీనిపై ఫిర్యాదు చేయగా.. కేసు నమోదు చేసుకున్న పోలీసులు ప్రిన్సిపల్‌, ప్యూన్, నలుగురు టీచర్లు, ఇద్దరు ట్రస్టీలు.. మొత్తం 8 మందిపై కేసు నమోదు చేశారు. ఇప్పటివరకు ప్రిన్సిపల్‌, ప్యూన్‌ను అరెస్టు చేయగా, మిగతా వారిని విచారిస్తున్నారు. దీనిపై దర్యాప్తు కొనసాగుతోందని పోలీసులు వెల్లడించారు.