PM Kisan : కౌలు రైతులకు పీఎం కిసాన్ నిధులు అందుతాయా? కేంద్రం నిబంధనలు ఏం చెబుతున్నాయి?

PM Kisan : దేశవ్యాప్తంగా ఉన్న కోట్లాది మంది రైతులు ఇప్పుడు పీఎం కిసాన్ సమ్మాన్ నిధి 22వ విడత నిధుల కోసం కళ్లు కాయలు కాచేలా ఎదురుచూస్తున్నారు. సాగు పెట్టుబడి కోసం కేంద్ర ప్రభుత్వం ఇచ్చే ఈ సాయం చిన్న, సన్నకారు రైతులకు పెద్ద ఊరటనిస్తోంది. అయితే, ఈ సమయంలో ఒక ముఖ్యమైన ప్రశ్న చాలా మందిని తొలిచేస్తోంది. సొంత భూమి లేకపోయినా, వేరే వాళ్ల పొలాన్ని కౌలుకు తీసుకుని సాగు చేసే రైతులకు కూడా ఈ డబ్బులు అందుతాయా? దీనిపై ప్రభుత్వ నిబంధనలు ఏం చెబుతున్నాయో తెలుసుకుందాం.

భారతీయ వ్యవసాయ రంగంలో కౌలు రైతుల పాత్ర చాలా కీలకం. సొంతంగా భూమి లేకపోయినా, ఇతరుల పొలాలను కౌలుకు తీసుకుని రాత్రింబగళ్లు శ్రమిస్తూ దేశానికి అన్నం పెడుతున్నారు. వీరిని కొన్ని ప్రాంతాల్లో బటాయిదార్లు అని కూడా పిలుస్తారు. అంటే పండిన పంటలో కొంత భాగం భూ యజమానికి ఇచ్చి, మిగిలినది వీరు ఉంచుకుంటారు. పీఎం కిసాన్ 22వ విడతకు సమయం దగ్గరపడుతుండటంతో, తమలాంటి కౌలు రైతులకు కూడా ఈ పథకం వర్తిస్తుందా అని చాలా మంది ఆశగా ఎదురుచూస్తున్నారు. అయితే, కేంద్ర ప్రభుత్వ నిబంధనల ప్రకారం దీనికి సమాధానం లేదు అనే చెప్పాలి.

పీఎం కిసాన్ పథకం పూర్తిగా భూ యాజమాన్యం ఆధారంగా రూపొందించబడింది. రెవెన్యూ రికార్డుల ప్రకారం సాగు భూమి ఎవరి పేరు మీదైతే నమోదు చేయబడి ఉంటుందో, వారు మాత్రమే ఈ పథకానికి అర్హులు. మీరు ఎంత కష్టపడి వేరే వాళ్ల భూమిలో పంటలు పండించినా, కాగితాల్లో మీ పేరు లేకపోతే ప్రభుత్వ రికార్డుల ప్రకారం మీరు లబ్ధిదారులు కాలేరు. కాబట్టి, కౌలు రైతులు ఈ పథకం కింద రూ.6000ల వార్షిక సాయాన్ని పొందే అవకాశం ప్రస్తుతానికి లేదు. కేవలం పట్టాదారు పాస్ బుక్ కలిగి ఉండి, భూమి తన పేరు మీద ఉన్న రైతులకు మాత్రమే ఈ నిధులు నేరుగా వారి బ్యాంకు ఖాతాల్లో జమ అవుతాయి.

ఇక రైతులందరూ ఆసక్తిగా ఎదురుచూస్తున్న 22వ విడత నిధుల విడుదల ఎప్పుడనే విషయానికి వస్తే, ఫిబ్రవరి 1న కేంద్ర బడ్జెట్ 2026 ప్రవేశపెట్టనున్నారు. ఈ నేపథ్యంలో బడ్జెట్ సమావేశాల తర్వాతే పీఎం కిసాన్ నిధులు విడుదలయ్యే అవకాశం ఉందని విశ్లేషకులు భావిస్తున్నారు. సాధారణంగా ఫిబ్రవరి చివరలో లేదా మార్చి మొదటి వారంలో ఈ నిధులు రైతుల ఖాతాల్లోకి చేరవచ్చు. ఇది ప్రస్తుత ఆర్థిక సంవత్సరం (2025-26) లో చివరి విడత కానుంది. అందుకే అర్హులైన రైతులు తమ ఈ-కేవైసీ, భూ ధృవీకరణ పనులను త్వరగా పూర్తి చేసుకోవాలని అధికారులు సూచిస్తున్నారు.

సోషల్ మీడియాలో వచ్చే తప్పుడు వార్తలను నమ్మి రైతులు మోసపోవద్దని నిపుణులు హెచ్చరిస్తున్నారు. కొందరు నిబంధనలు మారాయని, కౌలు రైతులకు కూడా డబ్బులు వస్తున్నాయని ప్రచారం చేస్తున్నారు, కానీ అధికారికంగా కేంద్రం అలాంటి ప్రకటన ఏదీ చేయలేదు. పథకంలో మార్పులు జరిగితే కేవలం అధికారిక వెబ్‌సైట్ ద్వారానే సమాచారం అందుతుంది. కాబట్టి అర్హులైన రైతులు తమ బ్యాంకు ఖాతాకు ఆధార్ లింక్ అయి ఉందో లేదో సరిచూసుకోవాలి. డిజిటల్ సంతకం లేదా ఈ-కేవైసీ పెండింగ్‌లో ఉంటే వెంటనే పూర్తి చేసుకుంటేనే, బడ్జెట్ తర్వాత వచ్చే 22వ విడత నిధులు ఎటువంటి ఆటంకం లేకుండా నేరుగా మీ జేబులోకి చేరుతాయి.