ICC RANKINGS: ఐసీసీ టీ 20 ర్యాంకులు.. అగ్రస్థానాలన్నీ మనవే
ఐసీసీ టీ 20 ర్యాంకింగ్‌ విడుదల... బౌలర్లలో టాప్‌లో వరుణ్ చక్రవర్తి... బ్యాటింగ్‌లో అగ్రస్థానంలో అభిషేక్ శర్మ
ఆసియా కప్‌లో వరుసగా రెండు మ్యాచుల్లో దుమ్మురేపిన టీమ్‌ఇండియా... ఐసీసీ ర్యాంకుల్లోనూ దుమ్ము దులిపింది. టీ20 బ్యాటింగ్‌లో అభిషేక్ శర్మ, ఆల్‌రౌండర్ల జాబితాలో హార్దిక్ పాండ్య అగ్రస్థానంలో ఉండగా... తాజాగా ఇప్పుడు బౌలింగ్‌లోనూ టాప్‌ ర్యాంక్‌ భారత క్రికెటర్‌కే దక్కింది. తాజాగా ఐసీసీ ర్యాంకులను ప్రకటించింది. ఈ ఏడాదంతా తన బౌలింగ్‌తో సత్తా చాటిన వరుణ్ చక్రవర్తి ఐసీసీ టీ20 టాప్‌ బౌలర్‌గా నిలిచాడు. భారత్‌ తరఫున అగ్రస్థానం దక్కించుకున్న మూడో బౌలర్‌గా నిలిచాడు. ఇప్పటి వరకూ జస్‌ప్రీత్ బుమ్రా, రవి బిష్ణోయ్ ఈ ఘనత సాధించారు. ఆసియా కప్‌లో వరుసగా రెండు మ్యాచుల్లోనూ నాణ్యమైన ప్రదర్శన చేయడంతో వరుణ్ ర్యాంకింగ్‌ మారిపోయింది. మూడు స్థానాలు ఎగబాకి అగ్రస్థానానికి చేరాడు. ప్రస్తుతం వరుణ్ ఖాతాలో 733 పాయింట్లు ఉన్నాయి. అతడి తర్వాత జాకబ్ డఫీ (717), అకీల్ హుసేన్ (707), ఆడమ్ జంపా (700), అదిల్ రషీద్ (677) టాప్‌ -5లో ఉన్నారు. గత కొద్ది రోజులుగా జట్టులో స్థానం దక్కించుకోలేకపోతున్న రవి బిష్ణోయ్ రెండు ర్యాంకులు దిగజారి 8వ స్థానంలో కొనసాగుతున్నాడు. గత రెండు టీ20ల్లో ఏడు వికెట్లు తీసిన కుల్‌దీప్‌ యాదవ్ ఏకంగా 16 స్థానాలను మెరుగుపర్చుకుని 23వ ర్యాంకులోకి దూసుకొచ్చాడు.
అగ్రస్థానంలో అభిషేక్, హార్దిక్
ఆసియా కప్‌లో తొలి రెండు మ్యాచుల్లోనూ దూకుడుగా ఆడిన అభిషేక్ శర్మ (884) తన పాయింట్లను పెంచుకున్నాడు. దక్షిణాఫ్రికాపై భారీ శతకం చేసిన ఫిల్ సాల్ట్ (838), దూకుడుగా ఆడిన జోస్ బట్లర్ (794) తమ స్థానాలను మెరుగుపర్చుకున్నారు. ఇక తిలక్‌ వర్మ (792) నాలుగో ర్యాంకుకు పడిపోయాడు. పాక్‌పై కీలక ఇన్నింగ్స్‌ ఆడిన సూర్య కుమార్‌ (747) కూడా ఒక స్థానం దిగజారి ఏడులో నిలిచాడు. ఇక ఆల్‌రౌండర్ల జాబితాలో హార్దిక్ పాండ్య 237 పాయింట్లతో అగ్రస్థానంలో కొనసాగుతున్నాడు. అక్షర్ పటేల్ 163 పాయింట్లతో రెండు స్థానాలు ఎగబాకి 12వ ర్యాంక్‌కు, అభిషేక్ శర్మ 161 పాయింట్లతో నాలుగు స్థానాలు దూసుకొచ్చి 14వ ర్యాంకులో చేరారు. మరోవైపు భారత స్టార్‌ క్రికెటర్‌ స్మృతీ మంధాన వన్డేల్లో నెంబర్‌వన్‌ బ్యాటర్‌గా నిలిచింది. బ్యాటర్ల జాబితాలో మంధాన ఓ స్థానం ఎగబాకి టాప్‌ ర్యాంక్‌కు చేరింది. నాట్‌ షివర్‌ బ్రంట్‌ (ఇంగ్లండ్‌) రెండో ర్యాంక్‌కు పడిపోయింది. బౌలర్లలో స్నేహ్‌ రాణా ఐదు స్థానాలు మెరుగై 13వ ర్యాంక్‌కు చేరింది. స్పిన్నర్‌ సోఫీ ఎకెల్‌స్టోన్‌ నెంబర్‌వన్‌ బౌలర్‌గా కొనసాగుతోంది.