జనగామ జిల్లా కేంద్రంలోని రెండు షాపింగ్‌మాల్స్‌లో భారీ అగ్నిప్రమాదం చోటు చేసుకుంది. పట్టణంలోని సిద్దిపేట రోడ్డు వైపు ఉన్న విజయ షాపింగ్‌మాల్‌లో ఆదివారం తెల్లవారుజామున షాట్ సర్క్యూట్ కారణంగా మంటలు చెలరేగాయి. దీంతో స్థానికులు గమనించి పోలీసు, అగ్నిమాపక సిబ్బందికి సమాచారం అందించారు. వెంటనే సంఘటనా స్థలానికి చేరుకుని ఫైరింజిన్‌లతో మంటలు అదుపుచేశారు. ఈ ప్రమాదంలో రెండు వస్త్ర దుకాణాల్లో రూ.10 కోట్లకు పైగా ఆస్తినష్టం వాటిల్లినట్లు భావిస్తున్నారు. తొలుత విజయ షాపింగ్‌మాల్‌లో మంటలు చెలరేగి పూర్తిగా దగ్ధమైంది. అనంతరం పక్కనే ఉన్న శ్రీలక్ష్మీ వస్త్ర దుకాణానికి మంటలు వ్యాపించాయి. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు.