HYD: నగరంలో భారీగా 'చైనీస్ మాంజా' స్వాధీనం

హైదరాబాద్ నగరంలో నిషేధిత చైనీస్ మాంజాపై అధికారులు ఉక్కుపాదం మోపారు. సంక్రాంతి పండుగ వేళ విక్రయించేందుకు సిద్ధం చేసిన సుమారు రూ.1.2 కోట్ల విలువైన మాంజాను పోలీసులు, అటవీ శాఖ అధికారులు సంయుక్తంగా నిర్వహించిన దాడుల్లో స్వాధీనం చేసుకున్నారు. ఢిల్లీ, సూరత్, మహారాష్ట్ర వంటి ప్రాంతాల నుంచి గుట్టుచప్పుడు కాకుండా ఈ ప్రాణాంతక మాంజాను నగరానికి తరలిస్తున్నట్లు అధికారులకు సమాచారం అందింది. ఈ క్రమంలోనే నిఘా పెట్టిన బృందాలు, దుకాణాదారులపై దాడులు చేసి భారీ నిల్వలను పట్టుకున్నాయి. ప్రభుత్వం ఈ మాంజాపై స్పష్టమైన నిషేధం విధించినప్పటికీ, లాభాల కోసం వ్యాపారులు దీనిని విక్రయిస్తున్నారు. నైలాన్, సింథటిక్ పదార్థాలతో తయారయ్యే ఈ మాంజా పక్షులకే కాకుండా, వాహనదారులకు ప్రాణసంకటంగా మారుతోంది. గాలిలో వేలాడే ఈ దారాలు బైక్‌పై వెళ్లేవారి మెడకు చుట్టుకొని తీవ్ర గాయాలు కావడం, ప్రాణాలు కోల్పోవడం వంటి ఘటనలు తరచూ జరుగుతున్నాయి. ప్రజలు పర్యావరణహితమైన నూలు దారాలనే వాడాలని అధికారులు విజ్ఞప్తి చేస్తున్నారు.

సంక్రాంతికి 6,431 ప్రత్యేక బస్సులు

సంక్రాంతి పండుగకు సొంతూళ్లకు వెళ్లే ప్రయాణికుల కోసం టీజీఎస్‌ఆర్టీసీ భారీ ఏర్పాట్లు చేసింది. రాష్ట్రవ్యాప్తంగా మొత్తం 6,431 ప్రత్యేక బస్సులను నడపనున్నట్లు సంస్థ బుధవారం ప్రకటించింది. ముఖ్యంగా రద్దీ ఎక్కువగా ఉండే జనవరి 9, 10, 12, 13 తేదీలతో పాటు, తిరుగు ప్రయాణం కోసం జనవరి 18, 19 తేదీల్లో ఈ ప్రత్యేక సేవలు అందుబాటులో ఉంటాయి. హైదరాబాద్‌లోని ఎంజీబీఎస్, జేబీఎస్, ఉప్పల్, ఎల్బీనగర్, ఆరాంఘర్, కేపీహెచ్‌బీ, గచ్చిబౌలి ప్రాంతాల నుండి ఈ బస్సులు బయల్దేరుతాయి. జీవో నంబరు 16 ప్రకారం, ప్రత్యేక బస్సుల్లో సాధారణ ఛార్జీ కంటే 50 శాతం అదనపు ఛార్జీలు వసూలు చేస్తారు. ఈ పెంపు కేవలం రద్దీ ఉన్న ఆరు రోజులు మాత్రమే వర్తిస్తుంది. మహిళలకు గుడ్ న్యూస్ ఏంటంటే, పల్లె వెలుగు, ఎక్స్‌ప్రెస్ వంటి బస్సుల్లో ఉచిత ప్రయాణ సదుపాయం యథావిధిగా కొనసాగుతుంది. ప్రయాణికులు ముందస్తు రిజర్వేషన్ కోసం www.tgsrtcbus.in వెబ్‌సైట్‌ను సందర్శించాలని లేదా సహాయం కోసం 040-69440000, 040-23450033 నంబర్లను సంప్రదించాలని ఆర్టీసీ యాజమాన్యం తెలిపింది.