PM Modi: నేటి నుంచి 2 రోజులు ఇజ్రాయెల్‌లో మోడీ పర్యటన.. కీలక ఒప్పందాలు ?

మధ్యప్రాచ్యంలో పరిస్థితులు ఉద్రిక్తంగా ఉన్న నేపథ్యంలో ప్రధాని నరేంద్ర మోడీ ఈరోజు ఇజ్రాయెల్ పర్యటనకు బయలుదేరుతున్నారు. రెండు రోజుల పాటు జరిగే ఈ పర్యటనలో ద్వైపాక్షిక సంబంధాలను మరింత బలోపేతం చేసే అంశాలపై చర్చలు జరగనున్నాయి. పలు కీలక ఒప్పందాలపై సంతకాలు జరిగే అవకాశం ఉన్నట్లు సమాచారం.

పర్యటనలో భాగంగా మోడీ ఇజ్రాయెల్ పార్లమెంట్‌ను ఉద్దేశించి ప్రసంగించనున్నారు. ఇది అరుదైన గౌరవంగా భావించబడుతోంది. గతంలో 2015లో భారత రాష్ట్రపతిగా ఉన్న ప్రణబ్ ముఖర్జీ అక్కడి పార్లమెంట్‌లో ప్రసంగించారు. ఆ తరువాత ఈ వేదికపై మాట్లాడే భారత నాయకుడిగా మోడీ నిలవనున్నారు. అలాగే ఇజ్రాయెల్ అధ్యక్షుడు ఐజాక్ హెర్జోగ్‌తో పాటు ప్రధానమంత్రి బెంజమిన్ నెతన్యాహును కూడా ఆయన కలవనున్నారు.

ఇటీవల ఇరు దేశాల మధ్య ఉన్నత స్థాయి పర్యటనలు వేగం పుంజుకున్నాయి. విదేశాంగ మంత్రి ఎస్. జైశంకర్, వాణిజ్య మంత్రి పియూష్ గోయల్ ఇటీవల ఇజ్రాయెల్ వెళ్లి వచ్చారు. మరోవైపు ఇజ్రాయెల్ ప్రతినిధి బృందం ఢిల్లీలో నిర్వహించిన ఏఐ ఇంపాక్ట్ సమ్మిట్‌లో పాల్గొంది. తాజా పర్యటనతో వ్యూహాత్మక, సాంకేతిక, రక్షణ రంగాల్లో భాగస్వామ్యం మరింత విస్తరించే అవకాశాలు కనిపిస్తున్నాయి.

భారత ప్రధాని తన సన్నిహిత మిత్రుడని ఇజ్రాయెల్ ప్రధాని నెతన్యాహు వ్యాఖ్యానించారు. ప్రపంచ వేదికపై భారత్ శక్తివంతమైన దేశంగా ఎదుగుతోందని ఆయన అన్నారు. ఉగ్రవాదం వంటి ‘రాడికల్’ సవాళ్లను ఎదుర్కొనేందుకు కొత్త బహుపాక్షిక కూటమిని ఏర్పాటు చేయాలన్న ఆలోచనను కూడా ప్రస్తావించారు.

ఇజ్రాయెల్ పర్యటన కోసం తాను ఆసక్తిగా ఎదురుచూస్తున్నానని ప్రధాని మోడీ సోషల్ మీడియా వేదిక ఎక్స్‌లో తెలిపారు. విశ్వాసం, ఆవిష్కరణ, శాంతి, అభివృద్ధి వంటి ఉమ్మడి విలువల ఆధారంగా భారత్–ఇజ్రాయెల్ స్నేహం నిర్మితమైందని ఆయన పేర్కొన్నారు.

నెతన్యాహు ప్రతిపాదించిన కూటమిలో భారత్, ఇజ్రాయెల్, గ్రీస్, సైప్రస్ దేశాలు ప్రధాన భాగస్వాములుగా ఉండొచ్చని సమాచారం. ఇజ్రాయెల్ విదేశాంగ శాఖ ప్రకటన ప్రకారం అరబ్, ఆఫ్రికా, ఆసియా దేశాలకు కూడా ఈ కూటమిలో చేరే అవకాశం ఉంటుందని సూచించింది. ఇజ్రాయెల్–ఇరాన్ మధ్య ఉద్రిక్తతలు కొనసాగుతున్న సమయంలో ఈ ప్రకటన ప్రాధాన్యం సంతరించుకుంది. ఇదే సమయంలో పాకిస్థాన్, సౌదీ అరేబియా, టర్కీ దేశాలు మరో కూటమి దిశగా ప్రయత్నాలు చేస్తున్న నేపథ్యంలో ప్రాంతీయ రాజకీయాలు మరింత చురుకుగా మారుతున్నాయి.