AP: యుద్ధ భయం- తెలుగు రాష్ట్రాల అత్యవసర చర్యలు
ఇరాన్–ఇజ్రాయెల్ మధ్య పెరుగుతున్న ఉద్రిక్తతలు అంతర్జాతీయ స్థాయిలో ఆందోళన కలిగిస్తున్న నేపథ్యంలో, ఆ ప్రాంతాల్లో నివసిస్తున్న భారతీయుల భద్రత కీలక అంశంగా మారింది. ముఖ్యంగా అక్కడ పనిచేస్తున్న లేదా చదువుకుంటున్న తెలుగు ప్రజల పరిస్థితిపై తెలుగు రాష్ట్ర ప్రభుత్వాలు ప్రత్యేక దృష్టి సారించాయి. ఈ పరిస్థితుల్లో ఆంధ్రప్రదేశ్ ప్రభుత్వం అత్యవసర చర్యలు చేపట్టింది. ఇరాన్–ఇజ్రాయెల్ మధ్య నెలకొన్న ఉద్రిక్త పరిస్థితుల నేపథ్యంలో వివిధ దేశాల్లో చిక్కుకుపోయిన తెలుగు ప్రజలకు సహాయం అందించేందుకు ఏపీ ప్రభుత్వం సిద్ధమైంది. ఈ బాధ్యతలను ఎన్ఆర్టీ ఆర్టీజీఎస్ విభాగాలకు అప్పగిస్తూ ముఖ్యమంత్రి చంద్రబాబు కీలక ఆదేశాలు జారీ చేశారు. విదేశాల్లో ఉన్న తెలుగు ప్రజల భద్రతను నిర్ధారించేందుకు కేంద్ర ప్రభుత్వంతో సమన్వయం చేసుకుని తక్షణ చర్యలు చేపట్టాలని ఉన్నతాధికారులకు సూచించారు. వారిని సురక్షితంగా స్వదేశానికి తీసుకురావడానికి ఏర్పాట్లు చేయాలని స్పష్టం చేశారు.
ఇదే సమయంలో ఇరాన్, ఇజ్రాయెల్ ప్రాంతాల్లో వేలాది మంది భారతీయులు చిక్కుకుపోయినట్లు సమాచారం. వారిని సురక్షితంగా బయటకు తీసుకురావడంలో భారత విదేశాంగ శాఖ తన ప్రయత్నాలను ముమ్మరం చేసింది. అక్కడి పరిస్థితులను సమీక్షిస్తూ, రక్షణ చర్యలను వేగవంతం చేస్తోంది. విమాన సదుపాయాలు, భద్రతా మార్గాలు, స్థానిక అధికారులతో చర్చలు వంటి అంశాలపై దృష్టి పెట్టింది. అలాగే తెలుగు రాష్ట్రాల ప్రభుత్వాలు కూడా తమ పౌరుల కోసం ప్రత్యేక హెల్ప్లైన్ నంబర్లు, వాట్సాప్ మరియు ఈమెయిల్ సదుపాయాలను అందుబాటులోకి తీసుకువచ్చాయి. అత్యవసర పరిస్థితుల్లో సంప్రదించేందుకు వీలుగా ఈ వివరాలను అధికారికంగా విడుదల చేశాయి. ఇరాన్–ఇజ్రాయెల్ ఉద్రిక్తతల నేపథ్యంలో అక్కడ ఉన్న తెలుగు ప్రజలు అప్రమత్తంగా ఉండాలని, ప్రభుత్వ సూచనలను పాటించాలని అధికారులు కోరుతున్నారు. మొత్తం మీద, విదేశాల్లో ఉన్న భారతీయుల భద్రతే ప్రథమ ప్రాధాన్యమని కేంద్ర, రాష్ట్ర ప్రభుత్వాలు స్పష్టం చేస్తున్నాయి.
విదేశాల్లో చిక్కుకున్న ప్రజలకు అండగా సర్కార్
పశ్చిమ ఆసియాలో నెలకొన్న పరిస్థితుల నేపథ్యంలో తెలంగాణ పౌరుల కోసం న్యూ ఢిల్లీలోని తెలంగాణ భవన్లో తెలంగాణ ప్రభుత్వం 24×7 కంట్రోల్ రూమ్ ఏర్పాటు చేసింది. ముఖ్యమంత్రి ఏ. రేవంత్ రెడ్డి ఆదేశాల మేరకు మధ్యప్రాచ్య (పశ్చిమ ఆసియా) ప్రాంతంలోని కొన్ని దేశాల్లో ఏర్పడుతున్న పరిస్థితులను తెలంగాణ ప్రభుత్వం సమగ్రంగా పర్యవేక్షిస్తోంది. న్యూ ఢిల్లీలోని తెలంగాణ భవన్ సీనియర్ అధికారులు భారత విదేశాంగ మంత్రిత్వ శాఖతో పాటు సంబంధిత భారత రాయబార కార్యాలయాలతో ఇప్పటికే నిరంతరం సంప్రదింపులు జరుపుతూ పరిస్థితులను అంచనా వేస్తున్నారు. ఆయా దేశాల్లో నివసిస్తున్న,చిక్కుకున్న తెలంగాణ పౌరులు, వారి కుటుంబ సభ్యుల నుంచి వస్తున్న విచారణలను దృష్టిలో ఉంచుకుని, తెలంగాణ ప్రభుత్వం న్యూ ఢిల్లీలోని తెలంగాణ భవన్లో 24 గంటల పాటు పనిచేసే కంట్రోల్ రూమ్ను ఏర్పాటు చేసింది. అవసరమైన సమన్వయం, సహాయం అందించేందుకు ఈ కంట్రోల్ రూమ్ పనిచేస్తుంది. ఆ ప్రాంతాల్లో ఉన్న తెలంగాణ పౌరులు వారి కుటుంబ సభ్యులు ఇబ్బందులు, ప్రయాణలు లేదా అత్యవసర పరిస్థితులు ఎదురైతే ఈ కంట్రోల్ రూమ్ను సంప్రదించవచ్చు.
వందన బరువా (పీఎస్ టు రెసిడెంట్ కమిషనర్ & లైజన్ హెడ్)-
+91 9871999044
సీహెచ్. చక్రవర్తి (పబ్లిక్ రిలేషన్స్ ఆఫీసర్)
+91 9958322143