GST Collection : ఖజానాకు కాసుల పంట..ఒక్క నెలలోనే రూ.1.74 లక్షల కోట్ల జీఎస్‌టీ.

GST Collection : భారతదేశ ఆర్థిక వ్యవస్థ సరికొత్త రికార్డుల దిశగా దూసుకుపోతోంది. కొత్త ఏడాది 2026 ప్రారంభం వేళ కేంద్ర ప్రభుత్వ ఖజానాకు జీఎస్టీ రూపంలో భారీగా ఆదాయం వచ్చి చేరింది. 2025 డిసెంబర్ నెలకు సంబంధించిన జీఎస్‌టీ వసూళ్లు గతేడాది కంటే మెరుగ్గా నమోదయ్యాయి. దేశవ్యాప్తంగా వ్యాపార కార్యకలాపాలు పెరగడం, పన్ను చెల్లింపుదారుల సంఖ్య వృద్ధి చెందడమే దీనికి ప్రధాన కారణమని ఆర్థిక నిపుణులు విశ్లేషిస్తున్నారు.

2025 డిసెంబర్ నెలలో జీఎస్‌టీ వసూళ్లు గతేడాది ఇదే నెలతో పోలిస్తే 6.1 శాతం పెరిగి రూ.1.74 లక్షల కోట్లకు చేరుకున్నాయి. జనవరి 1, 2026న విడుదలైన అధికారిక గణాంకాల ప్రకారం.. దేశీయ వినియోగంతో పాటు దిగుమతుల ద్వారా వచ్చే ఆదాయం గణనీయంగా పెరిగింది. ముఖ్యంగా దిగుమతులపై వచ్చే జీఎస్‌టీ ఆదాయం ఏకంగా 19.7 శాతం వృద్ధి చెంది రూ.51,977 కోట్లకు చేరడం విశేషం. ఇది భారత అంతర్జాతీయ వాణిజ్యం ఎంత బలంగా ఉందో నిరూపిస్తోంది.

ప్రస్తుత ఆర్థిక సంవత్సరం 2025-26 (ఏప్రిల్ నుంచి డిసెంబర్ వరకు) గణాంకాలను పరిశీలిస్తే, మొత్తం జీఎస్‌టీ వసూళ్లు రూ.16.5 లక్షల కోట్లకు చేరుకున్నాయి. గత ఆర్థిక సంవత్సరం ఇదే కాలంలో ఈ వసూళ్లు రూ.15.2 లక్షల కోట్లుగా ఉండేవి. అంటే దాదాపు 8.6 శాతం వృద్ధి నమోదైంది. సెంట్రల్ జీఎస్‌టీ (CGST), స్టేట్ జీఎస్‌టీ (SGST) రెండూ మంచి పనితీరు కనబరిచాయి. ఐజీఎస్‌టీ (IGST)లో స్వల్ప తగ్గుదల కనిపించినప్పటికీ, ఓవరాల్‌గా పన్ను వ్యవస్థ పటిష్టంగా ఉంది.

కేంద్ర ప్రభుత్వం ఒకవైపు పన్నులను వసూలు చేస్తూనే, మరోవైపు అర్హులైన వ్యాపారస్తులకు రిఫండ్లను కూడా వేగంగా విడుదల చేస్తోంది. డిసెంబర్ నెలలో జీఎస్‌టీ రిఫండ్లు ఏకంగా 31 శాతం పెరిగి రూ.28,980 కోట్లకు చేరుకున్నాయి. రిఫండ్లు పోను మిగిలిన నెట్ జీఎస్‌టీ రెవెన్యూ రూ.1.45 లక్షల కోట్లుగా నమోదైంది. పన్నుల విధానాన్ని సరళతరం చేయడంలో జీఎస్‌టీ కౌన్సిల్ తీసుకుంటున్న నిర్ణయాలు సత్ఫలితాలను ఇస్తున్నాయని అర్థమవుతోంది.

జీఎస్‌టీ ముఖచిత్రం:

మొత్తం జీఎస్‌టీ వసూళ్లు: రూ.1.74 లక్షల కోట్లు (6.1% పెరిగింది).

స్థానిక జీఎస్‌టీ ఆదాయం: రూ.1.22 లక్షల కోట్లు (1.2% పెరిగింది).

దిగుమతులపై జీఎస్‌టీ: రూ.51,977 కోట్లు (19.7% పెరిగింది).

జీఎస్‌టీ రిఫండ్లు: రూ.28,980 కోట్లు (31% పెరిగింది).

నెట్ జీఎస్‌టీ ఆదాయం: రూ.1.45 లక్షల కోట్లు (2.2% పెరిగింది).

కాంపెన్సేషన్ సెస్: రూ.4,238 కోట్లు (64.69% తగ్గింది).

అభివృద్ధి పథంలో భారత్

వరుసగా ప్రతి నెలా లక్షన్నర కోట్లకు పైగా జీఎస్‌టీ వసూళ్లు రావడం అనేది భారత ఆర్థిక వ్యవస్థ స్థిరత్వాన్ని సూచిస్తోంది. పండుగ సీజన్, ఏడాది చివరి సెలవుల కారణంగా ప్రజల ఖర్చులు పెరగడం కూడా డిసెంబర్ వసూళ్లపై సానుకూల ప్రభావం చూపింది. పన్నుల ఎగవేతను అరికట్టడానికి టెక్నాలజీని వాడటం, ఈ-ఇన్వాయిసింగ్ నిబంధనలను కఠినతరం చేయడంతో ప్రభుత్వ ఖజానా కళకళలాడుతోంది. 2026లో ఈ వసూళ్లు ప్రతి నెలా రూ.2 లక్షల కోట్ల మార్కును చేరుకుంటాయని అంచనా వేస్తున్నారు.