Rajiv Gandhi Murder Case : రాజీవ్ గాంధీ హత్య కేసు నిందితుడు మృతి
మాజీ ప్రధాని రాజీవ్ గాంధీ (Rajiv Gandhi) హత్య కేసు నిందితుడు మరణించాడు. కేసులో నిందితుడిగా ఉన్న సుతేంద్రరాజా టి అలియాస్ శాంతన్ ఫిబ్రవరి 28, బుధవారం ప్రాణాలు కోల్పోయాడు. రాజీవ్ హత్య కేసులో 32 ఏళ్లు జైలు శిక్ష అనుభవించిన శాంతన్.. 2022లో విడుదలయ్యాడు. శ్రీలంకకు చెందిన ఇతడు ఎల్‌టీటీఈలో పని చేసేవాడు. శాంతన్ వయసు 56 ఏళ్లు. అనారోగ్య సమస్యలతో చికిత్స పొందుతున్న ఆయన ఈ ఉదయం చెన్నైలోని రాజీవ్ గాంధీ గవర్నమెంట్‌ జనరల్ ఆస్పత్రిలో చనిపోయాడు.
అతను నవంబర్ 2022 లో సుప్రీంకోర్టు ద్వారా విడుదలయ్యాడు. అప్పటి నుండి తమిళనాడులోని తిరుచ్చి సెంట్రల్ జైలు క్యాంపస్‌లోని ప్రత్యేక శిబిరంలో ఉంచబడ్డాడు. చెన్నైలోని ఫారినర్స్ రీజినల్ రిజిస్ట్రేషన్ ఆఫీస్ (ఎఫ్‌ఆర్‌ఆర్‌ఓ) ఫిబ్రవరి 23న అతడిని బహిష్కరించాలని ఉత్తర్వులు జారీ చేయగా, మరో రెండు రోజుల్లో శ్రీలంకకు పంపించనున్నట్లు తెలిసింది.
అయితే, ఫిబ్రవరి ప్రారంభంలో శాంతన్.. రాజీవ్ గాంధీ ప్రభుత్వ జనరల్ ఆసుపత్రిలో చేరాడు. ఫిబ్రవరి 28 ఉదయం 7.50 గంటలకు గుండె ఆగిపోయినట్లు వైద్యులు ప్రకటించారు. అతను క్రిప్టోజెనిక్ సిర్రోసిస్‌తో బాధపడుతున్నాడు. న్యాయవాది పుగజెంధీ, శాంతన్ తరపు న్యాయవాది మాట్లాడుతూ.. ఉదయం 7.50 గంటలకు శాంతన్ గుండెపోటుతో మరణించినట్లు వైద్యులు ధృవీకరించారు. "అతను మరణించినప్పుడు అతని సోదరుడు ఆసుపత్రిలో ఉన్నాడు. అంత్యక్రియల నిమిత్తం ఆయన భౌతికకాయాన్ని శ్రీలంకలోని ఆయన ఇంటికి తీసుకెళ్లనున్నారు. ఏర్పాట్లు జరుగుతున్నాయి'' అని అన్నారు.
