Budget 2026 : గ్రామాలకు, పేదలకు వరాల జల్లు..పథకాల వారీగా నిధుల కేటాయింపు ఇదీ.

Budget 2026 : కేంద్ర బడ్జెట్ 2026 సామాన్యుల పక్షపాతిగా కనిపిస్తోంది. ఆర్థిక మంత్రి నిర్మలా సీతారామన్ ప్రవేశపెట్టిన ఈ పద్దులో గ్రామీణ భారతం, పేదరికం నిర్మూలన, రైతు సంక్షేమమే లక్ష్యంగా నిధుల వర్షం కురిపించారు. ముఖ్యంగా ఉపాధి హామీ, ఉచిత రేషన్, రైతుల పెట్టుబడి సాయం వంటి పథకాలకు కేటాయింపులు చూస్తుంటే.. ఓట్ల వేట కంటే ప్రజల అవసరాలకే ప్రభుత్వం పెద్దపీట వేసిందని అర్థమవుతోంది. మరి ఏ పథకానికి ఎంత ఇచ్చారు? ఎవరికి ఎంత మేలు జరుగుతుందో వివరంగా చూద్దాం.

ఉపాధి హామీకి సరికొత్త ఊతం: ఈ బడ్జెట్‌లో అతిపెద్ద కేటాయింపు గ్రామీణ ఉపాధి రంగానికే దక్కింది. గతంలో మనం MGNREGA అని పిలుచుకునే పథకాన్ని ఇప్పుడు వీబీ-జీరామ్ జీ(VB-G RAM G) పేరుతో పిలుస్తున్నారు. దీనికోసం ప్రభుత్వం ఏకంగా రూ.95,692.31 కోట్లు కేటాయించింది. గత ఏడాది బడ్జెట్ (86 వేల కోట్లు)తో పోలిస్తే ఇది భారీ పెరుగుదల. దీనివల్ల పల్లెల్లో పనులు దొరక్క పట్టణాలకు వలస వెళ్లే కూలీలకు పెద్ద ఊరట లభిస్తుంది. అంతేకాకుండా, గ్రామీణ మౌలిక సదుపాయాల అభివృద్ధి కోసం మరో రూ.30 వేల కోట్లు అదనంగా కేటాయించారు.

ఆకలి తీర్చే అన్న యోజన: దేశంలో ఏ పేదవాడు ఆకలితో అలమటించకూడదన్న లక్ష్యంతో నడుస్తున్న ప్రధాన మంత్రి గరీబ్ కల్యాణ్ అన్న యోజన(PMGKAY)కు ప్రభుత్వం అక్షరాలా రూ.2,27,429 కోట్లు కేటాయించింది. ఇది గత ఏడాది కేటాయింపుల (2.03 లక్షల కోట్లు) కంటే చాలా ఎక్కువ. కోట్లాది కుటుంబాలకు ఉచితంగా లేదా అతి తక్కువ ధరకు రేషన్ అందజేయడం ద్వారా ఆహార భద్రతను కట్టుదిట్టం చేయాలని ప్రభుత్వం నిశ్చయించుకుంది. నిత్యావసర ధరలు పెరుగుతున్న తరుణంలో ఈ నిర్ణయం పేదలకు పెద్ద రక్షణ కవచంలా మారుతుంది.

రైతన్నకు కిసాన్ సాయం: చిన్న, సన్నకారు రైతుల పెట్టుబడి అవసరాల కోసం అమలు చేస్తున్న పీఎం కిసాన్(PM-Kisan) పథకానికి ఈసారి రూ.63,500 కోట్లు కేటాయించారు. గత ఏడాదితో పోలిస్తే ఈ నిధుల్లో మార్పు లేకపోయినప్పటికీ, ఈ పథకాన్ని ఎట్టి పరిస్థితుల్లోనూ ఆపే ప్రసక్తే లేదని ప్రభుత్వం స్పష్టం చేసింది. నేరుగా రైతుల ఖాతాల్లోకి ఏటా రూ.6,000 జమ చేయడం వల్ల విత్తనాలు, ఎరువుల కొనుగోలుకు రైతులకు ఆర్థిక వెసులుబాటు కలుగుతుంది. వ్యవసాయ రంగాన్ని స్థిరీకరించేందుకు ఇదొక కీలక అడుగు.

ఆరోగ్యమే మహాభాగ్యం: పేద కుటుంబాలు భారీ చికిత్సల కోసం అప్పుల పాలవ్వకూడదనే ఉద్దేశంతో ఆయుష్మాన్ భారత్ (PM-JAY) పథకానికి నిధులు పెంచారు. ఈసారి బడ్జెట్‌లో దీనికోసం రూ.9,500 కోట్లు కేటాయించారు. గత ఏడాది సవరించిన అంచనాల (రూ. 8,995 కోట్లు) కంటే ఇది సుమారు రూ.500 కోట్లు ఎక్కువ. దీనివల్ల మరింత మంది పేదలకు కార్పొరేట్ ఆసుపత్రుల్లో ఉచిత వైద్యం అందే అవకాశం ఉంటుంది. మొత్తంగా చూస్తే, బడ్జెట్ 2026 పేద, మధ్యతరగతి వర్గాలకు ఒక భరోసాను కల్పించేలా ఉంది.