Pooja Khedkar : పూజా ఖేడ్కర్ ఆడి కారు సీజ్
వివాదాస్పద ప్రొబేషనరీ ఐఏఎస్‌ పూజా ఖేడ్కర్ ఆడి కారును పుణె ట్రాఫిక్ పోలీసులు స్వాధీనం చేసుకున్నారు. మోటార్ వెహికల్స్ యాక్ట్(ఎంవీ యాక్ట్)ను ఉల్లంఘిస్తూ ఆమె కారుకు సైరన్‌, మహారాష్ట్ర ప్రభుత్వ స్టిక్కర్‌, వీఐపీ నంబర్‌ ప్లేట్లను వాడడం, 21 సార్లు ట్రాఫిక్ ఉల్లంఘనలకు పాల్పడడంతో ఈ చర్యలు తీసుకున్నట్లుగా పేర్కొన్నారు. కారు పత్రాలను సమర్పించాలని యజమానిని ఆదేశిస్తూ ట్రాఫిక్ పోలీసు విభాగం నోటీసులు జారీ చేసింది. ఖేడ్కర్ కుటుంబ డ్రైవర్ చతుష్రింగి శనివారం రాత్రి పోలీస్ స్టేషన్‌లో కారు తాళాలు అప్పగించినట్లుగా వారు తెలిపారు. అయితే, కారుకు సంబంధించిన పత్రాలు సమర్పించలేదన్నారు. మరోవైపు పూజా ఖేడ్కర్ తల్లి మనోరమకు పుణె పోలీస్ కమిషనర్ అమితేష్ కుమార్ షోకాజ్ నోటీసులు జారీ చేశారు. అయితే వాటిని తీసుకోవడానికి ఎవరూ ముందుకు రాకపోవడంతో వారి ఇంటి బయట గోడకు నోటీసులను అతికించారు. ఆమె తల్లి ఓ వ్యక్తిని తుపాకీతో బెదిరించిన వీడియో ఇటీవల బయటికి వచ్చిన సంగతి తెలిసిందే. అందులో కొందరు గ్రామస్థులను ఆమె పిస్తోల్‌తో బెదిరిస్తున్నట్లు క్లియర్ గా కనిపిస్తోంది. దీనిపై స్థానిక రైతు ఫిర్యాదు చేయడంతో ఆయుధాల చట్టం కింద ఆమెపై కేసు నమోదైంది. ఇందులో భాగంగానే తన తుపాకీ లైసెన్స్‌ను ఎందుకు రద్దు చేయకూడదో మనోరమా వెల్లడించాలని పుణె కమిషనర్ నోటీసులు పేర్కొన్నారు. 10 రోజుల్లోగా స్పందించాలని ఆదేశించారు