TS : గుట్కాపై నిషేధం.. కండిషన్స్ అప్లై అంటున్న రేవంత్ సర్కార్

ఫుడ్ సేఫ్టీపై కఠినంగా ఉంటోంది రేవంత్ రెడ్డి ప్రభుత్వం. తెలంగాణ రాష్ట్రంలో మరో కీలక నిర్ణయం తీసు కుంది. యువతపై ప్రభావం చూపుతున్న డ్రగ్స్, గంజాయిపై ఇప్పటికే రాష్ట్ర ప్రభుత్వం ఉక్కు పాదం మోపుతోంది.

ఈ క్రమంలోనే ప్రజల ఆరోగ్యానికి హానికరమైన గుట్కాను నిషేధించాలని ప్రభుత్వం నిర్ణయించింది. ఈ మేరకు గుట్కా తయారీ, అమ్మకాలపై నిషేధం విధిస్తూ ఫుడ్ సేఫ్టీ కమిషనర్ ఉత్తర్వులు జారీ చేశారు. ఈ ఏడాది మే 24 నుంచి ఏడాది కాలం పాటు ఈ నిబంధనలు అమల్లో ఉంటాయని స్పష్టం చేశారు. గుట్కా, పాన్ మాసాలలో ఆరోగ్యానికి హాని కలిగించే పొగాకు, నికోటిన్ ఉండడం మూలంగానే వాటిని నిషేధించినట్లు పేర్కొన్నారు.

గుట్కాను తయారు చేసినా, నిల్వ ఉంచినా, విక్రయాలు జరిపినా చట్టపరమైన చర్యలు తీసుకుంటామని హెచ్చరించారు. తాజా ఉత్తర్వులతో ఆహార భద్రతా ప్రమాణాల చట్టం 2006లోని సెక్షన్ 30లోని సబ్ సెక్షన్(2)లోని క్లాజ్ (ఏ) మేరకు పొగాకు, నికోటిన్ లను పౌచ్లు, ప్యాకేజీ, కంటెయినర్లు మొదలైన వాటిల్లో ప్యాక్ చేసిన గుట్కా/ పాన్ మసాలా తయారీ, నిల్వ, పంపిణీ, రవాణా విక్రయాలపై నిషేధం అమలులోకి వచ్చింది.