TG : సీఎం అంటే కటింగ్ మాస్టరా..? కేటీఆర్ సెటైర్

సీఎం అంటే కటింగ్ మాస్టరా? అంటూ ముఖ్య మంత్రి రేవంత్ రెడ్డిని ( CM Revanth Reddy ) భా రాస వర్కింగ్ ప్రెసిడెంట్ కేటీఆర్ ( KTR ) ప్రశ్నించారు. ప్రతి పథకంలో లబ్ధిదారుల సంఖ్యకు కోతపెట్టడమే లక్ష్యమా..? సీఎం అనే పదానికి ఇదే సరికొత్త నిర్వచనమా? అంటూ సోషల్ మీడియా వేదికగా నిలదీశారు.

నాడు పరుగు పరుగున వెళ్లి రైతులను లోన్ తెచ్చుకో మన్నారని.. నేడు రూ.2 లక్షల రుణమాఫీకి సవాలక్ష కొర్రీలు పెడుతున్నారని కేటీఆర్ విమర్శించారు. రూ.39 వేల కోట్లు.. ఇప్పుడు రూ.31 వేల కోట్లకు కటింగ్ పెట్టి కుదించారన్నారు. పాసుబుక్కులు లేవనే నెపంతో లక్షల మందికి శఠగోపం పెట్టే కుటిల ప్రయత్నం చేస్తే సహించమన్నారు. రేషన్ కార్డు సాకు చూపి.. లక్షల మందికి మొండిచెయ్యిచ్చే కుతంత్రం చేస్తే భరించమన్నారు. ఆదాయపు పన్ను చెల్లిస్తున్నారని కొంత మందికి.. చిన్నపాటి ప్రభుత్వ ఉద్యోగం చేస్తున్నారని ఇంకొంతమందికి.. శూన్యహస్తం చూపే చీకటి పన్నాగాన్ని చూస్తూ ఊరుకునేది లేదన్నారు.

మొన్న లక్షలాది మందిని రూ.500 సిలిండర్ పథకానికి దూరం చేశారని.. నిన్న 200 యూనిట్ల పథకానికి ఆంక్షలు పెట్టి ఆగమాగం చేశా రంటూ ఆగ్రహం వ్యక్తం చేశారు కేటీఆర్. నేడు రూ.2 లక్షల రుణమాఫీని కూడా ఎగ్గొట్టేందుకు లక్షలాది మంది రైతులకు ఎగనామం పెడతామంటే కుదర దన్నారు. నాట్ల నాడు ఇవ్వాల్సిన రైతుబంధుకు ఇప్పటికీ దిక్కులేదని.. ఓట్ల పండగ ముగిసినా.. ఎకరానికి రూ.7500ల రైతుభరోసాకు అడ్రస్సే లేదని ఆరోపించారు. కాంగ్రెస్ ప్రచారంలో అందరికీ అన్నీ అన్నారని.. అధికారంలోకి రాగానే కొందరికే కొన్ని అంటూ కోతపెడుతున్నారని ఎద్దేవా చేశారు. రుణమాఫీపై మాట తప్పినా... మడమ తిప్పినా.. లక్షలాది రైతు కుటుంబాల తరపున ప్రశ్నిస్తాం.. పోరాటం చేస్తామంటూ ఆయన ఎక్స్ ట్విట్టర్ వేదికగా స్పందించారు.