TS : 4 నెలలుగా నర్సింగ్ ఆఫీసర్లకు జీతాలు లేవు:హరీశ్‌రావు
బిఆర్ఎస్ ప్రభుత్వ హయాంలో జరిగిన 7000 మంది నర్సింగ్ ఆఫీసర్ల రిక్రూట్మెంట్ ఘనతను కాంగ్రెస్ ప్రభుత్వం తన ఖాతాలో వేసుకుందని బిఆర్ఎస్ ఎంఎల్ఎ హరీష్ రావు మండిపడ్డారు. నర్సింగ్ ఆఫీసర్లకు 4 నెలలుగా కాంగ్రెస్ ప్రభుత్వం జీతాలు ఇవ్వలేదని మాజీ మంత్రి హరీశ్‌రావు విమర్శించారు. మంగళవారం ఆయన తన ట్విట్టర్ లో ట్వీట్ చేశారు. ‘మా హయాంలోని రిక్రూట్‌మెంట్‌ను మీ ఖాతాలో వేసుకున్నారు. అట్టహాసంగా నియామక పత్రాలు ఇచ్చి.. జీతభత్యాలను పట్టించుకోలేదు. జీతాలు అందక 4వేల మంది ఇబ్బందులు పడుతున్నారు. ప్రతి నెలా 1వ తేదీనే జీతాలు ఇస్తామని గొప్పలు చెబుతున్న నేతలు వాస్తవాలు గుర్తించాలి. వెంటనే జీతాలు చెల్లించాలి’ అని డిమాండ్ చేశారు.
దీంతో డైరెక్టరేట్ ఆఫ్ మెడికల్ ఎడ్యుకేషన్ పరిధిలో నియమితులైన 4 వేల మంది నర్సింగ్ ఆఫీసర్లకు జీతాలు అందక అష్టకష్టాలు పడుతున్నారని, ఆర్థిక ఇబ్బందులు ఎదుర్కొంటున్నారని తెలిపారు. ప్రతి నెల ఒకటో తేదీన జీతాలు చెల్లిస్తున్నట్లు లేని గొప్పలు చెప్పుకుంటున్న కాంగ్రెస్ ప్రభుత్వం, ఇప్పటికైనా వాస్తవాలు గుర్తించాలని చురకలంటించారు. ఇప్పటికైనా ప్రభుత్వం స్పందించి పెండింగ్‌లో ఉన్న నాలుగు నెలల జీతాలును తక్షణం చెల్లించాలని బిఆర్ఎస్ పార్టీ తరఫున డిమాండ్ చేస్తున్నామని హరీష్ రావు పేర్కొన్నారు.