AP INTER: రేపటి నుంచే ఇంటర్ పరీక్షలు-కఠిన నిబంధనలు

ఆంధ్రప్రదేశ్ రాష్ట్రవ్యాప్తంగా ఇంటర్మీడియట్ వార్షిక పరీక్షలు రేపటి నుంచి( సోమవారం) నుంచి ప్రారంభం కానున్నాయి. 23వ తేదీ నుంచి పరీక్షలు ప్రారంభం కానున్న నేపథ్యంలో విద్యార్థుల్లో ఉత్సాహం, ఉత్కంఠ నెలకొంది. పరీక్షలను ప్రశాంతంగా, పారదర్శకంగా నిర్వహించేందుకు ఇంటర్ బోర్డు అధికారులు విస్తృత ఏర్పాట్లు పూర్తి చేశారు. ఏ చిన్న అవకతవకకు కూడా అవకాశం లేకుండా కఠిన నిబంధనలు అమలు చేయాలని స్పష్టం చేశారు. ఈసారి రాష్ట్రవ్యాప్తంగా మొత్తం 1,537 పరీక్షా కేంద్రాలను ఏర్పాటు చేశారు. సుమారు 10,57,312 మంది విద్యార్థులు ఈ వార్షిక పరీక్షలకు హాజరుకానున్నారు. అంత పెద్ద సంఖ్యలో విద్యార్థులు పాల్గొననున్న నేపథ్యంలో భద్రతా చర్యలను మరింత కట్టుదిట్టం చేశారు. ప్రతి కేంద్రంలో సక్రమ సదుపాయాలు, తగిన సిబ్బంది, పర్యవేక్షణ ఏర్పాట్లు చేపట్టినట్లు అధికారులు వెల్లడించారు.

సమయపాలనపై సూచనలు

పరీక్షలకు హాజరయ్యే విద్యార్థులు సమయపాలన పాటించాలని బోర్డు స్పష్టంగా సూచించింది. ఒక్క నిమిషం ఆలస్యమైనా పరీక్షా కేంద్రంలోకి అనుమతించబోమని అధికారులు హెచ్చరించారు. కనీసం అరగంట ముందుగానే పరీక్షా కేంద్రానికి చేరుకోవాలని విద్యార్థులకు సూచించారు. హాల్ టికెట్‌తో పాటు అవసరమైన పత్రాలను వెంట తీసుకురావాలని పేర్కొన్నారు. పరీక్షల పారదర్శకతను కాపాడేందుకు ఎలక్ట్రానిక్ పరికరాలపై పూర్తిస్థాయి నిషేధం విధించారు. మొబైల్ ఫోన్లు, స్మార్ట్ వాచ్‌లు, క్యాలిక్యులేటర్లు, ఇతర డిజిటల్ గాడ్జెట్లను పరీక్షా హాల్లోకి తీసుకురావడం తీవ్ర నేరంగా పరిగణిస్తామని హెచ్చరించారు. ఈ నిబంధనలు విద్యార్థులకే కాకుండా పర్యవేక్షణ సిబ్బందికీ వర్తిస్తాయని తెలిపారు. పరీక్షా కేంద్రాల్లో విధులు నిర్వహించే సిబ్బంది కూడా సెల్ ఫోన్లు ఉపయోగించరాదని స్పష్టం చేశారు. అదనంగా, ప్రతి పరీక్షా కేంద్రంలో సీసీటీవీ కెమెరాల నిఘా ఏర్పాటు చేశారు. ఈ కెమెరాల ద్వారా జరుగుతున్న కార్యకలాపాలను నేరుగా కంట్రోల్ రూమ్ నుంచి పర్యవేక్షించనున్నారు. ఏదైనా అనుమానాస్పద పరిస్థితి తలెత్తితే వెంటనే చర్యలు తీసుకునేలా ప్రత్యేక బృందాలను సిద్ధంగా ఉంచారు.

విద్యార్థులు ఒత్తిడికి లోనుకాకుండా ప్రశాంతంగా పరీక్షలు రాయాలని అధికారులు సూచించారు. సరైన ప్రణాళికతో సమయానికి కేంద్రానికి చేరుకుని నిబంధనలు పాటిస్తే ఎలాంటి ఇబ్బందులు ఉండవని తెలిపారు. రాష్ట్రవ్యాప్తంగా లక్షలాది విద్యార్థుల భవిష్యత్తుకు కీలకమైన ఈ పరీక్షలు సాఫీగా నిర్వహించేందుకు ప్రభుత్వం, బోర్డు సమన్వయంతో చర్యలు చేపట్టింది.