PAWAN: జనసేన ఎమ్మెల్యేలపై పవన్ ప్రత్యేక సర్వే..!

జనసేన అధినేత, ఏపీ డిప్యూటీ సీఎం పవన్‌కల్యాణ్‌.. తమ పార్టీ ప్రజా ప్రతినిధుల పని తీరుపై ప్రత్యేక దృష్టి పెట్టారు. ముఖ్యంగా జనసేన ఎమ్మెల్యేలపై ప్రత్యేక సర్వే నిర్వహిస్తున్నట్లు తెలుస్తోంది. ఎమ్మెల్యేల పనితీరు, అవినీతి ఆరోపణలు, ఎమ్మెల్యేలపై వస్తున్న విమర్శలపై ప్రధానంగా ఈ సర్వే ద్వారా జనసేనాని ఆరా తీస్తున్నట్లు సమాచారం. ఎమ్మెల్యేల కుటుంబ సభ్యుల జోక్యం ఏ నియోజకవర్గ పరిధిలో ఎక్కువగా ఉంది..? ఎవరు ఎక్కువ ఇసుక.. మద్యం.. ఇతర లావాదేవీల్లో ఉన్నారు..? అనే అంశాలపై పూర్తిస్థాయిలో వివరాలతో కూడిన సర్వే చేస్తున్నారట.. ఇటీవల జనసేన ఎమ్మెల్యేలపై వరస విమర్శలు.. ఆరోపణలు వచ్చిన నేపథ్యంలో.. ఈ పరిణామాలపై సీరియస్‌గా ఉన్న పవన్‌ కల్యాణ్.. సర్వేకు ఆదేశాలు ఇచ్చారట. అయితే, ఈ సర్వే ఆధారంగా.. ఆరోపణలు, విమర్శలు ఎదుర్కొంటున్న ఎమ్మెల్యేల విషయంలో కీలక నిర్ణయాలు తీసుకునే అవకాశం ఉందనే చర్చ సాగుతోంది. దీంతో, ఆరోపణలు ఎదుర్కొంటున్నర ఎమ్మెల్యేల్లో టెన్షన్‌ మొదలైనట్టుగా ప్రచారం సాగుతోంది.జనసేన ఎమ్మెల్యేలపై విమర్శలు వస్తున్న నేపథ్యంలో ఈ వ్యవహారాన్ని పవన్ సీరియస్‌గా తీసుకున్నట్లు తెలుస్తోంది.