LOANS: మీకు తెలియకుండానే మీ పేరుపైనే లోన్లు
ఇటీవల కాలంలో పెరుగుతున్న లోన్ మోసాలు... పాన్ కార్డుతో లోన్ తీసుకుంటున్న నేరగాళ్లు... పాన్ కార్డు క్రెడిట్ రిపోర్టుతో లింక్... క్రెడిట్ రేటింగ్, రుణ సామర్థ్యంపై ప్రభావం
కొందరికి అప్పు అంటే భయం. దాని జోలికి కూడా వెళ్లరు. అయితే ఇటీవల కాలంలో లోన్ మోసాలు ఎక్కువవుతున్నాయి. మీకు తెలియకుండానే మీ పాన్ కార్డ్ మీద మోసగాళ్లు లోన్లు తీసుకుంటున్నారు. ఇలాంటి కేసులు రోజురోజుకు పెరుగుతున్న నేపథ్యంలో మీ పాన్ కార్డ్ ద్వారా ఎవరైనా అనుమతి లేకుండా లోన్ తీసుకున్నారా అని తెలుసుకోవడం చాలా ముఖ్యం. మీ పాన్ కార్డును ఎవరైనా దుర్వినియోగం చేశారేమో ఇలా తెలుసుకోండి. ఆన్లైన్ లోన్ మోసాలు, సున్నితమైన, ఆర్థికపరమైన డాక్యుమెంట్ల దుర్విగియోగం వంటివి ఇటీవల ఎక్కువయ్యాయి. ఈ క్రమంలో మీ కార్డులేమైనా దుర్వినియోగానికి గురయ్యాయా అని తెలుసుకోవాల్సిన అవసరం ఉంది. ఎందుకంటే మీ పాన్ కార్డు మీ క్రెడిట్ రిపోర్ట్తో లింక్ అయి ఉంటుంది. దానిని ఉపయోగించి తీసుకున్న ఏదైనా లోన్ మీ క్రెడిట్ రేటింగ్, మీ రుణ సామర్థ్యంపై ప్రభావం చూపుతుంది.
క్రెడిట్ రిపోర్ట్ను చెక్ చేసుకోవాలి
క్రెడిట్ రిపోర్ట్ను ఎప్పటికప్పుడు చెక్ చేసుకోవాలి. సిబిల్, ఎక్స్పీరియన్, ఈక్విఫాక్స్, క్రిఫ్ హై మార్క్ వంటి క్రెడిట్ బ్యూరోలు మీ పేరుతో తీసుకున్న అన్ని లోన్లు, క్రెడిట్ కార్డుల వివరాలను మేనేజ్ చేస్తాయి. వాటి వెబ్సైట్లలోకి వెళ్లి పాన్, మొబైల్ నెంబర్తో ధృవీకరణ చేసి, ఏడాదికి ఒకసారి ఉచిత క్రెడిట్ రిపోర్ట్ను పొందొచ్చు. మీరు దరఖాస్తు చేయని లోన్లు లేదా క్రెడిట్ కార్డులు, తప్పు ఖాతా నంబర్లు, తెలియని రుణదాతల పేర్లు, లేదా మీరు ఆమోదించని కొత్త హార్డ్ ఎంక్వైరీలు వంటివి క్రెడిట్ రిపోర్ట్లో ఉండొచ్చు. వీటిని జాగ్రత్తగా చెక్ చేసుకోవాలి. మీకు తెలియకుండా తీసుకున్న లోన్లు ఉంటే చర్యలు తీసుకోవాలి. ఏమాత్రం ఏమరుపాటుగా ఉన్నా మీ పేరుపైనే లోన్లు తీసుకుని మోసం చేస్తారు జాగ్రత్త.
మీ పేరుపై లోన్లు తీసుకుంటే..
మీరు నకిలీ లోన్ను గుర్తిస్తే వెంటనే సంబంధిత ఫైనాన్షియల్ సంస్థకు తెలియజేయాలి. రిపోర్ట్ చేసిన క్రెడిట్ బ్యూరో వద్ద ఇష్యూ రైజ్ చేయాలి. చాలా వివాదాలను క్రెడిట్ బ్యూరోల వెబ్సైట్ల ద్వారా ఆన్లైన్లో దాఖలు చేయొచ్చు. గుర్తింపును తెలియజేసే డాక్యుమెంట్లు, లోన్ వివరాలు, సంతకం చేసిన అఫిడవిట్ను సమర్పించాలి. అదనంగా, స్థానిక పోలీస్ సైబర్క్రైమ్ సెల్లో పాన్ దుర్వినియోగానికి సంబంధించిన ఫిర్యాదును దాఖలు చేసి, ఆధారాలను సమర్పించాలి. ఎవరైనా మీ పాన్ను చట్టవిరుద్ధంగా ఉపయోగించి లోన్ తీసుకుంటే మీ క్రెడిట్ స్కోర్ తగ్గిపోతుంది. నిజమైన లోన్లను పొందడం కష్టంగా మారుతుంది. ప్రతి 3-6 నెలలకు ఒకసారి క్రెడిట్ రిపోర్ట్ను చెక్ చేసుకోవాలి. ప్రతి క్రెడిట్ బ్యూరో నుంచి సంవత్సరానికి ఒకసారి ఉచితంగా రిపోర్ట్ పొందొచ్చు. క్రమం తప్పకుండా తనిఖీ చేయడంతో మోసాన్ని గుర్తించి, నివారించొచ్చు.
అసురక్షిత సైట్లు, యాప్లు లేదా వాట్సాప్ ఫార్వార్డ్లలో మీ పాన్ కార్డు నంబర్ను ఎప్పుడూ పంచుకోవద్దు. బహిరంగంగా షేర్ చేయడం, ఎవరికీ ఇవ్వొద్దు. మీ పాన్ కార్డు పోతే, రీప్రింట్ కోసం దరఖాస్తు చేయండి. ఆ సమయంలో కొన్ని నెలలు మీ క్రెడిట్ రిపోర్ట్ను సమీక్షించండి. ఫైనాన్షియల్ అకౌంట్లకు బలమైన పాస్వర్డ్లను సెట్ చేసుకోండి.