Yamini Sharma : అవసరమైతే 50 వేల ఆలయాలు నిర్మిస్తాం.. షర్మిలపై బీజేపీ ఫైర్

తిరుమల తిరుపతి దేవస్థానం ఆధ్వర్యంలో దళితవాడల్లో 5 వేల ఆలయాల నిర్మాణాలు చేపట్టాలన్న ప్రభుత్వ నిర్ణయంపై ఏపీ కాంగ్రెస్ చీఫ్ వైఎస్ షర్మిల చేసిన వ్యాఖ్యలు రాష్ట్రంలో రాజకీయ దుమారాన్ని రేపాయి. షర్మిల తీరుపై బీజేపీ అధికార ప్రతినిధి యామినీశర్మ తీవ్రస్థాయిలో మండిపడ్డారు. ప్రభుత్వానికి, టీటీడీ వంటి ధార్మిక సంస్థకు మధ్య ఉన్న వ్యత్యాసాన్ని షర్మిల ముందుగా గ్రహించాలని చురకలంటించారు. "ప్రజలు కట్టే పన్నులతో నడిచే ప్రభుత్వానికి, భక్తులు సమర్పించే కానుకలతో నడిచే టీటీడీకి మధ్య తేడాను తెలుసుకోవాలి" అని ఆమె అన్నారు.

"దళితవాడల్లో 5 వేల ఆలయాల నిర్మాణం గురించి చెప్పగానే షర్మిలకు సమాజసేవ, అభివృద్ధి గుర్తుకొచ్చాయి. మేం 5 వేలే కాదు, అవసరమైతే 50 వేల ఆలయాలు నిర్మించుకుంటాం. దాని గురించి మాట్లాడటానికి మీకేం హక్కు ఉంది?" అని యామినీశర్మ సూటిగా ప్రశ్నించారు. భక్తులు హుండీలో వేసిన సొమ్మును టీటీడీ ధూపదీప నైవేద్యాలకు, హిందూ ధర్మ ప్రచారానికి వినియోగిస్తుందని ఆమె స్పష్టం చేశారు.

హిందూ ఆలయాల నిర్మాణానికి ప్రభుత్వ నిధులను ఏమాత్రం తీసుకోవడం లేదని, పైగా దేవాదాయ శాఖ ద్వారా ప్రభుత్వమే ఆలయాల నుంచి పన్నులు వసూలు చేస్తోందని ఆమె గుర్తుచేశారు. "టీటీడీ ఇప్పటికే ఎన్నో ప్రజా సంక్షేమ కార్యక్రమాలను నిర్వహిస్తోంది" అని తెలిపిన యామిని.. షర్మిలపై సంచలన సవాల్ విసిరారు. "సమాజంపై అంత ప్రేమ ఉంటే, ముందు మీ ఆస్తులన్నీ ప్రజలకు రాసివ్వండి" అంటూ ఆమె షర్మిలకు సవాల్ విసిరారు.

రాష్ట్రీయ స్వయంసేవక్ సంఘ్ (ఆర్‌ఎస్‌ఎస్‌) గురించి మాట్లాడే హక్కు షర్మిలకు లేదని యామినీశర్మ అన్నారు. దశాబ్దాలుగా కాంగ్రెస్ పార్టీ దళితులను కేవలం ఓటు బ్యాంకుగానే పరిగణించిందని.. వారి అభివృద్ధిని ఏనాడూ పట్టించుకోలేదని ఆమె తీవ్రంగా విమర్శించారు. ఈ వ్యాఖ్యలతో ఆలయాల నిర్మాణం అంశం రాష్ట్రంలో రాజకీయంగా మరింత వేడెక్కింది.