77 Years of Republic : 1950లో రూ.300..నేడు రూ.1.6 లక్షలు..పేదరికం నుంచి ప్రపంచ శక్తిగా భారత్.

77 Years of Republic : భారతదేశం నేడు గర్వంగా 77వ గణతంత్ర దినోత్సవ వేడుకలను జరుపుకుంటోంది. 1950లో రాజ్యాంగం అమల్లోకి వచ్చిన నాటి నుంచి నేటి వరకు గడిచిన ఈ 77 ఏళ్ల కాలం కేవలం క్యాలెండర్ మార్పు మాత్రమే కాదు.. ఒక దేశపు తలరాతే మారిపోయిన గొప్ప ప్రయాణం. ఆకలి కేకలు, పేదరికం, వనరుల కొరతతో కొట్టుమిట్టాడిన భారత్ నేడు ప్రపంచానికే దిక్సూచిలా ఎలా మారిందో..సామాన్యుడి జీవితంలో వచ్చిన విప్లవాత్మక మార్పులేంటో చూద్దాం.

1950వ దశకంలో భారతదేశం ఒక పసికందులా ఉండేది. అప్పుడే స్వాతంత్ర్యం వచ్చి, కొత్త రాజ్యాంగం ఏర్పడిన తరుణంలో దేశ జీడీపీ కేవలం 30 బిలియన్ డాలర్లు మాత్రమే. అప్పుడు వ్యవసాయం తప్ప మరే రంగం బలంగా లేదు. పరిశ్రమలు లేవు, టెక్నాలజీ అస్సలు లేదు. సామాన్యుడికి మూడు పూటలా తిండి దొరకడమే ఒక గొప్ప విజయంగా ఉండేది. కానీ నేడు భారతదేశ జీడీపీ దాదాపు 4 ట్రిలియన్ డాలర్లకు చేరువైంది. అంటే అప్పటితో పోలిస్తే మన ఆర్థిక వ్యవస్థ పరిమాణం వంద రెట్లకు పైగా పెరిగింది. సాఫ్ట్‌వేర్, ఫార్మా, స్టార్టప్ రంగాల్లో భారత్ నేడు ప్రపంచానికే నాయకత్వం వహిస్తోంది.

సామాన్యుడి ఆదాయం, జీవన ప్రమాణాల్లో వచ్చిన మార్పులు ఊహకందనివి. 1950 ప్రాంతంలో ఒక భారతీయుడి సగటు వార్షిక ఆదాయం కేవలం 60 నుండి 70 డాలర్లు (అప్పటి లెక్కల ప్రకారం సుమారు రూ.300) మాత్రమే ఉండేది. కరెంటు, పక్కా ఇల్లు, చదువు అనేవి చాలా మందికి కలగానే మిగిలిపోయేవి. కానీ నేడు తలసరి ఆదాయం 2000 డాలర్లు (సుమారు రూ.1.70 లక్షలు) దాటిపోయింది. నేడు కుగ్రామాల్లో కూడా ఇంటర్నెట్, స్మార్ట్‌ఫోన్, బ్యాంకింగ్ సౌకర్యాలు అందుబాటులోకి వచ్చాయి. ప్రభుత్వ పథకాలు నేరుగా ప్రజల ఖాతాల్లోకి చేరుతున్నాయి.

ఇక రూపాయి విలువ గురించి ఎప్పుడూ చర్చ జరుగుతుంటుంది. 1950లో ఒక డాలర్ ధర రూ.4.7 మాత్రమే ఉండేది. నేడు అది రూ.90కి చేరువైంది. అయితే దీనిని కేవలం రూపాయి బలహీనతగా చూడలేం. నాటి మూసివేసిన ఆర్థిక వ్యవస్థ నుంచి నేడు ప్రపంచంతో పోటీపడే స్వేచ్ఛా ఆర్థిక వ్యవస్థగా మనం మారాం. అప్పట్లో దిగుమతుల కోసం విదేశీ సాయం కోసం ఎదురుచూసిన భారత్ దగ్గర నేడు 700 బిలియన్ డాలర్ల విదేశీ మారక నిల్వలు ఉన్నాయి. ఇది మన దేశ ఆర్థిక స్థిరత్వానికి, ప్రపంచ పెట్టుబడిదారులకు మనపై ఉన్న నమ్మకానికి నిదర్శనం.

ఆకలితో అలమటించిన భారత్ నేడు అంతరిక్ష ప్రయోగాల్లో ప్రపంచ రికార్డులు సృష్టిస్తోంది. చంద్రయాన్ నుంచి మంగళయాన్ వరకు, డిజిటల్ పేమెంట్స్ విప్లవం నుంచి అణుశక్తి వరకు ప్రతి రంగంలోనూ మన ముద్ర ఉంది. అయితే నిరుద్యోగం, ఆర్థిక అసమానతలు వంటి సవాళ్లు ఇంకా మిగిలే ఉన్నాయి. కానీ గత 77 ఏళ్ల ప్రయాణం మనకు ఒక విషయాన్ని స్పష్టం చేసింది.. మన సంకల్పం బలంగా ఉంటే ఎలాంటి అసాధ్యాన్ని అయినా సుసాధ్యం చేయొచ్చు. నేటి యువ భారత్ అభివృద్ధి చెందిన దేశాల జాబితాలో చేరేందుకు వడివడిగా అడుగులు వేస్తోంది.