Rolls Royce : ఒక రోల్స్ రాయిస్ తయారీకి ఇన్ని నెలలా? కోట్లు పోసినా వెయిటింగ్ తప్పదు మరి.

Rolls Royce : ప్రపంచంలో ఎన్నో లగ్జరీ కార్లు ఉండొచ్చు కానీ రోల్స్ రాయిస్ పేరు వింటే వచ్చే కిక్కే వేరు. ఇది కేవలం ఒక కారు మాత్రమే కాదు.. అంతకు మించిన ఒక స్టేటస్ సింబల్. అపర కుబేరులు సైతం ఈ కారు కోసం క్యూ కడుతుంటారంటే దీని రేంజ్ ఏంటో అర్థం చేసుకోవచ్చు. మెర్సిడెస్, బీఎండబ్ల్యూ లాంటి బ్రాండ్లు మార్కెట్లో ఎన్ని ఉన్నా, రోల్స్ రాయిస్ ఎప్పటికీ ఒక అన్ స్టాపబుల్ లెజెండ్. అసలు ఒక రోల్స్ రాయిస్ కారు తయారు కావడానికి ఎంత టైమ్ పడుతుందో, ఎందుకు అంత రేటు ఉంటుందో తెలిస్తే ముక్కున వేలేసుకుంటారు.

రోల్స్ రాయిస్ కారు తయారీ అనేది ఒక పెద్ద యజ్ఞం లాంటిది. సాధారణంగా ఒక మారుతీ కార్ల కంపెనీలో రోజుకు వందల కార్లు తయారవుతాయి. కానీ, ఒకే ఒక్క రోల్స్ రాయిస్ కారు తయారవ్వడానికి సగటున 6 నెలల నుంచి 8 నెలల సమయం పడుతుంది. ఎందుకు అంత టైమ్ అంటే.. ఈ కారును యంత్రాలతో కాకుండా, నిపుణులైన కళాకారులు తమ చేతులతో తయారు చేస్తారు. కారు బాడీపై ఉండే సన్నని పెయింట్ లైన్‎ను కూడా ఒక ఆర్టిస్ట్ కేవలం బ్రష్‌తో చేత్తోనే గీస్తారు. ఒక్క చిన్న పొరపాటు జరిగినా మళ్ళీ మొదటి నుంచి పెయింటింగ్ వేయాల్సిందే. అందుకే ఈ కారు అంత ఎక్స్‌క్లూజివ్‌గా ఉంటుంది.

ప్రతి రోల్స్ రాయిస్ కారు కస్టమర్ అభిరుచికి అనుగుణంగా తయారవుతుంది. కారు లోపల వాడే లెదర్ కోసం ప్రత్యేకమైన జాతి ఎద్దుల చర్మాన్ని వాడుతారు. వాటికి కీటకాలు కుట్టకుండా, చర్మంపై మచ్చలు పడకుండా చాలా జాగ్రత్తలు తీసుకుంటారు. ఇక కారు లోపల ఉండే చెక్క ప్యానెల్స్ కోసం ప్రపంచంలోని అరుదైన అడవుల నుంచి కలపను సేకరిస్తారు. వీటన్నింటికీ మించి రోల్స్ రాయిస్ కారు పైన ఉండే స్టార్‌లైట్ హెడ్‌లైనర్ ఒక అద్భుతం. కారు లోపల పైకప్పు మీద వేల కొద్దీ ఆప్టిక్ ఫైబర్ లైట్లను చేతులతో అమర్చుతారు. మీరు కారులో కూర్చుని పైకి చూస్తే అచ్చం ఆకాశంలో నక్షత్రాల మధ్య ఉన్న అనుభూతి కలుగుతుంది.

ఈ కారు ప్రయాణాన్ని మ్యాజిక్ కార్పెట్ రైడ్ అని పిలుస్తారు. అంటే గాలిలో తివాచీ మీద ప్రయాణిస్తే ఎలా ఉంటుందో, ఈ కారులో వెళ్తున్నప్పుడు అంత స్మూత్‌గా ఉంటుంది. దీనిలోని V12 ఇంజిన్ ఎంత పవర్‌ఫుల్ అంటే.. కారు గంటకు 100 కిలోమీటర్ల వేగంతో వెళ్తున్నా, లోపల ఉన్న వారికి చిన్న సౌండ్ కూడా వినిపించదు. కారు కిటికీలు డబుల్ గ్లేజ్డ్ గ్లాస్‌తో తయారవుతాయి కాబట్టి బయటి శబ్దం లోపలికి అస్సలు రాదు. కారు సస్పెన్షన్ వ్యవస్థ రోడ్డు మీద ఉన్న గుంతలను కెమెరాల ద్వారా ముందే పసిగట్టి, అందుకు తగ్గట్లుగా అడ్జస్ట్ అవుతుంది. అందుకే దీనిని అపర కుబేరులు, సెలబ్రిటీలు తమ హోదాకు చిహ్నంగా భావిస్తారు. ఇది కేవలం డబ్బుంటే వచ్చేది కాదు.. ఈ కారును సొంతం చేసుకోవడం అంటే ఒక గొప్ప కళాఖండాన్ని గెలుచుకున్నట్లే.