Stock Market Crash : ఫెడ్ నిర్ణయంతో షేర్ మార్కెట్ షాక్.. రూ.2.27 లక్షల కోట్లు ఆవిరి.

Stock Market Crash : అందరూ ఊహించినట్లే అమెరికా ఫెడరల్ రిజర్వ్ వడ్డీ రేట్లను 25 బేసిస్ పాయింట్లు తగ్గించింది. అయితే, డిసెంబర్ పాలసీ మీటింగ్‌లో మళ్లీ వడ్డీ రేట్లలో కోత ఉంటుందా లేదా అనే స్పష్టత ఇవ్వకపోవడం మార్కెట్ ఆటగాళ్లను గందరగోళంలో పడేసింది. సాధారణంగా వడ్డీ రేట్ల తగ్గింపు అనేది స్టాక్ మార్కెట్‌కు సానుకూల అంశం. అలాగే, చైనా, అమెరికా మధ్య రేర్ ఎర్త్ డీల్ కుదరడం కూడా మార్కెట్‌కు కలిసొచ్చే అంశంగా భావించారు. కానీ, డిసెంబర్‌లో వడ్డీ రేట్ల కోత ఉండకపోవచ్చనే ఫెడ్ సంకేతాలు ఈ సానుకూలతలను పక్కన పెట్టేసి, మార్కెట్‌ను నష్టాల్లోకి నెట్టేశాయి.

ఈ కారణంగా గురువారం భారత స్టాక్ మార్కెట్ భారీ నష్టాలతో ప్రారంభమైంది. ప్రారంభమైన 40 నిమిషాల్లోనే 500 పాయింట్లకు పైగా పతనమై, పెట్టుబడిదారులకు 2.27 లక్షల కోట్ల రూపాయల నష్టం వాటిల్లింది. బుధవారం విదేశీ పెట్టుబడిదారులు భారీగా అమ్మకాలు జరపడం కూడా మార్కెట్ పతనానికి ఒక కారణమని నిపుణులు అంటున్నారు. మరోవైపు, రూపాయి విలువ కూడా డాలర్ తో పోలిస్తే పడిపోయింది.

ఫెడ్ సమావేశం, అలాగే డిసెంబర్‌లో వడ్డీ రేట్ల కోతకు అవకాశం లేదనే సంకేతాలు దేశీయ స్టాక్ మార్కెట్‌లో భారీ పతనానికి దారితీశాయి. గురువారం మధ్యాహ్నం 12 గంటల సమయానికి బాంబే స్టాక్ ఎక్స్ఛేంజ్ ప్రధాన సూచీ సెన్సెక్స్ 460.45 పాయింట్ల నష్టంతో 84,537.66 పాయింట్ల వద్ద ట్రేడవుతోంది. ఒక దశలో సెన్సెక్స్ 530.1 పాయింట్లు పతనమై 84,467.03 పాయింట్ల వద్దకు చేరుకుంది, ఇది రోజు కనిష్ట స్థాయి. అదేవిధంగా, నేషనల్ స్టాక్ ఎక్స్ఛేంజ్ ప్రధాన సూచీ నిఫ్టీ 50 కూడా 142 పాయింట్ల నష్టంతో 25,911.10 పాయింట్ల వద్ద ట్రేడవుతోంది. ఒక దశలో నిఫ్టీ 161.65 పాయింట్లు పతనమై 25,892.25 పాయింట్ల వద్దకు చేరుకుంది.

సెన్సెక్స్‌లోని ప్రధాన కంపెనీలైన సన్ ఫార్మా, భారతీ ఎయిర్‌టెల్, పవర్ గ్రిడ్, ఐటీసీ, టాటా స్టీల్, ఏషియన్ పెయింట్స్ షేర్లు భారీగా నష్టపోయాయి. అయితే, లార్సెన్ అండ్ టర్బో, ఇటర్నల్, అదానీ పోర్ట్స్, మారుతి షేర్లు లాభాల్లో ట్రేడయ్యాయి. సెక్టోరల్ ఇండెక్స్‌లలో, హెల్త్‌కేర్ 0.53 శాతం పతనమైంది. ఐటీ, టెలికాం, ఆటో, బ్యాంక్ ఎక్స్ఛేంజ్‌లలో 200 పాయింట్లకు పైగా నష్టం కనిపించింది. ఎఫ్‌ఎంసీజీ రంగం కూడా నష్టాల్లోనే ట్రేడవుతోంది. అయితే, బీఎస్‌ఈ మిడ్‌క్యాప్‌లో కొంత సానుకూలత కనిపించగా, బీఎస్‌ఈ స్మాల్‌క్యాప్ స్వల్ప నష్టాలతో ట్రేడవుతోంది.

బుధవారం ఫారిన్ ఇన్వెస్టర్లు భారీగా లాభాల స్వీకరణకు పాల్పడ్డారు. దీని ప్రభావం కూడా స్టాక్ మార్కెట్‌లో కనిపించింది. వీరు బుధవారం రూ.2,540.16 కోట్ల విలువైన షేర్లను విక్రయించారు. అయితే, మంగళవారం FIIలు మూడు నెలల రికార్డును బద్దలు కొట్టి, ఒకే రోజులో రూ.10 వేల కోట్లకు పైగా పెట్టుబడులు పెట్టారు. అక్టోబర్ నెలలో విదేశీ పెట్టుబడిదారులు స్టాక్ మార్కెట్‌లో దాదాపు 18 వేల కోట్ల రూపాయల పెట్టుబడులు పెట్టడం గమనార్హం. మూడు నెలల తర్వాత విదేశీ పెట్టుబడిదారులు స్టాక్ మార్కెట్ పట్ల సానుకూల వైఖరిని ప్రదర్శించారు.