India GDP : భారతదేశ ఆర్థిక వ్యవస్థ ఈ ఆర్థిక సంవత్సరం రెండవ త్రైమాసికంలో (జూలై-సెప్టెంబర్ 2025) అంచనాలకు మించి 8.2 శాతం అద్భుతమైన వృద్ధిని సాధించింది. చాలా మంది ఆర్థిక నిపుణులు వృద్ధి రేటు 7.0 శాతం నుంచి 7.5 శాతం మధ్య ఉంటుందని భావించినప్పటికీ, ప్రభుత్వం శుక్రవారం విడుదల చేసిన అధికారిక గణాంకాలు ఈ వృద్ధి రేటును 8.2 శాతంగా చూపాయి. ఈ అనూహ్య వృద్ధి రేటు, మొదటి త్రైమాసికంలో (ఏప్రిల్-జూన్) నమోదైన 7.8 శాతం వృద్ధిని కూడా అధిగమించింది, ఇది దేశ ఆర్థిక వ్యవస్థ బలంగా పుంజుకుంటున్నట్లు సంకేతాలను ఇస్తోంది.
నేషనల్ స్టాటిస్టిక్స్ ఆఫీస్ విడుదల చేసిన ప్రకటన ప్రకారం.. 2024-25 రెండవ త్రైమాసికంలో దేశ వాస్తవ స్థూల దేశీయోత్పత్తి విలువ పెరిగింది. అంతకుముందు సంవత్సరం ఇదే త్రైమాసికంలో ఉన్న రూ.44.94 లక్షల కోట్ల నుంచి, ఈసారి రూ.48.63 లక్షల కోట్లకు చేరుకుంది. అదేవిధంగా జీడీపీ నుంచి నికర ఉత్పత్తి పన్నులను తీసివేస్తే వచ్చే వాస్తవ స్థూల విలువ జోడింపు కూడా గత ఏడాది ఇదే త్రైమాసికంతో పోలిస్తే 8.1 శాతం పెరిగి రూ.44.77 లక్షల కోట్లుగా నమోదైంది. ఈ పెరుగుదల మొత్తం ఆర్థిక వ్యవస్థలో స్ట్రాంగ్ రికవరీని, డిమాండ్‌ను సూచిస్తోంది.
ఈ త్రైమాసికంలో నమోదైన అధిక జీడీపీ వృద్ధికి కీలకమైన రంగాల నుంచి అనూహ్య మద్దతు లభించింది. ముఖ్యంగా మ్యానుఫ్యాక్చరింగ్ రంగం 9.1 శాతం వృద్ధి చెందడం ఆర్థిక నిపుణులను ఆశ్చర్యానికి గురి చేసింది.. ఇది మొత్తం GDP వృద్ధికి ప్రధాన కారణంగా నిలిచింది. దీంతో పాటు ఫైనాన్స్, రియల్ ఎస్టేట్, వృత్తిపరమైన సేవల రంగం 10.2 శాతం వృద్ధిని సాధించి ఆర్థిక వ్యవస్థకు ఊతం ఇచ్చింది. అయితే, వ్యవసాయ రంగం మాత్రం 3.5 శాతం, విద్యుత్, గ్యాస్ వంటి పౌర సేవల రంగం 4.4 శాతం చొప్పున సాధారణ వృద్ధిని మాత్రమే నమోదు చేశాయి.
భారతదేశం సాధించిన ఈ వేగవంతమైన ఆర్థిక వృద్ధి, దేశం తన వికసిత దేశం లక్ష్యాన్ని చేరుకోవడానికి మార్గం సుగమం చేస్తుంది. ప్రపంచ బ్యాంకు అంచనా ప్రకారం 2047 నాటికి భారత్ అభివృద్ధి చెందిన దేశంగా మారాలంటే, రాబోయే 22 సంవత్సరాల పాటు సగటున 7.8 శాతం స్థిరమైన వృద్ధి రేటును కొనసాగించాలి. నిపుణుల అభిప్రాయం ప్రకారం.. దేశ ఆర్థిక వ్యవస్థ రెండు దశాబ్దాల పాటు సగటున 8 శాతం వేగంతో పెరిగితే, 2047 నాటికి భారత్ ఆ లక్ష్యాన్ని చేరుకోవడం సాధ్యమవుతుంది. ప్రస్తుత త్రైమాసికంలో సాధించిన 8.2 శాతం వృద్ధి, భారతదేశం సరైన దిశలో పయనిస్తోందనే నమ్మకాన్ని కల్పిస్తోంది.