Mahindra Racing : ఆనంద్ మహీంద్రా గుడ్ న్యూస్..ఫార్ములా E లో మన GEN4 రేస్ కారు.

Mahindra Racing : మోటార్‌స్పోర్ట్స్ ప్రపంచంలో భారతదేశం తన ఉనికిని మరింత బలంగా చాటుకుంది. 2014 నుంచి ఫార్ములా E ఛాంపియన్‌షిప్‌లో చురుగ్గా పాల్గొంటున్న మహీంద్రా రేసింగ్, తన పనితీరు, సాంకేతికతలో నిరంతరం మెరుగుదల సాధిస్తోంది. ఇటీవల భారతదేశంలో జరిగిన ఒక కార్యక్రమంలో మహీంద్రా తమ M12 ఎలక్ట్రో రేసింగ్ కారును కొత్త డిజైన్‌తో ప్రదర్శించింది. ఈ సందర్భంగా మహీంద్రా గ్రూప్ చైర్మన్ ఆనంద్ మహీంద్రా ఒక ముఖ్యమైన ప్రకటన చేశారు.. తమ టీమ్ ఇకపై GEN4 తయారీదారుగా కూడా పాల్గొంటుందని ఆయన ప్రకటించారు. దీంతో మహీంద్రా GEN4 తయారీదారుల జాబితాలో చేరిన ఆరవ కంపెనీగా నిలిచింది. మహీంద్రా రేసింగ్ 2030 వరకు ఈ ఛాంపియన్‌షిప్‌లో తమ బలమైన భాగస్వామ్యాన్ని కొనసాగిస్తుందని ఆయన ధృవీకరించారు.

GEN4 కార్లు 2026/27 ఏబీబీ ఎఫ్‌ఐఏ ఫార్ములా E ప్రపంచ ఛాంపియన్‌షిప్‌లో మొట్టమొదటిసారిగా కనిపిస్తాయి. ఈ కార్లు అడ్వాన్సుడ్ టెక్నాలజీ, అపారమైన శక్తికి ప్రసిద్ధి చెందాయి. GEN4 కారు 600kW శక్తిని కలిగి ఉంటుంది, ఇది దాదాపు 815 hpకి సమానం. అంతేకాకుండా, ఈ కార్లు యాక్టివ్ ఆల్-వీల్ డ్రైవ్ టెక్నాలజీతో వస్తాయి. దీని అర్థం రేస్‌లో ప్రతి దశలోనూ కారుకు మరింత పట్టు, హై స్పీడ్ పర్ఫామెన్స్ లభిస్తుంది.

GEN4 కారును ఇప్పటివరకు తయారు చేసిన రేసింగ్ కార్లలో అత్యంత ఎకో ఫ్రెండ్లీ కారుగా చెబుతున్నారు. దీనిని 100% రీ-సైకిల్ చేయగలిగే మెటీరియల్‌తో తయారు చేశారు. దీని ద్వారా మోటార్‌స్పోర్ట్స్‌లో పర్యావరణ బాధ్యతకు ఒక కొత్త ప్రమాణాన్ని సెట్ చేశారు. డిజైన్ పరంగా GEN4 లో రెండు రకాల ఏరో సెటప్‌లు ఉన్నాయి. క్వాలిఫైయింగ్ కోసం హై డౌన్‌ఫోర్స్, రేస్ పరిస్థితుల కోసం లో డౌన్‌ఫోర్స్. పవర్ మ్యాప్‌ల విషయానికి వస్తే, ఇందులో 450kW రేస్ పవర్, 600kW అటాక్ మోడ్, 700kW రీజనరేటివ్ బ్రేకింగ్, 55kWh రేస్ ఎనర్జీ కెపాసిటీ వంటి అద్భుతమైన ఫీచర్లు ఉన్నాయి. మహీంద్రా తీసుకున్న ఈ నిర్ణయం టెక్నాలజీ, సుస్థిరత, ఇండియన్ టాలెంటును ప్రపంచ స్థాయిలో ముందుకు తీసుకెళ్లాలనే కంపెనీ లక్ష్యాన్ని స్పష్టం చేస్తుంది.