Mahindra XUV 7XO : మహీంద్రా నుంచి మరో సునామీ.. ChatGPTతో వచ్చిన కొత్త XUV 7XO.

Mahindra XUV 7XO : మహీంద్రా అండ్ మహీంద్రా తన ఐకానిక్ SUV అయిన XUV700ని అదిరిపోయే అప్‌డేట్స్‌తో మహీంద్రా XUV 7XO పేరుతో తాజాగా భారత్‌లో లాంచ్ చేసింది. ఈ సరికొత్త ఫేస్‌లిఫ్ట్ వెర్షన్ కేవలం లుక్ పరంగానే కాకుండా, టెక్నాలజీ పరంగా కూడా ఒక కొత్త ఒరవడిని సృష్టించబోతోంది. ముఖ్యంగా భారత్‌లో ChatGPT ఇంటిగ్రేషన్, ట్రిపుల్ స్క్రీన్ డిస్‌ప్లేతో వచ్చిన మొదటి ICE SUVగా ఇది నిలిచింది.

కొత్త XUV 7XO ఇప్పుడు మునుపటి కంటే చాలా షార్ప్‌గా, ప్రీమియంగా కనిపిస్తోంది. దీని ముందు భాగంలో కొత్త హెడ్‌ల్యాంప్ హౌసింగ్, C ఆకారపు ఎల్‌ఈడీ డీఆర్‌ఎల్‌లు, సరికొత్త గ్రిల్ డిజైన్ ఉన్నాయి. 19-ఇంచుల డైమండ్-కట్ అల్లాయ్ వీల్స్ కారుకు ఒక అద్భుతమైన స్టైలిష్ లుక్‌ను ఇస్తున్నాయి. వెనుక వైపు హెక్సాగాన్ ప్యాటర్న్ కలిగిన టెయిల్ ల్యాంప్స్, కనెక్టెడ్ లైట్ బార్ ఈ ఎస్‌యూవీకి ఒక టెక్-సావీ ఫినిషింగ్‌ను ఇచ్చాయి.

ఈ కారులోని అసలైన మ్యాజిక్ లోపల ఉంది. డాష్‌బోర్డ్ మీద ఏకంగా మూడు 12.3-ఇంచుల భారీ స్క్రీన్‌లు ఉన్నాయి. డ్రైవర్ కోసం ఒకటి, ఇన్ఫోటైన్‌మెంట్ కోసం ఒకటి, కో-ప్యాసింజర్ కోసం ప్రత్యేకంగా ఒక స్క్రీన్‌ను కేటాయించారు. అంతేకాకుండా, ఇందులో మీరు Alexa ద్వారా ChatGPTని వాడవచ్చు. అంటే ప్రయాణంలో ఉన్నప్పుడు మీ కారుతోనే మాట్లాడి విషయాలు తెలుసుకోవచ్చు, కథలు వినవచ్చు లేదా మీ ప్రశ్నలకు సమాధానాలు పొందవచ్చు. 16-స్పీకర్ల హార్మన్ కార్డన్ సౌండ్ సిస్టమ్, డాల్బీ అట్మాస్ వంటి ఫీచర్లు కారును ఒక థియేటర్‌లా మారుస్తాయి.

సేఫ్టీ విషయంలో మహీంద్రా రాజీ పడలేదు. ఈ కారుకు Bharat NCAPలో 5-స్టార్ రేటింగ్ లభించింది. ఇందులో లెవల్ 2+ ADAS సిస్టమ్, 7 ఎయిర్‌బ్యాగ్‌లు, కారు కింద ఉన్న రాళ్లను కూడా చూపించేలా 540-డిగ్రీ కెమెరా వంటి అధునాతన ఫీచర్లు ఉన్నాయి. ఇంజిన్ విషయానికొస్తే.. 2.0-లీటర్ టర్బో పెట్రోల్, 2.2-లీటర్ డీజిల్ ఇంజిన్ ఆప్షన్లు ఉన్నాయి. ఇవి మాన్యువల్, ఆటోమేటిక్ గేర్‌బాక్స్‌లతో పాటు టాప్ వేరియంట్లలో ఆల్-వీల్ డ్రైవ్ (AWD) సౌకర్యాన్ని కూడా అందిస్తాయి.

మహీంద్రా XUV 7XO ప్రారంభ ధరను రూ.13.66 లక్షలుగా (ఎక్స్-షోరూమ్) నిర్ణయించారు. ఈ ధర కేవలం మొదటి 40,000 మంది కస్టమర్లకు మాత్రమే వర్తిస్తుంది. టాప్ మోడల్ ధర రూ.22.47 లక్షల వరకు ఉంది. టెస్ట్ డ్రైవ్ జనవరి 8, 2026 నుంచి, బుకింగ్స్ జనవరి 14, 2026 నుంచి ఓపెన్ అవుతాయి. AX7, AX7T, AX7L వేరియంట్ల డెలివరీ జనవరి 14 నుంచే మొదలవుతుంది. మిగిలిన AX, AX3, AX5 వేరియంట్ల డెలివరీ ఏప్రిల్ 2026 నుంచి ప్రారంభం కానుంది.