Meesho : భారతీయ స్టాక్ మార్కెట్లో బుధవారం ఈ-కామర్స్ కంపెనీ మీషో ఒక అద్భుతమైన ప్రదర్శనతో ఎంట్రీ ఇచ్చింది. ఐపీఓ ద్వారా షేర్లు పొందిన పెట్టుబడిదారులకు, లిస్టింగ్ అయిన మొదటి రోజునే దాదాపు 60% వరకు లాభం వచ్చింది. ఐపీఓ ఇష్యూ ధర రూ.111 కాగా, షేర్లు NSEలో రూ.162.05 వద్ద, BSEలో రూ.161.20 వద్ద లిస్ట్ అయ్యాయి. లిస్ట్ అయిన కొద్దిసేపటికే షేర్ ధర BSEలో రూ.177.55 వరకు పెరిగింది. ఈ అద్భుతమైన ప్రారంభంతో మీషో మార్కెట్ ఎంట్రీ సూపర్ హిట్ డెబ్యూగా రికార్డ్ అయింది. ఈ ఐపీఓకు పెట్టుబడిదారుల నుంచి భారీ స్పందన లభించింది, మొత్తం ఇష్యూ 81.76 రెట్లు సబ్స్క్రైబ్ అయింది. ఐపీఓ ద్వారా సేకరించిన రూ.4,250 కోట్ల నిధులను మీషో క్లౌడ్ టెక్నాలజీని బలోపేతం చేయడానికి, ఏఐ టీమ్లను పెంచడానికి, లాజిస్టిక్స్ సామర్థ్యాన్ని మెరుగుపరచడానికి, కొత్త సంస్థలను కొనుగోలు చేయడానికి ఉపయోగించనుంది.
మీషో అనేది ఆస్సెట్-లైట్ అనే ప్రత్యేక ఈ-కామర్స్ మోడల్పై పనిచేస్తుంది. దీనిలో కోట్లాది మంది వినియోగదారులను, చిన్న వ్యాపారులను ఒకే వేదికపైకి తీసుకువస్తారు. ఈ కంపెనీ తక్కువ ధరలకు ఉత్పత్తులను అందించడం, ఫ్యాషన్, హోమ్ వంటి విభాగాలలో లక్షలాది ఉత్పత్తులను అందుబాటులో ఉంచడం ద్వారా బాగా వృద్ధి చెందుతోంది. ఆర్థిక సంవత్సరం 2025 నాటికి, మీషోకు 7 లక్షల కంటే ఎక్కువ యాక్టివ్ సెల్లర్లు, 234 మిలియన్ల యూజర్లు ఉన్నారు. 2025 లో కంపెనీ ఆదాయం 26% పెరిగి రూ.9,901 కోట్లకు చేరుకుంది. అయితే ఆపరేటింగ్ ఖర్చులు పెరగడం వల్ల కంపెనీ నికర నష్టం కూడా పెరిగి రూ.3,942 కోట్లకు చేరింది. అంటే, ఆదాయం మరియు యూజర్ల సంఖ్య బలంగా పెరుగుతున్నప్పటికీ, కంపెనీ లాభాల బాటలోకి రావడం అనేది అతిపెద్ద సవాలుగా ఉంది.
మీషో ప్రస్తుతం అప్పులు లేని సంస్థ అయినప్పటికీ, స్టాక్ మార్కెట్ విశ్లేషకుల ప్రకారం.. రాబోయే రోజుల్లో పెట్టుబడిదారుల దృష్టి అంతా కంపెనీ యూనిట్ ఎకనామిక్స్ను ఎంతవరకు మెరుగుపరచగలదు. భారీ నష్టాలను తగ్గించగలదు అనే దానిపైనే ఉంటుంది. ఈ-కామర్స్ రంగంలో అమెజాన్, ఫ్లిప్కార్ట్ వంటి సంస్థల నుంచి తీవ్రమైన పోటీ ఉన్నందున, మీషో తన మార్కెట్ వాటాను నిలబెట్టుకోవడం కూడా కీలకం. మొదటి రోజు వచ్చిన ఈ అద్భుతమైన లిస్టింగ్ అనేది కంపెనీకి మంచి ఆరంభాన్ని ఇచ్చినా, స్థిరమైన లాభదాయకతను సాధించడానికి కంపెనీ ఇంకా చాలా కృషి చేయాల్సి ఉంటుంది.