Royal Enfield Continental GT 650 : బుల్లెట్ ప్రియులకు పండగే.. సరికొత్త అవతారంలో రాయల్ ఎన్‌ఫీల్డ్ కాంటినెంటల్ GT 650.

Royal Enfield Continental GT 650 : భారతీయ రోడ్లపై రాయల్ ఎన్‌ఫీల్డ్ అంటే ఒక బ్రాండ్ మాత్రమే కాదు, అదొక ఎమోషన్. ముఖ్యంగా యువత కలల బైక్ అయిన 'కాంటినెంటల్ జిటి 650' (Continental GT 650) ఇప్పుడు సరికొత్త హంగులతో ముస్తాబవుతోంది. తాజా సమాచారం ప్రకారం.. కంపెనీ ఈ కేఫ్-రేసర్ బైక్‌ను సరికొత్త మిడ్-లైఫ్ అప్‌డేట్‎తో 2026 చివరి నాటికి మార్కెట్లోకి తీసుకురావడానికి సిద్ధం చేస్తోంది. మొన్నటి EICMA 2025లో పవర్‌ఫుల్ GT-R 750ని ప్రదర్శించినప్పటికీ, పాపులర్ 650cc వెర్షన్‌ను మాత్రం కొనసాగించాలని రాయల్ ఎన్‌ఫీల్డ్ నిర్ణయించుకోవడం విశేషం.

ఈ అప్‌డేటెడ్ మోడల్‌లో ప్రధాన మార్పులు డిజైన్, రైడింగ్ కంఫర్ట్ చుట్టూ తిరుగుతున్నాయి. బైక్‌కు మరింత కొత్తదనాన్ని జోడించడానికి కంపెనీ సరికొత్త కలర్ ఆప్షన్లను ప్రవేశపెట్టనుంది. అంతేకాకుండా, ప్రస్తుతం ఉన్న టెలిస్కోపిక్ ఫ్రంట్ ఫోర్క్ స్థానంలో మరింత అడ్వాన్స్‌డ్, ప్రీమియం సస్పెన్షన్ సెటప్‌ను ఆశించవచ్చు. దీనివల్ల ప్రయాణం మరింత సులభంగా, సౌకర్యవంతంగా మారుతుంది. సేఫ్టీ విషయంలో కూడా రాజీ పడకుండా, ముందు వైపున డ్యూయల్ డిస్క్ బ్రేక్ సిస్టమ్‌ను ప్రవేశపెట్టే అవకాశం ఉందని సమాచారం.

ఫీచర్ల విషయానికి వస్తే.. 650cc ట్విన్-సిలిండర్ సెగ్మెంట్‌లో ఇది తన ఆధిపత్యాన్ని కొనసాగించనుంది. ప్రస్తుతం ఈ బైక్ ధర రూ.3.50 లక్షల నుంచి రూ.3.78 లక్షల (ఎక్స్-షోరూమ్) మధ్యలో ఉండగా, కొత్త ఫీచర్ల చేరికతో ధర కొద్దిగా పెరిగే ఛాన్స్ ఉంది. ఇంటర్సెప్టర్ 650, క్లాసిక్ 650 మధ్య ఒక ప్రత్యేకమైన క్లాసిక్ లుక్‌తో ఇది రైడర్లను ఆకట్టుకుంటోంది. రెట్రో స్టైలింగ్, స్మూత్ పవర్ డెలివరీ అనేవి ఈ బైక్‌ను ఇతర మోడళ్ల కంటే భిన్నంగా నిలబెడుతున్నాయి.

టెక్నికల్, స్టైల్ పరంగా ఈ అప్‌డేట్ కాంటినెంటల్ GT 650 స్థాయిని మరో మెట్టు పైకి తీసుకెళ్లనుంది. పాత కస్టమర్ల నమ్మకాన్ని నిలబెట్టుకుంటూనే, కొత్త తరం రైడర్లను ఆకర్షించడమే లక్ష్యంగా రాయల్ ఎన్‌ఫీల్డ్ ఈ మార్పులు చేస్తోంది. 2026 చివరి నాటికి రోడ్ల మీదకు రాబోతున్న ఈ ఐకానిక్ కేఫ్-రేసర్ మరిన్ని సంచలనాలు సృష్టించడం ఖాయంగా కనిపిస్తోంది. ఇప్పటికే ఈ బైక్ కోసం ఎదురుచూస్తున్న అభిమానులకు ఈ వార్త కొత్త ఉత్సాహాన్ని ఇస్తోంది.