Tata Sierra : భారత మార్కెట్‌లో కొత్త టాటా సియెర్రా హల్‌చల్.. వణుకుతున్న ప్రత్యర్థులు.
Tata Sierra : టాటా మోటార్స్ 2025లో సరికొత్త టాటా సియెర్రా ఎస్‌యూవీని భారత మార్కెట్‌లో తిరిగి విడుదల చేసి మరోసారి సంచలనం సృష్టించింది. ఈ ఎస్‌యూవీ కేవలం తన పాత పేరుతోనే కాకుండా, తన పవర్ఫుల్ డిజైన్, విశాలమైన పరిమాణం, ప్రీమియం ఫీచర్ల కారణంగా కూడా కస్టమర్లను ఆకర్షిస్తోంది. టాటా దీని ప్రారంభ ధరను రూ.11.49 లక్షలుగా నిర్ణయించడంతో, ఈ ధర విభాగంలో ఇది అత్యంత శక్తివంతమైన ఎస్‌యూవీగా మారింది. 90ల దశకంలో ప్రజాదరణ పొందిన సియెర్రాను టాటా ఇప్పుడు మోడ్రన్ డిజైన్, విస్తృతమైన బాడీ స్టాన్స్, హై-టెక్ ఫీచర్లతో ప్రీమియం ఎస్‌యూవీగా మార్కెట్‌లోకి తీసుకువచ్చింది.
భారత మార్కెట్‌లో టాటా సియెర్రా... హ్యుందాయ్ క్రెటా, కియా సెల్టోస్, హోండా ఎలివేట్ వంటి ప్రధాన C-సెగ్మెంట్ ఎస్‌యూవీలతో పోటీ పడుతుంది. అయితే దీని డైమెన్షన్స్ చూస్తే, ఇది ఈ సెగ్మెంట్‌కు మించి టాటా హారియర్, మహీంద్రా XUV700 వంటి పెద్ద ఎస్‌యూవీల వైపు మొగ్గు చూపుతున్నట్లు స్పష్టమవుతోంది.
టాటా సియెర్రా ఎస్‌యూవీ తన ప్రత్యర్థి మోడల్స్ అయిన హ్యుందాయ్ క్రెటా, కియా సెల్టోస్, మరియు హోండా ఎలివేట్‌ల కంటే డైమెన్షన్స్ చాలా పెద్దదిగా ఉంది. వెడల్పులో సియెర్రా (1,841ఎంఎం) తన సెగ్మెంట్‌లోని అన్ని ఎస్‌యూవీల కంటే విశాలంగా ఉండడం వల్ల, లోపల కూర్చునే వారికి ఎక్కువ స్థలం లభిస్తుంది. అలాగే, ఎత్తులో కూడా సియెర్రా (1,715 ఎంఎం) అత్యంత ఎత్తుగా నిలిచింది. దీని కారణంగా రోడ్డుపై ఈ కారు రూపురేఖలు చాలా ఆకట్టుకునేలా కనిపిస్తాయి.
అంతేకాకుండా దీని వీల్‌బేస్ 2,730 ఎంఎంతో ఈ విభాగంలోనే అత్యంత పొడవైనది. ఇది కారుకు మెరుగైన స్థిరత్వాన్ని, వెనుక సీటులో ప్రయాణించే వారికి ఎక్కువ లెగ్ స్పేస్‌ను అందిస్తుంది. ముఖ్యంగా బూట్ స్పేస్ ఏకంగా 622 లీటర్లు ఉండడం సియెర్రా అతిపెద్ద బలం. ఇది ఎక్కువ లగేజీతో సుదీర్ఘ ప్రయాణాలు చేసే కుటుంబాలకు చాలా అనుకూలంగా ఉంటుంది. C-సెగ్మెంట్ ధరతో ప్రీమియం, భారీ ఎస్‌యూవీ అనుభూతిని కోరుకునే వారికి కొత్త టాటా సియెర్రా ఒక అద్భుతమైన ఎంపిక.