New Rules : నేటి నుంచి ఆరు కొత్త రూల్స్.. మీ జేబుపై ఎంత ప్రభావం చూపిస్తాయో తెలుసా ?

New Rules : అక్టోబర్ 1 అంటే నేటి నుండి భారత ప్రభుత్వం, ఆర్థిక మంత్రిత్వ శాఖ ద్వారా అనేక కీలక మార్పులను అమలు చేసింది. ఈ మార్పులు సామాన్య ప్రజల రోజువారీ జీవితం, వారి ఆర్థిక ప్రణాళికపై నేరుగా ప్రభావం చూపుతాయి. యూపీఐ లావాదేవీల నుండి రైల్వే టికెట్ బుకింగ్ వరకు మీ జేబుపై ప్రభావం చూపించే ఆ ఆరు ముఖ్యమైన మార్పులు ఏమిటో ఇప్పుడు వివరంగా తెలుసుకుందాం.

1. నేషనల్ పెన్షన్ సిస్టమ్‎లో మార్పులు:

అక్టోబర్ 1 నుండి నేషనల్ పెన్షన్ సిస్టమ్‎లో ప్రభుత్వేతర చందాదారులు ఇప్పుడు మల్టిపుల్ స్కీమ్ ఫ్రేమ్‌వర్క్ కింద 100% వరకు ఈక్విటీలో పెట్టుబడి పెట్టవచ్చు. గతంలో ఈ పరిమితి 75% మాత్రమే ఉండేది. దీనితో పాటు PRAN (Permanent Retirement Account Number) ఓపెనింగ్ కోసం ప్రైవేట్ సెక్టార్ ఉద్యోగులు రూ.18 ఈ-PRAN కిట్ ఫీజు, రూ.100 వార్షిక మెయింటెనెన్స్ ఛార్జ్ చెల్లించాలి. అటల్ పెన్షన్ యోజన, NPS లైట్ చందాదారులకు PRAN ఓపెనింగ్, మెయింటెనెన్స్ ఛార్జ్ రూ.15 గా ఉంటుంది. లావాదేవీలపై ఎటువంటి అదనపు ఫీజులు ఉండవు.

2. రైల్వే టికెట్ బుకింగ్‌లో మార్పులు:

అక్టోబర్ 1 నుండి రైల్వే రిజర్వేషన్లు ఓపెన్ చేసిన మొదటి 15 నిమిషాలు ఆధార్ వెరిఫై అయిన వారికి మాత్రమే అందుబాటులో ఉంటాయి. పీఆర్‌ఎస్ కౌంటర్ల నుండి టికెట్లు కొనుగోలు చేసే వారికి ఎలాంటి మార్పు ఉండదు. రైల్వే ఏజెంట్లు రిజర్వేషన్లు తెరిచిన మొదటి 10 నిమిషాల వరకు టికెట్లు బుక్ చేయలేరు. టికెట్ బుకింగ్‌లో జరిగే అక్రమాలను అరికట్టడమే దీని ముఖ్య ఉద్దేశ్యం.

3. ఆన్‌లైన్ గేమింగ్ నియమాలు కఠినతరం

ఆన్‌లైన్ గేమింగ్ బిల్ 2025 ప్రకారం, అక్టోబర్ 1 నుండి 18 సంవత్సరాల కంటే తక్కువ వయస్సు ఉన్నవారు ఆన్‌లైన్ రియల్ మనీ గేమింగ్‌లో పాల్గొనడానికి అనుమతించబడరు. ఈ నిబంధనను ఉల్లంఘిస్తే 3 సంవత్సరాల వరకు జైలు శిక్ష, రూ.కోటి వరకు జరిమానా విధించవచ్చు. ప్రమోటర్లకు రెండు సంవత్సరాల జైలు శిక్ష, రూ.50 లక్షల జరిమానా విధించవచ్చు. ఈ-స్పోర్ట్స్ ను ప్రోత్సహించడం, ఆర్థిక నష్టాలను నియంత్రించడం లక్ష్యంగా ప్రభుత్వం ఈ చర్యలు తీసుకుంటుంది.

4. వంట గ్యాస్ ధరలలో మార్పులు

అక్టోబర్ 1 నుండి ఆయిల్ కంపెనీలు దేశీయ వంట గ్యాస్ సిలిండర్ల ధరలలో మార్పులు చేయనున్నాయి. ఇది నేరుగా ప్రజల వంటింటి బడ్జెట్‌పై ప్రభావం చూపుతుంది. వినియోగదారులు తమ ప్రాంతంలో తాజా ధరల కోసం స్థానిక డిస్ట్రిబ్యూటర్‌లను సంప్రదించాలి.

5. యూపీఐ లావాదేవీలలో మార్పు:

ఇకపై యూపీఐ ద్వారా ఒకేసారి రూ.5 లక్షల వరకు లావాదేవీలు జరపవచ్చు. ఈ చర్య మోసాలను, ఫిషింగ్‌ను తగ్గించడానికి సహాయపడుతుందని భావిస్తున్నారు. ఇది పెద్ద మొత్తంలో డబ్బు బదిలీ చేసే వారికి మరింత సౌకర్యాన్ని అందిస్తుంది.

6. పోస్టల్ సర్వీసెస్ – స్పీడ్ పోస్ట్‎లో మార్పులు:

స్పీడ్ పోస్ట్ కొత్త సేవల్లో OTP ఆధారిత డెలివరీ, రియల్-టైమ్ ట్రాకింగ్, ఆన్‌లైన్ బుకింగ్, SMS నోటిఫికేషన్‌లు వంటివి ఉన్నాయి. విద్యార్థులకు 10%, కొత్త టోకు కస్టమర్లకు 5% తగ్గింపు కూడా వర్తిస్తుంది. ఈ మార్పులు మీ ఆర్థిక లావాదేవీలు, పెట్టుబడి, ప్రయాణం, రోజువారీ అవసరాలపై నేరుగా ప్రభావం చూపవచ్చు. కాబట్టి, ఈ కొత్త నిబంధనల గురించి పూర్తి అవగాహన కలిగి ఉండటం చాలా ముఖ్యం.