Tata Motors : డీజిల్ కంటే ఎక్కువ పవర్.. ట్రైబల్ ఫ్యూయల్ తో టాటా హారియర్ కొత్త అవతార్.

Tata Motors : టాటా మోటార్స్ తమ ప్యాసింజర్ వెహికల్ విభాగంలో కొత్త ఉత్పత్తులను వేగంగా విడుదల చేస్తోంది. ఇటీవల సియెరా ఎస్‌యూవీని విడుదల చేసిన తర్వాత, ఇప్పుడు ఎలాంటి విరామం లేకుండా మరో ముఖ్యమైన ఉత్పత్తిని మార్కెట్లోకి తీసుకురావడానికి సిద్ధమైంది. ఆ వాహనమే హారియర్ పెట్రోల్ వేరియంట్. హారియర్ తర్వాత దాదాపు వెంటనే సఫారి పెట్రోల్ వేరియంట్ కూడా లాంచ్ కానుంది. ఇప్పటివరకు ఈ రెండు ప్రీమియం ఎస్‌యూవీలు భారత మార్కెట్‌లో కేవలం డీజిల్ ఇంజిన్‌తో మాత్రమే అందుబాటులో ఉన్నాయి.

హారియర్ పెట్రోల్ వేరియంట్‌ను కంపెనీ అధికారికంగా లాంచ్ చేయకముందే డీలర్ల వద్దకు పంపడం ప్రారంభించింది. ఈ కొత్త వేరియంట్‌లో అత్యాధునిక హైపీరియన్ ఇంజిన్‌ను అమర్చారు. ఇది 1.5 లీటర్, 4-సిలిండర్, డైరెక్ట్-ఇంజెక్షన్ టర్బో పెట్రోల్ ఇంజిన్. ఈ ఇంజిన్ గరిష్టంగా 170 హార్స్‌పవర్ శక్తిని, 280 Nm టార్క్‌ను ఉత్పత్తి చేస్తుంది. ఈ ఇంజిన్‌ను అభివృద్ధి చేయడానికి టాటా మోటార్స్‌కు ఐదేళ్లకు పైగా సమయం పట్టింది. ఈ కొత్త ఇంజిన్‌ను టాటా మాస్-మార్కెట్ ఎస్‌యూవీలలో పరిచయం చేయనున్నారు.

హారియర్‌లో అమర్చిన కొత్త టర్బో-పెట్రోల్ ఇంజిన్ మాన్యువల్, ఆటోమేటిక్ ట్రాన్స్‌మిషన్ ఆప్షన్‌లతో వస్తుందని తెలుస్తోంది. బయటకొచ్చిన దృశ్యాలలో ఆటోమేటిక్ ట్రాన్స్‌మిషన్‌తో ఉన్న ఇంజిన్ కనిపిస్తోంది. అయితే టాటా ఇటీవల విడుదల చేసిన సియెరాలో ఇదే ఇంజిన్‌కు మాన్యువల్ ట్రాన్స్‌మిషన్ ఆప్షన్ ఇవ్వలేదు. ఈ నేపథ్యంలో హారియర్, సఫారీలో పెట్రోల్ ఇంజిన్‌తో మాన్యువల్ ట్రాన్స్‌మిషన్ ఆప్షన్ లభిస్తుందా లేదా అనేది తెలియాల్సి ఉంది.

ప్రస్తుతం హారియర్, సఫారీలలో ఉన్న 2.0-లీటర్ డీజిల్ ఇంజిన్ గరిష్టంగా 167 హార్స్‌పవర్, 350 Nm టార్క్‌ను ఉత్పత్తి చేస్తుంది. కొత్త టర్బో-పెట్రోల్ ఇంజిన్ డీజిల్ ఇంజిన్ కంటే 3 హార్స్‌పవర్‌ను ఎక్కువగా ఉత్పత్తి చేస్తుంది. అయితే టార్క్‌లో మాత్రం వెనుకబడి ఉంది. డీజిల్ వేరియంట్‌లు ఆరు-స్పీడ్ మాన్యువల్ లేదా ఆరు-స్పీడ్ ఆటోమేటిక్ ట్రాన్స్‌మిషన్‌తో వస్తున్నాయి. పెట్రోల్ ఇంజిన్‌ను తీసుకురావడం వల్ల ఈ మోడళ్ల ధరలు తగ్గవచ్చు. ప్రస్తుతం సఫారి ప్రారంభ ధర రూ.14.66 లక్షలు (ఎక్స్-షోరూమ్), హారియర్ ప్రారంభ ధర రూ.14 లక్షలు (ఎక్స్-షోరూమ్) గా ఉంది.

ఈ విభాగంలోని చాలా ప్రత్యర్థి వాహనాలు డీజిల్ వేరియంట్‌లతో పాటు పెట్రోల్ వేరియంట్‌లను కూడా అందిస్తున్నాయి. కొత్త టర్బో పెట్రోల్ ఇంజిన్ రాకతో ఈ మోడళ్లు మార్కెట్‌లో తమ స్థానాన్ని మరింత బలోపేతం చేసుకోగలవు. భారత మార్కెట్‌లో హారియర్ ముఖ్యంగా జీప్ కంపాస్, ఎంజీ హెక్టార్ వంటి వాటితో పోటీ పడుతుంది. త్రీ రో సఫారి మహీంద్రా ఎక్స్‌యూవీ700, హ్యుందాయ్ అల్కాజార్, జీప్ మెరిడియన్ వంటి ఇతర ప్రత్యర్థులతో పోటీపడుతుంది. పెట్రోల్ ఇంజిన్ రాకతో టాటా ఈ విభాగంలో బలమైన స్థానాన్ని దక్కించుకోవడానికి గట్టి ప్రయత్నం చేస్తోంది.