Tata Sierra : టాటా సియెరా టాప్ వేరియంట్‌ల ధరలు రిలీజ్.. లెవెల్-2 ADAS తో అదిరిపోయే సేఫ్టీ.

Tata Sierra : టాటా మోటార్స్ ప్యాసింజర్ వెహికల్స్, నవంబర్ 2025లో విడుదల చేసిన తమ ఐకానిక్ సియెర్రా ఎస్‌యూవీ పూర్తి ధరల జాబితాను తాజాగా ప్రకటించింది. విడుదల సమయంలో కేవలం ప్రారంభ ధరను మాత్రమే ప్రకటించిన కంపెనీ ఇప్పుడు అత్యంత ప్రీమియం వేరియంట్లు అయిన అకంప్లిష్డ్, అకంప్లిష్డ్ ప్లస్ ధరలను కూడా విడుదల చేసింది. అకంప్లిష్డ్ వేరియంట్ ధర రూ.17.99 లక్షల (1.5 లీటర్ NA పెట్రోల్ మాన్యువల్) నుంచి ప్రారంభమవుతుంది. ఇక టాప్-ఎండ్ మోడల్ అయిన అకంప్లిష్డ్ ప్లస్ (1.5 లీటర్ డీజిల్ ఆటోమేటిక్) ధర రూ.21.29 లక్షలు (ఎక్స్-షోరూమ్)గా నిర్ణయించారు.

టాటా సియెర్రా మొత్తం మూడు శక్తివంతమైన ఇంజిన్ ఆప్షన్‌లలో లభిస్తుంది. అవి 1.5 లీటర్ NA పెట్రోల్ 106 hp పవర్, 1.5 లీటర్ డీజిల్ 116 hp పవర్, 1.5 లీటర్ టర్బో పెట్రోల్ అత్యంత శక్తివంతమైన 160 hp పవర్ ఉత్పత్తి చేస్తుంది.

ఈ వేరియంట్లలో అకంప్లిష్డ్ ప్లస్ ట్రిమ్‌లో తక్కువ శక్తిగల NA పెట్రోల్ ఇంజిన్‌ను పూర్తిగా తొలగించారు. గేర్‌బాక్స్ విషయానికి వస్తే NA పెట్రోల్‌కు 6-స్పీడ్ మాన్యువల్ మరియు 7-స్పీడ్ DCT ఆప్షన్లు ఉన్నాయి. డీజిల్ ఇంజిన్‌కు మాన్యువల్, ఆటోమేటిక్ గేర్‌బాక్స్‌లు రెండూ లభిస్తాయి. అయితే, అత్యంత శక్తివంతమైన టర్బో పెట్రోల్ ఇంజిన్ మాత్రం 6-స్పీడ్ ఆటోమేటిక్ గేర్‌బాక్స్‌తో మాత్రమే వస్తుంది.

అకంప్లిష్డ్, అకంప్లిష్డ్ ప్లస్ వేరియంట్‌లలో అనేక ప్రీమియం, అడ్వాన్స్‌డ్ ఫీచర్లు ఉన్నాయి. ముఖ్యంగా ఇందులో లెవెల్-2 ADAS (అడ్వాన్స్‌డ్ డ్రైవర్ అసిస్టెన్స్ సిస్టమ్) సేఫ్టీ ఫీచర్ అందుబాటులో ఉంది. ఇది సియెర్రాను దాని విభాగంలో అత్యంత సురక్షితమైన ఎస్‌యూవీలలో ఒకటిగా నిలబెడుతుంది. ఇతర ప్రత్యేక ఫీచర్లలో 12-స్పీకర్ JBL సౌండ్ సిస్టమ్, మెమరీ ఫంక్షన్‌తో కూడిన పవర్డ్ డ్రైవర్ సీటు, పవర్డ్ టెయిల్‌గేట్, హెడ్-అప్ డిస్‌ప్లే (HUD), iRA కనెక్టెడ్ కార్ టెక్నాలజీ ఉన్నాయి. ఈ ఆకర్షణీయమైన ధరలు, అత్యాధునిక ఫీచర్లతో, టాటా సియెర్రా ఇప్పుడు హ్యుందాయ్ క్రెటా, కియా సెల్టోస్ వంటి ప్రముఖ ఎస్‌యూవీలతో గట్టి పోటీ ఇవ్వడానికి సిద్ధమైంది.