50-30-20 Rule: ఎంత జీతం ఉన్నా నెల చివరిలో డబ్బు లేక ఇబ్బంది పడుతున్నారా? అయితే 50-30-20 ఫార్ములా పాటించండి.

50-30-20 Rule:నేటి కాలంలో చాలా మంది మంచి జీతం సంపాదిస్తున్నప్పటికీ సరైన ప్రణాళిక లేకపోవడం వల్ల నెల చివరికి జేబు దాదాపు ఖాళీ అవుతోంది. దీనికి ప్రధాన కారణం.. ఆలోచన లేకుండా ఖర్చు చేయడం, భవిష్యత్తు అవసరాలను వాయిదా వేయడం. అయితే మన జీవనశైలిని పెద్దగా మార్చుకోకుండానే మెరుగైన పొదుపు చేయడానికి 50-30-20 రూల్ అనే ఆర్థిక సూత్రం ఇప్పుడు బాగా ప్రాచుర్యం పొందుతోంది. ఈ సూత్రం ప్రకారం మీ నెలవారీ ఆదాయాన్ని మూడు భాగాలుగా విభజించాలి.. 50% అవసరాలకు, 30% కోరికలకు, 20% పొదుపు లేదా పెట్టుబడికి కేటాయించాలి.

ఈ ఫార్ములా అన్ని ఆదాయ వర్గాల వారికి వర్తిస్తుంది. మీ జీతం నెలకు రూ.30,000 అయినా లేదా రూ.1.5 లక్షలు అయినా ఈ రూల్ మీకు ప్రతినెలా ఖచ్చితమైన బడ్జెట్‌ను సెట్ చేయడంలో సహాయపడుతుంది:

50% అవసరాలు : ఈ మొత్తం ఇంటి అద్దె, కిరాణా సామాగ్రి, విద్యుత్ బిల్లులు, పిల్లల స్కూల్ ఫీజు, మందులు, EMI లు వంటి అత్యవసర ఖర్చుల కోసం కేటాయించబడుతుంది.

30% కోరికలు : ఈ డబ్బు బయట భోజనం చేయడం, షాపింగ్, విహార యాత్రలు, OTT సబ్‌స్క్రిప్షన్‌లు (Netflix, Amazon Prime వంటివి) వంటి మీ జీవనశైలి ఖర్చుల కోసం ఉద్దేశించబడింది.

20% పొదుపు, పెట్టుబడి : ఈ భాగం మీ భవిష్యత్తు అవసరాలను టెన్షన్ లేకుండా తీర్చడానికి ఉపయోగపడుతుంది. దీన్ని SIP, రిటైర్‌మెంట్ ఫండ్, అత్యవసర నిధి వంటి వాటిలో పెట్టుబడి పెట్టాలి.

ఆర్థిక నిపుణుల అభిప్రాయం ప్రకారం.. మీకు జీతం పెరిగినప్పుడు ఈ రూల్ మరింత సమర్థవంతంగా పనిచేస్తుంది. జీతం పెరిగిన సమయంలో లైఫ్‌స్టైల్ ఖర్చులను పెంచే బదులు, పొదుపు లేదా పెట్టుబడి మొత్తాన్ని పెంచడం చాలా ప్రయోజనకరం. ఈ పద్ధతి ద్వారా మీ ఎమర్జెన్సీ ఫండ్ మరింత బలంగా మారుతుంది. SIP, రిటైర్‌మెంట్ ఫండ్ వంటి పెట్టుబడులలో మంచి వృద్ధి కనిపిస్తుంది. ఉదాహరణకు మీ అవసరాలు మారనట్లయితే, పెరిగిన ఆదాయంలో నెలకు కేవలం రూ.1,500 అదనంగా పొదుపు చేసినా, కంపౌండింగ్ ద్వారా దీర్ఘకాలంలో భారీ మొత్తాన్ని సంపాదించవచ్చు.

50-30-20 రూల్ ను ఆర్థిక స్వాతంత్ర్యం వైపు వేసే మొదటి అడుగుగా పరిగణిస్తారు. భారతదేశం వంటి దేశాలలో అద్దె, EMI, కుటుంబ ఖర్చులు కొన్నిసార్లు 50% కంటే ఎక్కువగా ఉండవచ్చు. అయినప్పటికీ ఈ సూత్రం ఒక బలమైన మార్గదర్శిగా ఉపయోగపడుతుంది. ఇది మీ జీవనశైలి ఖర్చులు, అత్యవసర అవసరాల కంటే ఎక్కువ పెరగకుండా నియంత్రణలో ఉంచుతుంది. ప్రతి నెలా ఖచ్చితంగా దీన్ని పాటించలేకపోయినా, ఈ రూల్ మీ ఆర్థిక జీవితంలో ఒక క్రమశిక్షణను తీసుకొస్తుంది. మీ డబ్బు ఎక్కడికి పోతోందో అర్థం చేసుకోవడానికి, ఎంత పొదుపు చేయవచ్చో తెలుసుకోవడానికి ఇది సహాయపడుతుంది. ఈ అలవాటే దీర్ఘకాలంలో సంపద సృష్టికి అతిపెద్ద రహస్యం.