Toyota Urban Cruiser EV : 543 కిలోమీటర్ల రేంజ్..అదిరిపోయే ఫీచర్లు..నేడే అర్బన్ క్రూయిజర్ ఈవీ లాంచ్.

Toyota Urban Cruiser EV : జపాన్ దిగ్గజం టయోటా ఎట్టకేలకు భారత ఎలక్ట్రిక్ వాహన మార్కెట్లోకి గ్రాండ్‌గా ఎంట్రీ ఇస్తోంది. ఇప్పటివరకు హైబ్రిడ్ కార్లతో అలరించిన టయోటా, ఇప్పుడు తన మొట్టమొదటి పూర్తిస్థాయి ఎలక్ట్రిక్ ఎస్‌యూవీ అర్బన్ క్రూయిజర్ ఈవీను జనవరి 20న లాంచ్ చేస్తోంది. అదిరిపోయే రేంజ్, ఫైవ్ స్టార్ సేఫ్టీ ఫీచర్లతో వస్తున్న ఈ కారు ఎలక్ట్రిక్ వాహన రంగంలో సరికొత్త సంచలనం సృష్టించబోతోంది. హ్యుందాయ్ క్రెటా ఈవీ, మారుతి సుజుకి ఈ-విటారా వంటి కార్లకు ఇది గట్టి పోటీ ఇవ్వనుంది.

టయోటా అర్బన్ క్రూయిజర్ ఈవీ డిజైన్ చాలా ప్రీమియంగా ఉంది. దీని ఫ్రంట్ లుక్ చూడటానికి టయోటా ఫ్లాగ్‌షిప్ మోడల్ క్యామ్రీని పోలి ఉంటుంది. సన్నని ప్రొజెక్టర్ ఎల్ఈడీ హెడ్ లైట్లు, వాటికి జతగా సింగిల్ స్ట్రిప్ డే-టైమ్ రన్నింగ్ లైట్లు కారుకు ఒక విలక్షణమైన రూపాన్ని ఇచ్చాయి. మారుతి సుజుకి ఈ-విటారా ప్లాట్‌ఫారమ్‌పైనే తయారైనప్పటికీ, టయోటా తనదైన శైలిలో మార్పులు చేసింది. డైమండ్-కట్ అల్లాయ్ వీల్స్, కారు చుట్టూ ఉండే బాడీ క్లాడింగ్, వెనుక వైపు కనెక్ట్ చేయబడిన ఎల్ఈడీ టెయిల్ లైట్లు ఈ ఎస్‌యూవీని రోడ్డుపై ప్రత్యేకంగా నిలుపుతాయి.

ఈ కారును HEARTECT-e అనే స్పెషల్ ఈవీ ప్లాట్‌ఫారమ్‌పై నిర్మించారు. దీని పొడవు 4,285 మి.మీ, వీల్‌బేస్ 2,700 మి.మీ గా ఉంది. కారు లోపలి భాగం చాలా విశాలంగా, లగ్జరీగా ఉంటుంది. ఇందులో 10.25-అంగుళాల డిజిటల్ ఇన్‌స్ట్రుమెంట్ క్లస్టర్, 10.1-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌ను అమర్చారు. అంతేకాకుండా పనోరమిక్ గ్లాస్ రూఫ్, వెంటిలేటెడ్ సీట్లు, ఎలక్ట్రికల్ అడ్జస్టబుల్ డ్రైవర్ సీట్ వంటి ఫీచర్లు రైడింగ్ అనుభవాన్ని మరో స్థాయికి తీసుకెళ్తాయి. ఇంటీరియర్‌లో సాఫ్ట్-టచ్ మెటీరియల్స్ వాడటం వల్ల చాలా ప్రీమియం అనుభూతి కలుగుతుంది.

టయోటా అర్బన్ క్రూయిజర్ ఈవీ రెండు రకాల బ్యాటరీ ఆప్షన్లతో లభిస్తుంది:

49 kWh బ్యాటరీ: ఇది దాదాపు 144 హెచ్‌పి పవర్‌ను ఉత్పత్తి చేస్తుంది. సిటీ డ్రైవింగ్‌కు ఇది సరిగ్గా సరిపోతుంది.

61 kWh బ్యాటరీ: లాంగ్ ట్రిప్పులు వేసేవారికి ఇది బెస్ట్ ఆప్షన్. ఇది 174 హెచ్‌పి పవర్‌ను అందిస్తుంది. ఒక్కసారి ఫుల్ ఛార్జ్ చేస్తే ఏకంగా 543 కిలోమీటర్ల దూరం ప్రయాణించవచ్చని కంపెనీ చెబుతోంది. దీనివల్ల రేంజ్ టెన్షన్ లేకుండా దూరప్రయాణాలు చేయవచ్చు. ఫాస్ట్ ఛార్జింగ్ సదుపాయం ద్వారా కేవలం కొద్ది నిమిషాల్లోనే బ్యాటరీని రీఛార్జ్ చేసుకోవచ్చు.

టయోటా అంటేనే నమ్మకం, భద్రత. అర్బన్ క్రూయిజర్ ఈవీలో కూడా అదే కొనసాగనుంది. ఈ కారుకు బిఎన్‌సిఎపి టెస్టుల్లో 5-స్టార్ సేఫ్టీ రేటింగ్ వస్తుందని అంచనా. సేఫ్టీ కోసం ఇందులో 7 ఎయిర్‌బ్యాగ్‌లు, 360-డిగ్రీ కెమెరాను అమర్చారు. వీటన్నింటికీ మించి లెవల్ 2 ADAS టెక్నాలజీని జోడించారు. ఇది ఆటోమేటిక్ బ్రేకింగ్, లేన్ కీప్ అసిస్ట్ వంటి ఫీచర్ల ద్వారా ప్రమాదాలను అరికడుతుంది. ఇవి కాకుండా ఈఎస్సీ, టీపీఎమ్ఎస్, ఏబీఎస్ విత్ ఈబీడీ వంటి స్టాండర్డ్ ఫీచర్లు ఎలాగూ ఉంటాయి.