Rare Earth : చైనా గుత్తాధిపత్యానికి బ్రేక్.. భారత్, యూరప్ వైపు చూస్తున్న అగ్రరాజ్యం అమెరికా.

Rare Earth : దేశంలో పండుగ సందడి నెలకొన్న వేళ అంతర్జాతీయ స్థాయిలో రేర్ ఎర్త్ మెటల్స్ కోసం మరో పెద్ద యుద్ధం మొదలైంది. అమెరికా, చైనా మధ్య వాణిజ్య ఉద్రిక్తతలు మరోసారి పెరిగాయి. అయితే, ఈసారి అమెరికా స్పష్టంగా.. ఇది అమెరికా వర్సెస్ చైనా మాత్రమే కాదు, చైనా వర్సెస్ ప్రపంచం అని ప్రకటించింది. మొబైల్స్, క్షిపణులు, ఎలక్ట్రిక్ కార్లు, ఉపగ్రహాల వంటి హైటెక్ వస్తువులకు ఈ రేర్ ఎర్త్ పదార్థాలు అత్యంత కీలకం. ప్రపంచ ఉత్పత్తిలో 70% కంటే ఎక్కువ, ప్రాసెసింగ్‌లో 90% కంటే ఎక్కువ వాటాను చైనా కలిగి ఉంది.

రేర్ ఎర్త్ మినరల్స్ సరఫరాలో చైనాకు ఉన్న గుత్తాధిపత్యాన్ని అడ్డుకోవాలని అమెరికా ప్రయత్నిస్తుండగా, చైనా కీలకమైన కొన్ని రేర్ ఎర్త్ పదార్థాల ఎగుమతులపై కఠినమైన ఆంక్షలు విధించింది. ఈ ఆంక్షలు అమెరికా, దాని మిత్రదేశాల సాంకేతిక, సైనిక సరఫరా గొలుసుపై తీవ్ర ప్రభావం చూపవచ్చు. దీనికి ప్రతిస్పందనగా అమెరికా చైనా నుంచి వచ్చే వస్తువులపై 100% దిగుమతి సుంకం విధిస్తామని హెచ్చరించింది.

ఈ పోరాటంలో ఒంటరిగా పోరాడకూడదని అమెరికా నిర్ణయించుకుంది. అమెరికా ఆర్థిక మంత్రి స్కాట్ బేసెంట్ మాట్లాడుతూ.. "ఇప్పుడు అమెరికా ఒంటరిగా పోరాడదు. భారత్, యూరప్, ఆసియాలోని ఇతర ప్రజాస్వామ్య దేశాల నుంచి తమకు మద్దతు లభిస్తుందని ఆశిస్తున్నాం" అని స్పష్టం చేశారు. భారతదేశంలో రేర్ ఎర్త్ నిల్వలు పుష్కలంగా ఉన్నా, వాటిని పూర్తిగా ఉపయోగించుకోవడం లేదు. సరైన సాంకేతికత, పెట్టుబడి లభిస్తే, చైనాకు ప్రత్యామ్నాయంగా భారత్ అగ్రరాజ్యానికి ఒక అద్భుతమైన ఎంపిక కాగలదని అమెరికా బలంగా విశ్వసిస్తోంది

అమెరికా మద్దతు కోసం చూస్తున్నప్పటికీ, ట్రంప్ పరిపాలన ఇటీవల భారత్‌పై 25% సుంకం, రష్యా చమురు కొనుగోళ్లపై 25% అదనపు సుంకం విధించడం ద్వారా భారత్‌పై మొత్తం 50% సుంకాన్ని విధించింది. ఇలాంటి ఒత్తిడి ఉన్నప్పటికీ, భారత్‌కు ఇది ఒక పెద్ద సవాల్, అవకాశంగా నిలుస్తోంది. ఒకవేళ భారత్ అమెరికాతో ఈ భాగస్వామ్యంలోకి అడుగుపెడితే, కొత్త సాంకేతికత, భారీ పెట్టుబడి, అంతర్జాతీయ వాణిజ్య మార్గాలు తెరచుకోవచ్చు. రేర్ ఎర్త్ ప్రాసెసింగ్‌లో పాలుపంచుకోవడం ద్వారా భారత్ ప్రపంచ సరఫరా గొలుసులో కీలక పాత్ర పోషించే అవకాశం ఉంది.