Renu Desai : రెండో పెళ్లికి సిద్ధమే... టైం వచ్చినప్పుడు ఆలోచిస్తా: రేణు దేశాయ్

తన రెండో పెళ్ళిపై వస్తున్న రూమర్లపై స్పందించారు నటి, పవన్ కళ్యాణ్ మాజీ భార్య రేణు దేశాయ్. తన పెళ్లి గురించి తాజాగా ఓ ఇంటర్వ్యూలో స్పష్టత నిచ్చారు. రెండో పెళ్లి చేసుకునేందుకు తాను సిద్ధంగానే ఉన్నానని, అయితే ఆ నిర్ణయం తీసుకోవడానికి మరికొంత సమయం పడుతుందని ఆమె వెల్లడించారు. దీంతో ప్రస్తుతానికి తన వ్యక్తిగత జీవితంపై సాగుతున్న ఊహాగానాలకు ఆమె తెరదించారు.

నటుడు, ఏపీ డిప్యూటీ సీఎం పవన్ కళ్యాణ్ తో విడిపోయిన తర్వాత రేణు దేశాయ్ తన పిల్లలు అకీరా నందన్, ఆధ్యాలతో కలిసి జీవిస్తున్న విషయం తెలిసిందే. ఐతే ఆమె రెండో పెళ్లి విషయం తరచూ వార్తల్లో నిలుస్తూ వస్తోంది. ఈ నేపథ్యంలో ఇటీవల ఆమె ఓ ఇంటర్వ్యూలో మాట్లాడుతూ, "రెండో పెళ్లి చేసుకోవడానికి నేను మానసికంగా పూర్తిగా సిద్ధంగా ఉన్నాను. కానీ, మరికొన్ని సంవత్సరాల పాటు వేచి చూడాలని నిర్ణయించుకున్నాను. నా జీవితంలో కూడా ఓ మ్యారేజ్ లైఫ్ ఉండాలని, ప్రేమ ఉండాలని కోరుకుంటున్నాను. అందుకే మళ్లీ పెళ్లి చేసుకోవాలని నిర్ణయించుకున్నాను" అని తెలిపారు. ప్రస్తుతం తన పిల్లల భవిష్యత్తు తనకు ముఖ్యమని టైం వచ్చినప్పుడు పెళ్లి గురించి తప్పకుండా ఆలోచిస్తానని చెప్పారు. తన వ్యక్తిగత జీవితంలో కొత్త అధ్యాయాన్ని ప్రారంభించేందుకు సానుకూలంగానే ఉన్నట్లు రేణు దేశాయ్ సంకేతమిచ్చారు.