అసలే బయట ఎండలు మండిపోతున్నాయి. అడిగే వాళ్లు, అరిచేవాళ్లు ఎవ్వరూ కనిపించలేదు ఆ ఇంట్లో.. అంతే అదే అదనుగా భావించాడు.. హాయిగా ఏసి ఆన్ చేసుకుని నిద్రపోయాడు ఆ ఇంట్లో చోరి చేసుందుకు వచ్చిన ఆ దొంగ.
ఉత్తరప్రదేశ్‌లోని లక్నోలో ఆదివారం (జూన్ 2) ఓ వ్యక్తి దొంగతనానికి ప్రవేశించిన ఇంటి అంతస్తులో ప్రశాంతంగా నిద్రపోతున్నాడని గుర్తించి అరెస్టు చేశారు. పోలీసులు తెలిపిన వివరాల ప్రకారం, వ్యక్తి విపరీతంగా మద్యం సేవించి ఉన్నాడు. లక్నోలోని ఇందిరానగర్ ప్రాంతంలో ఉన్న ఇంట్లోకి వ్యక్తి ప్రవేశించినప్పుడు ఈ సంఘటన జరిగింది. వారణాసిలో విధులు నిర్వహిస్తున్న డాక్టర్ సునీల్ పాండేకు చెందిన ఇంట్లో ఈ ఘటన చోటు చేసుకుంది. ఆ సమయంలో సునీల్ ఇంట్లో లేరు. ఇంటి ముందు గేటు తెరిచి లోపలికి ప్రవేశించిన దొంగ ఇల్లు ఖాళీగా ఉంది ఎవరూ లేరని గుర్తించాడు.
ఇంట్లోని డ్రాయింగ్ ఏరియాకు వెళ్లిన తర్వాత ఆ వ్యక్తి ఎయిర్ కండీషనర్‌ను గమనించి స్విచ్ ఆన్ చేశాడు. అందే చల్లటి గాలి శరీరాన్ని తాకడంతో హాయిగా అక్కడే నేలపై పడుకుని, ఒక కుషన్ మీద తల ఉంచి, వెంటనే నిద్రపోయాడు. డాక్టర్ ఇంటి ముందు గేటు తెరిచి ఉందని గుర్తించిన ఇరుగుపొరుగు వారు అతడికి ఫోన్ చేసి సమాచారం అందించారు. అయితే ఆ సమయంలో లక్నోలో లేకపోవడంతో పోలీసులకు సమాచారం అందించాడు.
సంఘటనా స్థలానికి చేరుకున్న పోలీసులు, ఎయిర్ కండీషనర్ ఆన్ చేసి హాయిగా నిద్రిస్తున్న దొంగని గుర్తించారు. దొంగ తన కుడిచేతిలో మొబైల్ ఫోన్ పట్టుకుని గాఢనిద్రలో ఉన్నాడు.
దొంగతనం చేయాలనే ఉద్దేశంతో ఇంట్లోకి ప్రవేశించిన వ్యక్తి నిద్రపోయాడని డీసీపీ నార్త్ జోన్ ఆర్ విజయ్ శంకర్ తెలిపారు. "అతడు విపరీతంగా తాగి ఉన్నాడు, దాని కారణంగా అతను నిద్రపోయాడు. మేల్కొన్న తర్వాత పోలీసులు అతన్ని అరెస్టు చేశారు.